NEHEMAÏAH 13 - Khasi CL Bible (BSI)

Ka jingpynïakhlad na ki nongwei

¹ Katba dang pule jam ïa ka Hukum u Moses ha u paidbah, ki poi ha ka bynta kaba ong ba ym dei ban shah ïa u nong Amon ne u nong Moab ban ïasnohlang bad ki briew jong U Blei.

² Kane ka long namar ki Amon bad ki Moab kim shym la ai jingbam bad um ïa ki Israel ha ka lynti ba ki mih na Ijipt. Pynban, ki la siew pisa sha u Balaam ban tim ïa ki Israel, hynrei U Blei jong ngi u la pynkylla long ïa ka jingtim sha ka jingkyrkhu.

³ Haba ki Israel ki la ïohsngew ïa ka hukum ba la pule, ki la kyntait noh ïa ki nongwei na ka imlang sahlang.

Ki jingpynthymmai u Nehemaïah

⁴ U Eliashib lyngdoh, uba khmih halor ki kamra buh tiar ka Templ, la slem u la don hapdeng ka jingïadei jingmut bad u Tobiah.

⁵ U shah ïa u Tobiah ban pyndonkam ïa ka kamra kaba heh ïa kaba la thmu tang ban buh ïa u kew jingkñia bad ka jingiwbih, ki tiar ki tar ba pyndonkam ha ka Templ, ki jingainguh na ka bynta ki lyngdoh, bad kiba shiphew na u kew, ka waiñ, bad ka umphniang Olib ba ai sha ki Lebi, ki nongtem nongput ka Templ, bad ki nongap phira ka Templ.

⁶ Katba kane ka dang long kumne, ngam shym la don ha Jerusalem, namar ha ka snem kaba laiphew ar ba u Artakserksis u long u syiem ka Babilon, nga la dei ban leit phai ban ai jingtip sha u. Hadien katto katne por, nga la ïoh jingbit

⁷ bad nga wan phai sha Jerusalem. Hangta nga la kyndit ban shem ba u Eliashib u shah ïa u Tobiah ban pyndonkam ïa ka kamra ha ka Templ.

⁸ Nga la bitar bad nga bret baroh shabar ïa ki tiar ki tar u Tobiah.

⁹ Nga ai hukum ban leh ka jinglehniam jong ka jingpynkhuid ïa ki kamra bad ïa ki tiar ki tar ka Templ, jingkñia jingbam, bad ki jingiwbih ban buh pat hangta.

¹⁰ Nga la tip ruh ba ki nongtem nongput ka Templ bad kiwei ki Lebi ki la mihnoh na Jerusalem bad poi biang sha ki jaka rep, namar ki briew kim shym la ai kaba biang ïa ki ban im.

¹¹ Nga la sneng ïa ki rangbah synshar namar ba ki la ailad ban leh bymsuidñiew ïa ka Templ. Bad nga la wallam biang ïa ki Lebi bad ki nongtem nongput sha ka Templ bad buh biang ïa ki ha ka kam.

¹² Nangta baroh ki Israel ki sdang wanrah biang sha ki kamra buh tiar ïa kiba shiphew na u kew jong ki, ka waiñ, bad ka umphniang Olib.

¹³ Nga buh ïa kine ki rangbah ban khmih ïa ki kamra buh tiar: U Shelemaïah, u lyngdoh; u Sadok, u riewstad ka Hukum; bad u Pedaïah, u Lebi. U Hanan, u khun jong u Sakkur bad u ksiew jong u Mattanaïah, u long u nongïarap jong ki. Nga tip nga lah ban shaniah ïa kine ki rangbah ban lehhok ha kaba sam ïa ki mar sha ki para ba-ïatrei lang.

¹⁴ To kynmaw, A Blei jong nga, ïa baroh kine kiei kiei kiba nga la leh na ka bynta ka Templ jong me bad ka jingmane jong ka.

¹⁵ Ha kata ka por, nga ïohi ba ki briew ha Judah ki khñiot umsoh na ki sohwaiñ ha ka sngi Sabbaton. Kiwei pat ki dang kyntiew halor ki kada jong ki ïa u kew, ka waiñ, sohwaiñ, soh Khajur, bad kiwei kiei kiei bad leit rah ïa ki sha Jerusalem; nga la maham ïa ki ban ym die ei ei ha ka sngi Sabbaton.

¹⁶ Katto katne ki rangbah na ka nongbah Tyros ki shong ki sah ha Jerusalem, bad ki wanrah dohkha bad baroh ki jait mar sha ka nongbah ban die ha ki briew jong ngi ha ka sngi Sabbaton.

