NEHEMAÏAH 2 - Khasi CL Bible (BSI)

U Nehemaïah u leit sha Jerusalem

¹ Ha kawei ka sngi, saw bnai hadien, haba u patsha Artakserksis u dang shong bam, nga leit rah ïa ka waiñ sha u. Um pat ju ïohi ïa nga ba nga imat sngewsih mynshuwa,

² kumta u ong, “Balei ba me imat sngewsih? Mem shym pang, ka lah ban long ba me don jingsngewsih.”

³ Nga la kyndit bad nga jubab, “Ko Syiem Kynrad, to im junom! Kumno ngan lah khlem imat sngewsih haba ka nongbah ha kaba la tep ïa ki kpa tymmen jong nga ka don hapdeng ki jingjot bad ïa ki khyrdop jong ka la pynjot ha ka ding?”

⁴ U patsha u kylli, “Kaei kaba me kwah?”

⁵ Nga duwai ha U Blei ka Bneng, bad nangta nga ong ha u patsha, “Lada ma me, ko syiem, me don ka jingsngewbha ïa nga bad ai sngewbha ïa ka jingkyrpad jong nga, shah ïa nga ba ngan leit sha ka ri Judah, sha ka nongbah ha kaba la tep ïa ki kpa tymmen jong nga, khnang ba nga lah ban tei pat ïa ka nongbah.”

⁶ U patsha, ryngkat bad ka mahadei kaba shong ha syndah jong u, u la mynjur ïa ka jingkyrpad jong nga. U la kylli ïa nga katno slem ngan jah bad ba ngan wan phai pat, bad nga ïathuh ha u.

⁷ Nangta nga kyrpad ïa u ban lehsbun ïa nga da kaba ai ha nga ïa ki shithi sha ki lat ka Probins Ïuphratis Kaba Shaphang Sepngi, da kaba bthah ïa ki ban shah ïa nga ban ïaid lyngba sha Judah.

⁸ Nga kyrpad ruh ïa ka shithi sha u Asaph, u nongsumar ïa ki khlaw u syiem, da kaba bthah ïa u ban ai ïa nga ki dieng na ka bynta ki khyrdop ka kut kaba ïada ïa ka Templ, na ka bynta ki kynroh ka nongbah, bad na ka bynta ka ïing kaba ngan shong ngan sah. U patsha u la ai ïa nga ïa baroh kaba nga pan, namar U Blei u la long ryngkat bad nga.

⁹ U patsha u la phah katto katne ki rangbah shipai bad shi kynhun ki nongshong kulai bad nga, bad nga leit sha ka Ïuphratis Kaba Shaphang Sepngi. Hangta nga ai ïa ki shithi u patsha ha ki lat.

¹⁰ Hynrei u Sanballat, na ka shnong Beth Horon, bad u Tobiah, u rangbah synshar jong ka probins Ammon, ki la ïohsngew ba don mano mano ba la wan ban trei na ka bynta ka jingbha jong ki Israel, bad ki la bitar haduh katta katta.

¹¹ Nga ïai bteng ïa ka jingleit sha Jerusalem,

¹² bad haduh lai sngi ngam shym ïathuh ïano ïano ïa kaei kaba U Blei u la pyrsad mynsiem ha nga ban leh na ka bynta ka Jerusalem. Nangta ha shiteng jong ka miet nga ïeng joit bad mih shabar, da kaba ïalam bad nga katto katne ngut ki paralok jong nga. U jingri uba ngi la shim u dei u kada uba nga la shong.

¹³ Ka dang long mynmiet katba nga la mihnoh na ka nongbah lyngba ka Khyrdop Them shaphang sepngi bad leit shaphang shathie da kaba ïaid lait ïa ka Umpohliew u Ïakjakor sha ka Khyrdop Synrum. Katba nga dang leit, nga khmih ïa ki kynroh ba la pra jong ka nongbah bad ki khyrdop ïa kiba la pynjot da ka ding.

¹⁴ Nangta ha ka bynta kaba shaphang mihngi jong ka nongbah, nga leit shaphang shatei sha ka Khyrdop Umpohliew bad ka Pungsum u Syiem. U kada u ba nga shong um lah ban shem kano kano ka lynti lyngba ki synrum,

¹⁵ kumta nga hiar noh sharum sha ka them Kidron bad ïaid shaphrang, da kaba peit ïa ka kynroh. Nangta nga wan phai pat na kajuh ka lynti ba nga wan bad leit phai sha ka nongbah lyngba ka Khyrdop Them.

¹⁶ Ym don na kino kino ki rangbah synshar kiba na kata ka jaka kiba la tip shano ba nga la leit bad kaei kaba nga la leh. Haduh kata ka por, ngam pat shym la ong ei ei ïano ïano ruh na ka para Jiw jong nga — ki lyngdoh, ki nongïalam, ki rangbah synshar, lane mano mano ruh u ban ïashim bynta ha ka kam.

¹⁷ Hynrei mynta nga ong ha ki, “Peit kaei ka jingeh kaba ngi don namar ka Jerusalem ka long hapdeng ka jingjot bad ïa ki khyrdop jong ka la pynjot! To ngin ïatei pat ïa ki kynroh ka nongbah bad pynkut noh ïa ka jingjahburom jong ngi.”

¹⁸ Bad nga la ong ïa ki kumno U Blei u la long ryngkat bad nga bad ïarap ïa nga, bad kaei kaba u patsha u la ong ha nga. Ki la phai ktien, “To ngin ïasdang tei pat!” Bad kumta ki la ïakhreh ban sdang ïa ka kam.

¹⁹ Haba u Sanballat, u Tobiah, bad u nong Arab uba kyrteng u Geshem ki la ïohsngew ïa kaei kaba ngi la thmu ban leh, ki rkhie ïa ngi bad ong, “Kaei kaba phi tharai phin leh? Hato phin ïaleh pyrshah ïa u patsha?”

²⁰ Nga jubab, “U Blei jong ka Bneng un ai jingjop ïa ngi. Ngi long ki shakri jong u, bad ngin sdang ïa ka jingtei. Hynrei phim don hok ïa kano kano ka jingdon ha Jerusalem, bad phim ïadon bynta ha ki riti ki dustur jong ka.”