NEHEMAÏAH 11 - Khasi CL Bible (BSI)

Ki briew kiba shong basah ha Jerusalem

¹ Ki nongïalam ki la shong la sah ha Jerusalem, bad kiba sah na ki briew, ki la kynting sbai ban jied kawei ka longïing na man ki shiphew tylli ki longïing ban leit shong leit sah ha ka nongbah bakhuid jong ka Jerusalem, katba kiwei pat kiba sah kin shong kin sah ha kiwei pat ki nongbah bad ki shnong.

² Ki briew ki ïaroh ïano ïano ba leit mon sngewbha ban shong ban sah ha Jerusalem.

^3-8 Ha kiwei pat ki shnong bad ki nongbah, ki Israel, ki lyngdoh, ki Lebi, ki nongtrei ka Templ bad ki khun ki ksiew jong ki nongtrei u Solomon, ki shong ki sah ha ki jaka la jong ha ki shnong jong ki. Kane ka long ka thup jong ki nongshong shnong bapawkhmat jong ka probins jong ka Judah kiba shong basah ha Jerusalem: Ki dkhot jong ka jait Judah: U Athaïah, u khun jong u Ussaïah bad u ksiew jong u Sekharaïah. Kiwei pat ki kpa tymmen ki kynthup ïa u Amaraïah, u Shephataïah, bad u Mahalalel, ki khun ki ksiew u Peres, u khun jong u Judah. U Maaseïah, u khun jong u Barukh bad u ksiew jong u Kolhoseh. Kiwei ki kpa tymmen ki kynthup ïa u Hasaïah, u Adaïah, u Joïarib bad u Sekharaïah, ki khun ki ksiew jong u Shelah, u khun jong u Judah. Na ki khun ki ksiew u Peres, sawspah hynriewphew phra ngut ki rangbah bapawkhmat ki shong ki sah ha Jerusalem. Ki dkhot jong ka jait Benjamin: U Sallu, u khun jong u Meshullam bad u ksiew jong u Joed. Kiwei ki kpa tymmen jong u ki kynthup ïa u Pedaïah, u Kolaïah, u Maaseïah, u Ithiel bad u Jeshaïah. U Gabbai bad u Sallai, ki long ki ba-ha-ïing bajan jong u Sallu. Ha baroh, Khyndaispah arphew phra ngut ki Benjamin ki shong ki sah ha Jerusalem.

^9-19 U Joel u khun jong u Sikhri u long u nongïalam jong ki, bad u Hassenuah u khun jong u Judah, u rangbah synshar uba kham slem ha ka jingtrei, u long uba ar ha ka kyrdan ha ka nongbah. Ki lyngdoh: U Jedaïah u khun jong u Joïarib, bad u Jakhin. U Seraïah, u khun jong u Hilkaïah bad u ksiew jong u Meshullam. Ki kpa tymmen jong u ki kynthup ïa u Sadok, u Meraïoth bad u Ahitub, uba long u Rangbah Lyngdoh. Ha baroh, phraspah arphew ar ngut ki dkhot jong kane ka kur ki shakri ha ka Templ. U Adaïah, u khun jong u Jeroham bad u ksiew jong u Pelaïah. Ki kpa tymmen jong u ki kynthup ïa u Amsi, u Sekharaïah, u Pashhur, bad u Malkhijah. Ha baroh, arspah sawphew ar ngut ki dkhot jong kane ka kur ki long ki khlieh jong ki longïing. U Amashsai, u khun jong u Asarel bad u ksiew jong u Ahsai. Ki kpa tymmen jong u ki kynthup ïa u Meshillemoth bad u Immer. Ki don shispah arphew phra ngut ki dkhot jong kane ka kur kiba long ki shipai bapawnam. U nongïalam jong ki u long u Sabdiel, u dkhot jong ka longïing bapawkhmat. Ki Lebi: U Shemaïah, u khun jong u Hasshub bad u ksiew jong u Asrikam. Ki kpa tymmen jong u ki kynthup ïa u Hashabaïah bad u Bunni. U Shabbethai bad u Josabad, ki Lebi bapawkhmat kiba khmih ïa ka kam ba dei shabar ka Templ. U Mattanaïah, u khun jong u Mika bad u ksiew jong u Sabdi, uba hiarpateng na u Asaph. U la ïalam ïa ka kynhun rwai ka Templ ha kaba rwai ïa ka jingduwai jong ka jingainguh. U Bakbukaïah, u long u nongïarap jong u Mattanaïah. U Abda, u khun jong u Shammua bad u ksiew jong u Galal, uba hiarpateng na u Jeduthun. Ha baroh, arspah phraphew saw ngut ki Lebi ki shong ki sah ha ka nongbah bakhuid jong ka Jerusalem. Ki nongap phira ka Templ: U Akkub, u Talmon, bad ki ba-ha-ïing ha-sem; ha baroh, ki don shispah hynñiewphew ar ngut.

