NEHEMAÏAH 4 - Khasi CL Bible (BSI)

U Nehemaïah u jop ïa ka jingpyrshah ïa ka kam jong u

¹ Haba u Sanballat u ïohsngew ba ki Jiw ki la sdang ïa ka jingtei pat ïa ka kynroh, u la bitar bad u sdang ban krenbeiñ ïa ngi.

² Ha khmat ki paralok jong u bad ki shipai Samaria u ong, “Kaei, kine ki Jiw shem-lanot, ki tharai ba ki leh? Hato ki pyrkhat ba da ka jingkñia jingainguh ki lah ban pyndep ïa ka kam ha ka shi sngi? Hato ki lah ban pynlong ïa ki maw jingtei na ki kynton jong ki synrum ba la ing?”

³ U Tobiah uba ïeng hangta hajan jong u, u ong shuh shuh, “Kaba kum kano ka kynroh ki lah ban tei? Wat u myrsiang u lah ban pynpra ïa ka!”

⁴ Nga duwai, “To sngap ïa ki ba ki krenbeiñ ïa ngi, A Blei! Ai ba ka jingkrenbeiñ jong ki kan hap halor ki khlieh jong ki hi. Ai ba yn lute ïa kaei kaei baroh kaba ki don, bad ai ba yn ring koidi ïa ki sha ka ri nongwei.

⁵ Wat map ïa kaba sniew kaba ki leh bad wat klet ïa ki pop jong ki, namar ba ki la pynlehrain ïa ngi kiba dang ïatei.”

⁶ Kumta ngi ïai tei ïa ka kynroh, bad shen ka la ïeng mar shiteng ka jingjrong, namar ki briew ki shitrhem ha ka jingtrei.

⁷ U Sanballat, u Tobiah bad ki briew ka Arabia, ka Ammon bad ka Ashdod ki la ïohsngew ba ngi ïaid shaphrang ha kaba tei pat ïa ka kynroh Jerusalem, bad ba ïa ki thliew jong ka kynroh la set, bad ki la ïabitar haduh katta katta.

⁸ Kumta ki ïasylla lang ban wan bad tur ïaleh ïa ka Jerusalem bad thaw jingkulmar,

⁹ hynrei ngi duwai ha U Blei jong ngi bad ngi buh ki rangbah ban ap phira bad ïaleh pyrshah ïa ki mynsngi bad mynmiet.

¹⁰ Ki briew ka Judah ki don ka jingrwai kaba ki rwai: “Ngi long tlot ba ngi bah ki jingkit bakhia; Don bun bah ka synrum ban pynkhuid. Kumno ngi lah ban tei ïa ka kynroh mynta ka sngi?”

¹¹ Ki nongshun jong ngi ki pyrkhat ba ngin ym ïohi ïa ki ne tip ïa kaei kaba jia haduh ba ki la long halor jong ngi, ban pynïap ïa ngi bad ban pynduh pyndam ïa ka jingtrei jong ngi.

¹² Hynrei na ka por sha ka por ki Jiw kiba shong hapdeng ki nongshun jong ngi ki wan ban maham ïa ngi ïa ki jingthmu jong ki nongshun jong ngi pyrshah ïa ngi.

¹³ Kumta nga pynkieng atiar ïa ki briew da ki waitlam, ki sum, bad ki ryntieh, bad nga pynap ïa ki da ki kur hadien ki kynroh, ha ki jaka bym pat dep tei.

¹⁴ Nga ïohi ba ki briew ki khuslai, kumta nga ong ha ki bad ha ki nongïalam bad ki rangbah synshar jong ki, “Wat sheptieng ïa ki nongshun jong ngi. Kynmaw kumno U Trai u long uba khraw bad uba shyrkhei, bad u ïaleh na ka bynta ki briew ka ri jong phi, ki khun jong phi, ki tnga jong phi, bad ki ïing jong phi.”

¹⁵ Ki nongshun jong ngi ki ïohsngew ba ngi la tip ïa kaei kaba ki ïasylla, bad ki sngewthuh ba U Blei u la jop ïa ki jingthmu jong ki. Nangta ma ngi baroh ngi leit biang ban tei pat ïa ka kynroh.

¹⁶ Naduh kata, shiteng na ki rangbah jong nga ki trei bad shiteng ki ïeng ban ap phira, da kaba phong ki jingphong jong ka jingkieng atiar bad bat da ki sum, ki stieh bad ki ryntieh. Ki nongïalam jong ngi ki ai ka jingkyrshan batylli ïa ki briew kiba trei ha ka jingtei pat ïa ka kynroh.

¹⁷ Wat kito kiba kit ïa ki tiar ki tar na ka bynta ka jingtei, ki trei da kawei ka kti bad bat ha kawei pat ïa ka tiar ïaleh thma,

¹⁸ bad baroh uba trei, u don ka waitlam ba la teh ha ka syngkai jong u. U briew uba pynsawa ïa ka jingmaham da ka jingput ronsing u don bad nga.

¹⁹ Nga ong ïa ki briew bad ïa ki rangbah synshar bad ki nongïalam, “Ka jingtreikam ka la ïar bad la pynïakhlad ïa ngi da ka jingjngai uwei na uwei pat ha ka kynroh.

²⁰ Lada phi ïohsngew ïa ka jingput ronsing, ïalumlang sawdong jong nga. U Blei jong ngi un ïaleh na ka bynta jong ngi.”

²¹ Kumta, man ka sngi, naduh dang step phyrngab haduh ka por ba la mih ki khlur mynmiet, shiteng na ngi, ngi trei ha ka kynroh, katba shiteng kiwei pat, ki ïeng ap phira bad ki sum.

²² Ha kane ka por nga ong ïa ki rangbah kiba khmih ïa ka kam, ba ma ki bad ki nongïarap jong ki, ki hap ban sah ha Jerusalem ha ka por mynmiet, khnang ba ngi lah ban ap phira ïa ka nongbah mynmiet bad kumjuh ruh ban trei ha ka por mynsngi.

²³ Ngam shym la kylliang sopti wat ha ka por miet, lymne mano mano na ki paralok jong nga, lymne ki shakri jong nga, lymne ki nongap phira jong nga. Bad ma ngi baroh ngi bat ïa ki tiar ïaleh ha ka kti.