NEHEMAÏAH 12 - Khasi CL Bible (BSI)

Ka thup kyrteng ki lyngdoh bad ki Lebi

^1-9 Kane ka long ka thup jong ki lyngdoh bad ki Lebi kiba la wan phai na ka jingshah ringmraw ryngkat u Serubbabel u khun jong u Shealtiel bad u Joshua u Rangbah Lyngdoh: Ki Lyngdoh: U Seraïah, u Jeremaïah, u Esra, U Amaraïah, u Mallukh, u Hattush, U Shekanaïah, u Rehum, u Meremoth, U Iddo, u Ginnethoi, u Abijah, U Mijamin, u Maadaïah, Bilgah, U Shemaïah, u Joïarib, u Jedaïah, U Sallu, u Amok, u Hilkaïah bad u Jedaïah. Kine ki rangbah ki long ki nongïalam hapdeng baroh ki para lyngdoh ha ki sngi u Joshua. Ki Lebi: Kine ki long kiba khmih halor ka jingrwai ïa ki jingrwai jong ka jingainguh: u Jeshua, u Binnui, u Kadmiel, u Sherebaïah u Judah bad u Mattanaïah. Kine ki pynlong ïa ka kynhun rwai kaba rwai-jubab kylliang: u Bakbukaïah u Unno bad ki para Lebi jong ki.

Ki khun ki ksiew jong u Joshua u Rangbah Lyngdoh

¹⁰ U Joshua u long u kpa jong u Joïakim; u Joïakim u long u kpa jong u Eliashib; u Eliashib u long u kpa jong u Joïada;

¹¹ u Joïada u long u kpa jong u Jonathan; bad u Jonathan u long u kpa jong u Jaddua.

Ki rangbah kur lyngdoh

^12-21 Haba u Joïakim u long Rangbah Lyngdoh, kine ki lyngdoh ki long ki rangbah kur lyngdoh: Lyngdoh Kur Meraïah Seraïah. Hananaïah Jeremaïah. Meshullam Esra. Jehohanan Amaraïah. Jonathan Mallukhi. Joseph Shebanaïah. Adna Harim. Helkai Meraïoth. Sekharaïah Iddo. Meshullam Ginnethon. Sikhri Abijah. ... Miniamin. Piltai Moadaïah. Shammua Bilgah. Jehonathan Shemaïah. Mattenai Joïarib. Ussi Jedaïah. Kallai Sallai. Eber Amok. Hashabaïah Hilkaïah. Nethanel Jedaïah.

Lyngdoh Kur Ka jingbuh jingthoh ïa ki longïing lyngdoh bad Lebi

²² Ïa ka jingbuh jingthoh ïa ki khlieh jong ki longïing ki Lebi bad ki longïing ki lyngdoh, la buh ha ki por jong kine ki Rangbah Lyngdoh: U Eliashib, u Joïada, u Jonathan, bad u Jaddua. Ïa kane ka jingbuh jingthoh la pyndep mynba u Darius u long u patsha jong ka Persia.

²³ Ïa ki khlieh jong ki longïing ki Lebi pat, la buh jingthoh tang ha ki jingthoh sorkar haduh ka por u Jonathan, u ksiew jong u Eliashib.

Ka jingbuhbeit ïa ki kam ha ka Templ

²⁴ Hapoh ka jingpynïaid u Hashabaïah, u Sherebaïah, u Jeshua, u Binnui bad u Kadmiel, ïa ki Lebi la buh ha ki kynhun kynhun. Ar kynhun ki rwai ïaroh ïa U Blei da kaba ïarwai-jubab kylliang ha kajuh ka por bad rwai ki jingainguh sha U, kat kum ki jingbthah ba la ai da u syiem Dabid, u briew jong U Blei.

²⁵ Kine ki nongap phira ka Templ ki khmih ïa ka jingpahara ïa ki kamra buh jingbuh hajan ki khyrdop ka Templ: U Mattanaïah, u Bakbukaïah, u Obadaïah, u Meshullam, u Talmon bad u Akkub.

²⁶ Kine ki briew ki im ha ka por u Joïakim, u khun jong u Joshua bad u ksiew jong u Jehosadak, bad ha ka por u Nehemaïah, u lat, bad ha ka por u Esra, u lyngdoh uba long u riewstad ka Hukum.

U Nehemaïah u pynkyntang ïa ka kynroh ka nongbah

²⁷ Haba ïa ka kynroh ka nongbah la pynkyntang, ïa ki Lebi la wallam shapoh na ki jaka ba ki ïashong ïasah, khnang ba ki lah ban ïadon bynta ha ka jinglehkmen jong ka jingpynkyntang ryngkat bad ki jingrwai jong ka jingainguh bad ki jingtem jong ki shakuriaw bad ki duitara.

²⁸ Ki longïing ki Lebi kiba rwai ki la ïalumlang na ka jaka ba ki la sah sawdong ka Jerusalem bad na ki shnong sawdong ka Netophah,

²⁹ bad na Bethgilgal, Geba, bad Asmabeth.

³⁰ Ki lyngdoh bad ki Lebi ki la leh ïa ka jinglehniam jong ka jingpynkhuid na ka bynta ïa lade, ïa ki briew, ïa ki khyrdop bad ïa ka kynroh ka nongbah.

