NEHEMAÏAH 10 - Khasi CL Bible (BSI)

^1-27 Uba nyngkong ban soi u dei u lat, u Nehemaïah u khun jong u Hakalaïah, bad nangta u Sedekaïah u soi. Kine harum ruh ki soi: Ki lyngdoh: U Seraïah, u Asaraïah, u Jeremaïah, U Pashhur, u Amaraïah, u Malkhijah, U Hattush, u Shebanaïah, u Mallukh, U Harim, u Meremoth, u Obadaïah, U Daniel, u Ginnethon, u Barukh, U Meshullam, u Abijah, u Mijamin, U Maasaïah, u Bilgai bad u Shemaïah. Ki Lebi: U Jeshua, u khun jong u Asanaïah, U Binnui jong ka kur Henadad, U Kadmiel, u Shebanaïah, u Hodaïah, U Kelita, u Pelaïah, u Hanan, U Mika, u Rehob, u Hashabaïah, U Sakkur, u Sherebaïah, u Shebanaïah, U Hodaïah, u Bani, bad u Beninu. Ki nongïalam u paidbah: U Parosh, u Pahath Moab, U Elam, u Sattu, u Bani, U Bunni, u Asgad, u Bebai, U Adonijah, u Bigbai, u Adin, U Ater, u Hesekaïah, u Assur, U Hodaïah, u Hashum, u Besai, U Hariph, u Anathoth, u Nebai, U Makpiash, u Meshullam, u Hesir, U Meshesabel, u Sadok, u Jaddua, U Pelataïah, u Hanan, u Anaïah, U Hoshea, u Hananaïah, u Hasshub, U Hallohesh, u Pilha, u Shobek, U Rehum, u Hashabnah, u Maaseïah, U Ahaïah, u Hanan, u Anan, U Mallukh, u Harim, bad u Baanah.

Ka Jingïakut

²⁸ Ma ngi, u paid Israel, ki lyngdoh, ki Lebi, ki nongap phira ka Templ, ki nongput nongtem ka Templ, ki nongtrei ka Templ, bad baroh kiwei pat kiba ha ka jingkohnguh ïa ka Hukum U Blei, ki la pynkhlad ïa lade na ki nongwei kiba shong ha ka ri jong ngi; ma ngi, ryngkat bad ki tnga jong ngi bad baroh ki khun jong ngi kiba la lah ban sngewthuh,

²⁹ hangne ngi ïasnohlang bad ki nongïalam jong ngi ha ka jingbam-smai, hapoh ka jingpynshitom jong ka jingtim, lada ngi pynkheiñ ïa ka, ba ngin im kat kum ka Hukum U Blei, kaba U Blei u la ai lyngba u shakri jong u, u Moses; ba ngin kohnguh ïa baroh kaba U Trai, U Trai jong ngi, u hukum ïa ngi; bad ba ngin sumar ïa baroh ki hukum bad ki jingkwah jong u.

³⁰ Ngin ym ïashongkha khleh bad ki nongwei kiba shong ha ka ri jong ngi.

³¹ Lada ki nongwei ki wallam kew lane kano kano ban die ha ngi ha ka sngi Sabbaton lane ha kano kano ka sngi khuid, ngin ym thied na ki. Ngin ym trei lyngkha ha man ka snem kaba hynñiew, bad ngin pyndam noh ïa ki ram baroh.

³² Man ka snem, uwei pat uwei na ngi, ngin synñiang san gram ka rupa ban ïarap ha kaba siew ïa ki jinglut jingsep jong ka Templ.

³³ Ngin pynbiang na ka bynta ka jingmane ha ka Templ ïa kine: u kpu bakyntang, ka jingkñia-bam ba man ka sngi, ki mrad ban thang man ka sngi kum ki jingkñia, ki jingkñia bakyntang na ka bynta ki sngi Sabbaton, ki jingkñia Bnai Thymmai bad kiwei ki jingkñia, kiwei kiwei ruh ki jingkñia bakyntang, ki jingkñia ban map noh ïa ki pop ki Israel, bad ïa kiei kiei ruh kiba donkam na ka bynta ka Templ.

³⁴ Ma ngi, ki paidbah, ki lyngdoh, ki Lebi, ngin kynting sbai man ka snem ban jied kino ki kur kin pynbiang ki dieng ban thang jingkñia ban ai sha U Trai U Blei jong ngi, kat kum ki jingdonkam ka Hukum.

³⁵ Ngin leit rah sha ka Templ man ka snem, ka jingkñia u kew banyngkong ba ngi lum bad u soh nyngkong uba ih ha ki dieng jong ngi.

³⁶ Ïa u khun nyngkong ba kha ha ngi, ngin leit rah sha ki lyngdoh ka Templ, kumba donkam da ka Hukum, ngin pynkyntang ïa u sha U Blei. Ngin pynkyntang ruh ïa uwei pa uwei u khun masi banyngkong jong ngi, bad ïa uwei pa uwei u khunlangbrot bad uwei pa uwei u khunblang jong ngi.

³⁷ Ngin leit rah sha ki lyngdoh ha ka Templ ïa u kpu im jong u kew ba la lum nyngkong jong kawei pa kawei ka snem bad kiwei ki jingkñia waiñ, umphniang Olib bad baroh ki jait soh. Ngin leit rah sha ki Lebi, kiba lum ïa kiba shiphew na ki jaka rep ha ki nongrit, kiba shiphew na ki jingthung kiba mih ha ka ri jong ngi.

³⁸ Ki lyngdoh kiba hiarpateng na u Aaron kin don bad ki Lebi ha ka por ba lum ïa kiba shiphew, bad na ka bynta ka jingpyndonkam ha ka Templ, ki Lebi kin rah sha ki kamra buh tiar ka Templ ïa kawei-na-kaba-shiphew na baroh kiba shiphew ba ki lum.

³⁹ Ki Israel bad ki Lebi kin rah ïa ki jingai sngewbha, u kew, ka waiñ bad ka umphniang Olib, sha ki kamra buh tiar kiba don ki khiew ka Templ bad ha kaba ki lyngdoh kiba don ha ka jingtreikam, ki nongap phira ka Templ bad ki dkhot ka kynhun nongrwai ka Templ, ki don ki jaka shong jaka sah. Ngin ym iehnoh khlem sumar bha ïa ka ïing U Blei jong ngi.