NEHEMAÏAH 3 - Khasi CL Bible (BSI)

Ka jingtei pat ïa ka kynroh Jerusalem

¹ Kane ka long kumno ba la tei pat ïa ka kynroh jong ka nongbah. U Eliashib u Rangbah Lyngdoh bad ki para lyngdoh jong u ki la tei pat ïa ka Khyrdop Langbrot, ki pynkyntang ïa ka, bad pynïeng ïa ki khyrdop. Ki la pynkyntang ïa ka kynroh haduh u Mot ki Shispah bad u Mot Hananel.

² Ki rangbah ka Jerikho ki tei ïa ka bynta kaba bud. U Sakkur, u khun jong u Imri u tei ïa ka bynta kaba bud.

³ Ka kur Hassenaah ka tei ïa ka Khyrdop Dohkha. Ki buh ïa ki bim bad pynïeng ïa ka khyrdop, bad pyndait ïa ki nar-khang bad ki jingkhang ïa ka khyrdop.

⁴ U Meremoth, u khun jong u Uriah bad u ksiew jong u Hakkos u tei ïa ka bynta kaba bud. U Meshullam, u khun jong u Berekhaïah bad u ksiew jong u Meshesabel u tei ïa ka bynta kaba bud. U Sadok, u khun jong u Baana u tei ïa ka bynta kaba bud.

⁵ Ki rangbah ka Tekoa ki tei ïa ka bynta kaba bud, hynrei ki rangbah bapawkhmat jong ka shnong ki kyntait ban leh ïa ki kam trei kti ba la aiti ha ki da ki nongpynïaidkam.

⁶ U Joïada, u khun jong u Paseah, bad u Meshullam, u khun jong u Besodeïah, ki tei pat ïa ka Khyrdop Jeshanah. Ki buh ïa ki bim bad pynïeng ïa ka khyrdop, bad pyndait ïa ki nar-khang bad ki jingkhang ka khyrdop.

⁷ U Melataïah na Gibeon, u Jadon na Meronoth, bad ki rangbah ka Gibeon bad Mispah, ki tei ïa ka bynta kaba bud, haduh ka jaka sah jong u lat ka Ïuphratis kaba shaphang sepngi.

⁸ U Ussiel, u khun jong u Harhaïah, u bania, u tei ïa ka bynta kaba bud. U Hananaïah, u nongshna jingiwbih, u tei ïa ka bynta kaba bud haduh ka Kynroh Baïar.

⁹ U Rephaïah, u khun jong u Hur, u nongsynshar ïa shiteng jong ka Jerusalem distrik, u tei ïa ka bynta kaba bud.

¹⁰ U Jedaïah, u khun jong u Harumaph u tei ïa ka bynta kaba bud, kaba don hajan ka ïing jong u hi. U Hattush, u khun jong u Hashabneïah u tei ïa ka bynta kaba bud.

¹¹ U Malkhijah, u khun jong u Harim bad u Hasshub, u khun jong u Pahath Moab, ki tei baroh ar tylli ki bynta kiba bud bad ïa u Mot shet kpu.

¹² U Shallum, u khun jong u Hallohesh, u nongsynshar ïa kawei pat kaba shiteng jong ka Jerusalem distrik, u tei ïa ka bynta kaba bud. (Ki khun kynthei ki la ïarap ha ka jingtrei.)

¹³ U Hanun bad ki nongshong shnong jong ka nongbah Sanoah, ki tei pat ïa ka Khyrdop Them. Ki pynïeng ïa ka khyrdop, bad pyndait ïa ki nar-khang bad ïa ki jingkhang ka khyrdop, bad ki shna pynbha ïa ka kynroh kaba sawspah sawphew mitar, haduh ka Khyrdop Synrum.

¹⁴ U Malkhijah, u khun jong u Rekhab, u nongsynshar ïa ka Beth Hakkherem distrik, u tei pat ïa ka Khyrdop Synrum. U pynïeng ïa ki khyrdop bad pyndait ïa ki nar-khang bad ki jingkhang ka khyrdop.

¹⁵ U Shallum, u khun jong u Kolhoseh, u nongsynshar ïa ka Mispah distrik, u tei pat ïa ka Khyrdop Umpohliew. U siang ïa ka lynti kaba poi sha ka khyrdop, u pynïeng ïa ka khyrdop, bad pyndait ïa ki nar-khang bad ïa ki jingkhang ka khyrdop. Ha ka Pungsum Shelah, u tei ïa ka khyrdop markhap ïa ka kper syiem, haduh ki mawjam kiba hiar sha ka Nongbah u Dabid.