²⁰ Kiba sah na ki Israel bad kiba sah na ki lyngdoh bad ki Lebi, ki shong ki sah ha la ki jong ki jaka ha kiwei ki nongbah bad ki shnong jong ka Judah.

²¹ Ki nongtrei shynrang ka Templ ki shong ki sah ha ka bynta ka Jerusalem ba la khot ka Ophel bad ki trei hapoh ka jingkhmih u Siha bad u Gishpa.

²² U nongkhmih jong ki Lebi kiba shong basah ha Jerusalem u long u Ussi, u khun jong u Bani bad u ksiew jong u Hashabaïah. Ki kpa tymmen jong u ki kynthup ïa u Mattanaïah bad u Mika bad u long na ka kur u Asaph, ka kur kaba kitkhlieh na ka bynta ka put ka tem ha ki jingïaseng ha ka Templ.

²³ Ki don ki jingbuhbeit ryntih na ka liang u syiem kumno ba ki kur ki dei ban ïa-bujli ha kaba ïalam ha ka put ka tem ha ka Templ man la ka sngi.

²⁴ U Pethahaïah u khun jong u Meshesabel na ka kur Serah bad ka jait Judah, u mihkhmat ïa ki Israel ha ka ïingsyiem Persia.

Ki briew ha kiwei pat ki shnong bad ki nongbah

²⁵ Bun na ki briew ki shong ki sah ha ki shnong hajan ki jaka rep. Kito kiba long na ka jait Judah ki shong ki sah ha Kiriath Arba, Dibon, bad Jekabseel, bad ha ki nongrit hajan kine ki nongbah.

²⁶ Ki shong ki sah ruh ha ki nongbah Jeshua, Moladah, Bethpelet,

²⁷ bad Hasarshual, bad ha Beersheba bad ki nongrit sawdong jong ka.

²⁸ Ki shong ki sah ha ka nongbah Siklag, ha Mekonah bad ha ki nongrit,

²⁹ ha Enrimmon, ha Sorah, ha Jarmuth,

³⁰ ha Sanoah, ha Adullam, bad ha ki nongrit hajan kine ki shnong. Ki shong ki sah ha Lakhish bad ha ki jaka rep kiba hajan, bad ha Asekah bad ki nongrit jong ka. Kata ka long kum ban ong, ki briew jong ka Judah ki shong ki sah ha ka ri hapdeng ka Beersheba shaphang shathie bad ka Them Hinnom shaphang shatei.

³¹ Ki briew jong ka jait Benjamin ki shong ki sah ha Geba, Mikhmash, Ai, Bethel bad ki nongrit ba-marjan,

³² Anathoth, Nob, Ananaïah,

³³ Hasor, Ramah, Gittaim,

³⁴ Hadid, Seboim, Neballat,

³⁵ Lod, bad Ono, bad ha ka Them ki Nong-ohdur.

³⁶ Ïa ki katto katne ki kynhun jong ki Lebi kiba la shong la sah ha ka ri Judah, la pynbeit ba kin shong kin sah bad ki Benjamin.