NAHUM 3 - Khasi CL Bible (BSI)

¹ Long kaba la tim ka nongbah kaba pynïap bad kaba lamler, kaba dap da ka spah ban shah lute bad shah kurup!

² To shahshkor! Ka jingsawa u shabuk, ka jingriew ki shalyntem, ka jingsawa ka jingïaid ki kulai, ka jingkynthih jong ki kali ïapom!

³ Ki nongshong kulai ki kynha, ki waitlam ki thaba, ki sum ki phalang! ïa ki metïap la kynton shajrong, ki metïap bym don jingkheiñ — ki briew ki jynthut halor jong ki!

⁴ Ïa ka Ninebeh, ka nuti la nang pynshitom. Kaba khring bad kaba dap da ki jingpynshohbieit kiba ma, ka la pynshohbieit ïa ki jaitbynriew bad ka la ringmraw ïa ki.

⁵ U Trai Badonbor Baroh u ong, “Ngan pynshitom ïa pha, ko Ninebeh! ngan sloit lyngkhuit ïa pha bad ngan shah ïa ki jaitbynriew ban ïohi ïa pha, ban ïohi ïa pha ha ka jinglehrain jong pha baroh.

⁶ Ngan leh ïa pha khlem ka jingñiewkor bad tap ïa pha da ka jakhlia. Ki briew kin khmih ïa pha ha ka jingsngew shyrkhei.

⁷ Baroh kiba ïohi ïa pha kin kynran dien. Kin ong, ‘Ka Ninebeh ka don ha ki jingjot! Mano ba don kano kano ka jingisynei ïa ka? Mano ba kwah ban pyntngen ïa ka?’ ”

⁸ Ko Ninebeh, hato pha kham bha ban ïa ka Thebes, ka nongbah jong ka Ijipt? Ma ka ruh ka la don ka wah ban ïada ïa ka kum ka kynroh — Ka wah Nile ka la long kum ka jingker jong ka.

⁹ Ka la synshar ïa ka Sudan bad ïa ka Ijipt, ym don pud ïa ka bor jong ka; ka Libya ka la long ka paralok jong ka.

¹⁰ Pynban ïa ki briew jong ka Thebes la rah noh sha ka jinglongmraw. Ha kawei pa kawei ka kyndong jong ka lynti bah ïa ki khun jong ki la tied pynïap. Ïa ki rangbah bapawkhmat jong ki la ïalam noh ha ki kynjri bad la pynïabynta hapdeng ki nongkurup.

¹¹ Ko Ninebeh, pha ruh phan hap ha ka jingbuaid bymtip briew! Pha ruh phan pyrshang ban lait phet na ki nongshun jong pha.

¹² Baroh ki kut jong pha kin long kum ki diengsoh Dumbur bad ki soh Dumbur ba la ih: Khynñiuh ïa ki dieng bad ki soh kin hap beit hapoh ka shyntur jong pha!

¹³ Ki shipai jong pha ki long kum ki kynthei, bad ka ri jong pha ka ïeng khlem ka jingïada ha khmat ki nongshun jong pha. Ka ding kan pynjot ïa ki dieng khang khyrdop jong pha.

¹⁴ To tong ïa ka um ban pynkhreh na ka bynta ka jingshah kerkut, bad to pynkhlaiñ ïa ki kut jong pha! To ïuh ïa ka dewbyrtha ban shna ïa ki maw-it, bad to pynkhreh ïa ki tiar shna maw-it!

¹⁵ Kam pher kaei pha leh, ïa pha hi yn thang pynïap lane yn pynïap ha ka thma. Yn weng noh ïa pha kum ki jingthung ba la bam noh da ki puit. Pha la roi kum ki puit!

¹⁶ Pha pynmih bun ki nongkhaïi ban ïa ka jingbun ki khlur ha ka sahit bneng! Hynrei mynta ki jah noh, kum ki puit kiba pyiar la ki thapniang bad ki her noh.

¹⁷ Ki rangbah pynïaidkam jong pha ki long kum ka kynhun ki puit kiba dem ha ka kynroh ha ka sngi kaba khriat. Hynrei haba ka sngi ka mih, ki her noh, bad ym don mano mano batip shano ki la jah noh!

¹⁸ Ko Patsha ka Assyria, ki lat jong me ki la ïap, bad ki rangbah donburom jong me ki ïohthiah junom! Ïa ki briew jong me la pynsakma halor ki lumbah, bad ym don shuh mano mano ban wallam pat ïa ki sha ïing.

¹⁹ Ym don jingpynkoit ei ei ïa ki jingmynsaw jong me, bad ïa ki jingmong jong me ym lah ban pynkoit. Baroh kito kiba ïohsngew ïa ka khubor shaphang ka jingpynjot ïa me ki thap ïa la ki kti ha ka jingkmen. Hato uno uno un lait phet na ka jinglong runar bymkut jong me?