¹⁶ U Nehemaïah, u khun jong u Asbuk, u nongsynshar ïa shiteng jong ka Bethsur distrik, u tei ïa ka bynta kaba bud haduh ka jingtep u Dabid, ka pungsum bad jaka sah shipai.

Ki Lebi kiba trei ha ka kynroh

¹⁷ Kine ki Lebi ki tei pat ïa kiba bun ki bynta kiba bud jong ka kynroh: U Rehum u khun jong u Bani u tei ïa ka bynta kaba bud; U Hashabaïah, u nongsynshar ïa shiteng jong ka Keilah distrik, u tei ïa ka bynta kaba bud na ka bynta ka distrik jong u;

¹⁸ U Babbai, u khun jong u Henadad, u nongsynshar ïa kawei pat ka shiteng jong ka Keilah distrik, u tei ïa ka bynta kaba bud;

¹⁹ U Eser, u khun jong u Jeshua, u nongsynshar jong ka Mispah, u tei ïa ka bynta kaba bud kaba long ha khmat ka jaka buh tiar ïapom, haduh ka jaka ha kaba ka kynroh ka phai;

²⁰ U Barukh, u khun jong u Sabbai u tei ïa ka bynta kaba bud, haduh ka jaka rung sha ka ïing jong u Eliashib u Rangbah Lyngdoh.

²¹ U Meremoth, u khun jong u Uriah bad u ksiew jong u Hakkos, u tei ïa ka bynta kaba bud, haduh kaba kut ka ïing u Eliashib.

Ki lyngdoh kiba trei ha ka kynroh

²² Kine ki long ki lyngdoh kiba tei pat ïa kiba bun ki bynta kiba bud jong ka kynroh: Ki lyngdoh kiba dei na ka jaka sawdong ka Jerusalem ki tei ïa ka bynta kaba bud;

²³ U Benjamin bad u Hasshub ki tei ïa ka bynta kaba bud, kaba long ha khmat ki ïing jong ki. U Asaraïah, u khun jong u Maaseïah bad u ksiew jong u Ananaïah, u tei ïa ka bynta kaba bud, kaba long ha khmat ka ïing jong u.

²⁴ U Binnui, u khun jong u Henadad u tei ïa ka bynta kaba bud, naduh ka ïing u Asaraïah haduh ka dong jong ka kynroh.

^25-26 U Palal, u khun jong u Usai u tei ïa ka bynta kaba bud, kaba sdang na ka dong jong ka kynroh bad ka jingtei ap phira jong ka ïingsyiem kaba haneng kaba long habar ka jaka ap phira; U Pedaïah, u khun jong u Parosh u tei ïa ka bynta kaba bud, haduh ka bynta kaba sha mihngi hajan ka Khyrdop Um bad ka jingtei ap phira ka Templ. (Kane ka long hajan kata ka bynta jong ka nongbah ba khot Ophel, ha kaba ki nongtrei shynrang ka Templ ki shong ki sah.)

Kiwei pat ki nongtrei

²⁷ Ki rangbah ka Tekoa ki tei ïa ka bynta kaba bud, ka bynta kaba ar jong ki, naduh ka bynta kaba marpyrshah ïa ka jaka ap phira ka Templ kaba heh haduh ka kynroh hajan ka Ophel.

²⁸ Ka kynhun ki lyngdoh, ka tei ïa ka bynta kaba bud, kaba kiew shaphang shatei na ka Khyrdop Kulai, uwei uwei u tei ha khmat ka ïing jong u hi.

²⁹ U Sadok, u khun jong u Immer, u tei ïa ka bynta kaba bud, kaba long ha khmat ka ïing jong u. U Shemaïah, u khun jong u Shekanaïah, u nongpeit ïa ka Khyrdop Mihngi, u tei ïa ka bynta kaba bud.

³⁰ U Hananaïah, u khun jong u Shelemaïah bad u Hanun, u khun bahynriew jong u Salaph, u tei ïa ka bynta kaba bud, ka jingtrei kaba ar jong ki. U Meshullam, u khun jong u Berekhaïah u tei ïa ka bynta kaba bud, kaba long ha khmat ka ïing jong u.

³¹ U Malkhijah, u bania, u tei ïa ka bynta kaba bud, haduh ka ïing ba la pyndonkam da ki nongtrei shynrang ka Templ bad ki nongkhaïi, kaba don hajan ka Khyrdop Miphkad, kaba don hajan ka kamra halor ka dong jong ka kynroh kaba shaphang shatei-lam-mihngi.

³² Ki bania bad ki nongkhaïi, ki tei ïa ka bynta kaba kut eh, na ka kamra ha ka dong haduh ka Khyrdop Langbrot.