NAHUM 2 - Khasi CL Bible (BSI)

Ka jingkyllon ka Ninebeh

¹ Ko Ninebeh, pha don ha ka jingshah tur ïaleh! Ka bor ka ban kynther ïa pha ka la wan. To buh briew ha ki jingïada! To phira ïa ka lynti bah! To pynkhreh ïa ka thma!

² (U Trai u la sdang artat ban pynïoh pat ïa ka burom jong ka Israel, kumba ka la long ha khmat ki nongshun kiba la lute ïa ka.)

³ Ki shipai jong u nongshun ki rah ïa ki stieh rong saw bad ki phong ki sopti rong saw. Ki pynkhreh ban tur ïaleh! Ki kali ïapom jong ki, ki thaba kum ka ding! Ki kulai jong ki jam stet!

⁴ Ki kali ïapom ki tyngkhuh kulmar ha ki lynti bah, da kaba mareh shane shatai lyngba ki jaka paidbah ka nongbah. Ki thaba kum ki dongmusa bad ki stet kum ka leilieh.

⁵ La phah khot ïa ki rangbah pynïaidkam; ki jynthut katba ki dang tur sha khmat. Ki nongtur ïaleh ki tur sha ka kynroh bad ki pynap ïa ki stieh na ka bynta u dieng pynpra kynroh.

⁶ Ki khyrdop hapoh ka wah ki bthei; ïa ka ïingsyiem la pyndap da ka jingsngewtriem.

⁷ Ïa ka syiem la ring koidi; ki shakri jong ka ki ud kum ki lyngdkhur bad ki tied ïa la ka shadem ha ka jingsngewsih.

⁸ Kum ka um na ka jaka den um ba la pra ki briew ki mareh napoh ka Ninebeh! “Sangeh! Sangeh!” ka jingpyrta ka sawa — hynrei ym don mano mano ba phai dien.

⁹ To lute ïa ka rupa! To lute ïa ka ksiar! Ka nongbah ka dap da ki jingkynshew!

¹⁰ Ïa ka Ninebeh la pynjot, la iehnoh, kaba kynjah! Ki dohnud ki um da ka jingsheptieng; ki khohsiew ki khynñiuh, ka jingkhlaiñ ka la jah noh; ki durkhmat ki la kylla lieh blaid blaid.

¹¹ Hangno mynta ka don ka nongbah kata kaba long kum ka krem jong ki sing, ka jaka ha kaba la bsa ïa ki sing samla, ha kaba u sing bad ka sing kin leit bad ki khun jong ki kin don ha ka jingshngain?

¹² U sing u pynïap ïa ka jingbam jong u bad u tar ïa ka lyngkhot lyngkhot na ka bynta ka sing jong u bad ki khun jong ka; u la pyndap ïa ka krem jong u da ka doh ba la patar.

¹³ “Nga long u nongshun jong pha!” ong U Trai Badonbor Baroh. “Ngan thang ïa ki kali ïapom jong pha. Ïa ki shipai jong pha yn pynïap ha ka thma, bad ngan shim lut ïa kiei kiei baroh kiba pha la shim na kiwei. Ïa ka jingdawa jong ki nongsynran jong pha yn ym ïohsngew shuh.”