³¹ Nga la ïalumlang ïa ki nongïalam jong ka Judah halor jong ka kynroh bad buh ïa ki ban khmih halor ki ar kynhun kiba heh ba kin ïaid sawdong ka nongbah, ryngkat bad ki jingainguh sha U Blei. Kaba nyngkong ka kynhun ka leit shaphang kamon halor ka kynroh shaphang ka Khyrdop Synrum.

³² U Hoshaïah u ïaid nadien ki nongrwai, ba la bud da shiteng ki nongïalam ka Judah.

^33-35 Kine ki lyngdoh, ryngkat ka jingput turoi, ki bud nadien: U Asaraïah, u Esra, u Meshullam, u Judah, u Benjamin, u Shemaïah bad u Jeremaïah. Nangta bud sa u Sekharaïah, u khun jong u Jonathan bad u ksiew jong u Shemaïah. (Ki kpa tymmen jong u ruh ki kynthup ïa u Mattanaïah, u Mikaïah, bad u Sakkur, jong ka kur Asaph.)

³⁶ La bud ïa u da kiwei pat ki dkhot jong ka kur jong u — u Shemaïah, u Asarel, u Milalai, u Gilalai, u Maai, u Nethanel, u Judah bad u Hanani — baroh kiba rah ïa ki jingput jingtem ba la pyndonkam da u syiem Dabid, u briew jong U Blei. U Esra, u riewstad, u ïalam ïa kane ka kynhun ha ka jingïaid paidbah.

³⁷ Ha ka Khyrdop Umpohliew, kaba ïaid lait ïa ka ïingsyiem jong u Dabid, ki kiew ïa ki mawjam kiba ïalam sha ka Nongbah u Dabid, bad wan phai biang sha ka kynroh ha ka Khyrdop Um, kaba shaphang mihngi jong ka nongbah.

³⁸ Kawei pat ka kynhun jong kito kiba ainguh, ki leit shaphang kadiang nalor ka kynroh, bad nga bud ryngkat bad shiteng ki briew. Ngi ïaid lait ïa u Mot jong ka Obens sha ka Kynroh Baïar,

³⁹ bad nangta ngi ïaid lait ïa ka Kynroh Ephraim, ka Kynroh Jeshanah, ka Kynroh Dohkha, u Mot Hananel, bad u Mot Shispah sha ka Khyrdop Langbrot. Ngi pynkut ïa ka jingïaid jong ngi hajan ka khyrdop sha ka Templ.

⁴⁰ Kumta baroh ar ki kynhun kiba ainguh ïa U Blei ki la poi ha ka jaka ka Templ. Nalor ki nongïalam kiba ïadon lang bad nga,

⁴¹ ka kynhun jong nga ka kynthup ïa kine ki lyngdoh, kiba put ïa ki turoi: U Eliakim, u Maaseïah, u Miniamin, u Mikaïah, u Elioenai, u Sekharaïah, bad u Hananaïah;

⁴² bad la bud da u Maaseïah, u Shemaïah, u Eleasar, u Ussi, u Jehohanan, u Malkhijah, u Elam, bad u Eser. Ki nongrwai, ba la ïalam da Jesrahaïah, ki la rwai bad pynjam ïa ki sur jong ki.

⁴³ Ha kata ka sngi, la pynlong bun ki jingkñia, bad u paidbah u la dap da ka jingkmen namar U Blei u la pynlong ïa ki ban kmen haduh katta katta. Ki kynthei bad ki khynnah ki la ïasnohlang ha ka jinglehkmen, bad ïa ka jingsawa kaba ki la pynlong, la ïohsngew shaduh sha jngai bah.

Ka jingpynbiang na ka bynta ka jingmane ha ka Templ

⁴⁴ Ha kata ka por, la buh ïa ki rangbah ban khmih ïa ki kamra buh tiar ha kiba ïa ki jingai sngewbha na ka bynta ka Templ la buh, kynthup ïa kiba shiphew bad ïa u kew banyngkong bad u soh uba ih nyngkong man ka snem. Kine ki rangbah ki kitkhlieh na ka bynta ka jinglum na ki kper hajan ki nongbah ba bun, ïa ki jingai sngewbha na ka bynta ki lyngdoh bad ki Lebi, kiba ka Hukum ka dawa. Baroh ki briew ka Judah ki la sngewkmen ïa ki lyngdoh bad ki Lebi,

⁴⁵ namar ba ki la pyndep ïa ki jinglehniam jong ka jingpynkhuid bad ïa kiwei ki jinglehniam kiba U Blei u la hukum. Ki nongtem nongput ka Templ bad ki nongap phira ka Templ ruh ki la leh ïa la ki kamram kat kum ki jingbuhbeit ryntih ba la buh da u syiem Dabid bad u Solomon u khun jong u.

⁴⁶ Naduh ka por u syiem Dabid bad u nongtem nongput, u Asaph, slem mynshuwa, ki nongtem nongput ki ïalam ïa ki jingrwai jong ka jingïaroh bad jingainguh sha U Blei.

⁴⁷ Ha ka por u Serubbabel bad ha ka por u Nehemaïah ruh, baroh ki Israel ki ai ki jingai sngewbha man ka sngi na ka bynta ka jingkyrshan ïa ki nongtem nongput ka Templ bad ki nongap phira ka Templ. Ki briew ki ai ki jingai bakyntang sha ki Lebi, bad ki Lebi ki ai ka bynta badonkam sha ki lyngdoh.