¹⁷ Nga la sneng ïa ki nongïalam Jiw bad ong, “Peit ïa kaba sniew kaba phi leh! Phi pyntngit ïa ka sngi Sabbaton.

¹⁸ Kane ka dei ka daw balei ba U Blei u la pynshitom ïa ki kpa tymmen jong phi mynba u wanrah ka jingjot halor kane ka nongbah. Bad pynban, phi pan kwah ba U Blei un phah shuh shuh ka jingbitar halor ka Israel da kaba pyntngit ïa ka sngi Sabbaton.”

¹⁹ Kumta nga la ai hukum ban khang ïa ki khyrdop ka nongbah ha kaba sdang jong kawei pa kawei ka sngi Sabbaton, tang shu sdang ka por janmiet, bad ban ym plie biang haduh ba ka sngi Sabbaton ka la kut. Nga la pynap katto katne ki rangbah jong nga ha ki khyrdop ban pynthikna ban ym don jingwanrah ei ei shapoh ka nongbah ha ka sngi Sabbaton.

²⁰ Shisien ne ar sien ki nongkhaïi kiba die bun jait ki tiar ki pynlut ïa ka miet shuwa ka sngi Sabbaton shabar ki kynroh ka nongbah.

²¹ Nga maham ïa ki, “Kam myntoi ban ap hangto habar ki kynroh ka nongbah na ka bynta ka step ka ban wan. Lada phi pyrshang biang ïa kane, ngan pyndonkam da ka bor pyrshah ïa phi.” Naduh kata, kim ju wan shuh ha ka sngi Sabbaton.

²² Nga la hukum ïa ki Lebi ban pynkhuid ïa lade bad ban leit bad pahara ïa ki khyrdop ban pynthikna ba ïa ka sngi Sabbaton la sumar khuid ïa ka. Kynmaw ïa nga, A Blei, na ka bynta kane ruh, bad tyngkai ïa nga namar ka jingieit bakhraw jong me.

²³ Ha kata ka por, nga shem ruh ba bun na ki rangbah Jiw ki la shongkurim ïa ki kynthei na Ashdod, Ammon, bad Moab.

²⁴ Shiteng na ki khun jong ki, ki kren ïa ka ktien Ashdod lane ïa kiwei ki ktien bad kim tip kumno ban kren ïa ka ktien jong ngi.

²⁵ Nga la sneng ïa ki rangbah, nga la tim ïa ki, shoh ïa ki bad pajut ïa u shñiuh jong ki. Nangta nga la pynlong ïa ki ban smai ha ka kyrteng U Blei ba kim dei shuh ba ma ki ne ki khun jong ki kin shongkha khleh bad ki nongwei.

²⁶ Nga la ong, “Ka dei na ka daw ki kynthei nongwei ba u syiem Solomon u la leh pop. U la long u briew uba kham khraw ban ïa uno uno na ki syiem jong kiwei ki jaitbynriew. U Blei u la ieit ïa u bad pynlong syiem ïa u halor ki Israel, bad pynban u hap ha kane ka pop.

²⁷ Hato ka dei ïa ngi ban bud ïa ka nuksa jong phi bad ban ym kohnguh ïa U Blei jong ngi da kaba shongkurim ïa ki kynthei nongwei?”

²⁸ U Joïada u dei u khun jong u Eliashib u Rangbah Lyngdoh, hynrei uwei na ki khun jong u Joïada u la shongkurim ïa ka khun jong u Sanballat na ka shnong Beth Horon, kumta nga la pynlong ba u Joïada un mihnoh na Jerusalem.

²⁹ To kynmaw, A Blei, kumno kito ki briew ki la pyntngit ïa baroh ar, ka jinglong lyngdoh bad ka jutang kaba me la pynlong bad ki lyngdoh bad ki Lebi.

³⁰ Nga pynkhuid ïa ki briew na kiei kiei kiba long nongwei: nga pynkhreh ki jingbuhbeit ryntih na ka bynta ki lyngdoh bad ki Lebi khnang ba uwei pa uwei un tip ïa la ka kamram;

³¹ nga pynkhreh ïa ki diengthang na ka bynta ki jingainguh thang ban wallam ha ki por ba la buh, bad na ka bynta ki briew ban wallam ki jingainguh da u kew banyngkong bad ki soh kiba ih nyngkong. To kynmaw ïa kane baroh, A Blei, bad to kyrkhu ïa nga.