NEHEMAÏAH 1 - Khasi CL Bible (BSI)

¹ Kane ka dei ka jingbuh jingthoh ïa kaei kaba u Nehemaïah u khun jong u Hakalaïah u la pyndep. Ha u bnai Kisleb jong ka snem kaba arphew ba u Artakserksis u long u patsha ka Persia, ma nga, u Nehemaïah, nga don ha ka nongbah jong ka hima, ka Susa.

Ka jingsngewkhia u Nehemaïah ïa ka Jerusalem

² U Hanani, uwei na kiba shi para bad nga, u wan poi na Judah ryngkat bad ka kynhun jong kiwei pat ki rangbah, bad nga kylli ïa ki shaphang ka Jerusalem bad shaphang ki para Jiw jong ngi kiba la leit phai na ka jingshah ringmraw ha Babilon.

³ Ki ïathuh ïa nga ba kito kiba dang im bad kiba la poi biang ha la ka jong ka ri, ki don hapdeng ka jingeh bakhraw bad ba ki nongwei kiba shong basah marjan, ki peitbeiñ ïa ki. Ki ïathuh ruh ïa nga ba ki kynroh ka Jerusalem ki la pra bad ba ïa ki khyrdop ym shym la pynbha pat naduh ka por ba la thang ïa ki.

⁴ Haba nga ïohsngew ïa kane baroh, nga shong bad nga ïam. Bun sngi nga la sngewsih bad ngam shym bam.

⁵ Nga duwai ha U Blei, “A Trai U Blei jong ka bneng! Me long uba khraw, ngi ïeng ha ka jingsheptieng ïa me. Me batskhem ïa la ka jutang bad kito kiba ieit ïa me bad kiba leh ïa kaei kaba me hukum.

⁶ Khmih ïa nga, ko Trai, bad to sngew ïa ka jingduwai jong nga, katba nga duwai mynsngi bad mynmiet na ka bynta ki shakri jong me, ki briew ka Israel. Nga phla ba ma ngi, ki briew ka Israel, ngi la leh pop. Ki kpa tymmen jong nga bad ma nga, ngi la leh pop.

⁷ Ngi la leh bymman pyrshah ïa me bad ngim shym la leh ïa kaei kaba me la hukum. Ngim shym la sumar ïa ki hukum kiba me la ai ha ngi lyngba u Moses, u shakri jong me.

⁸ To kynmaw mynta kaei kaba me la ong ha u Moses: ‘Lada ma phi ki briew ka Israel phin ym ïaineh ha nga, ngan pynsakma ïa phi hapdeng kiwei ki jaitbynriew.

⁹ Hynrei lada phi phai pat sha nga bad leh ïa kaei kaba nga hukum ïa phi, ngan wallam pat ïa phi sha ka jaka sha kaba nga la jied ban mane ïa nga, wat la ïa phi la pynsakma sha kiba kut ka pyrthei.’

¹⁰ “Ko Trai, kine ki dei ki shakri jong me, ki briew jong me hi. Me la pyllait ïa ki da ka bor bakhraw bad ka jingkhlaiñ jong me.

¹¹ To shahshkor mynta ïa ka jingduwai jong nga bad ïa ki jingduwai jong baroh kiwei pat ki shakri jong me kiba kwah ban ai ïa me ka burom. Ai ïa ka jingjop mynta ka sngi bad pynlong ba u patsha un leh-isynei ïa nga.” Ha kita ki sngi nga la long u nongrah waiñ jong u patsha.