NAHUM 1 - Khasi CL Bible (BSI)

¹ Kane ka long ka khubor shaphang ka Ninebeh, ka jingïathuh shaphang ka jingïohipaw kaba la ïohi da u Nahum, uba dei na Elkosh.

Ka jingbitar jong U Trai pyrshah ïa ka Ninebeh

² U Trai U Blei um lah shah ïa kino kino ki nongïaleh pyrshah; u pynshitom ïa kito kiba ïeng pyrshah ïa u. Ha ka jingbitar jong u, u siew kylliang ïa ki.

³ U Trai um ju bitar shen, hynrei u long uba khrawbor bad um ju shah ba kiba shah rai pynrem kin lait khlem shah pynshitom. Hangno ha kaba U Trai u ïaid, ki 'erïong ki khie; ki lyoh ki long ki pui pui ba la pynmih da ki kjat jong u!

⁴ U hukum ïa ka duriaw, bad ka rngad! U pynlong ïa ki wah ban tyrkhong. Ki pyntha jong ka Bashan ki swai, u lumbah Karmel u kylla bthuh, bad ki syntiew jong u Lebanon ki jlop.

⁵ Ki lumbah ki khynñiuh ha ka jingdon ryngkat U Trai; ki lumrit ki um noh ha khmat jong u. Ka pyrthei ka khih haba U Trai u mihpaw; ka pyrthei bad ki briew jong ka baroh ki kyiuh.

⁶ Haba u bitar, uei uba lah ban lait im? Uei uba lah ban lait na ka jingbitar shla bashyrkhei jong u? U theh noh ïa ka jingbitar bameh ding jong u; ki mawsiang ki lko pum ha khmat jong u.

⁷ U Trai u long uba bha; u ïada ïa ki briew jong u ha ki por ka jingjynjar; u ri sumar ïa kito kiba phai sha u.

⁸ Kum ka jingsyllad ka jingshlei um bakhraw u pynjot thiaw ïa ki nongshun jong u; u phah sha ka jingïap jong ki ïa kito kiba pyrshah ïa u.

⁹ Aïu phi ïasylla pyrshah ïa U Trai? un pynjot ïa phi. Ym don mano mano uba ïeng ïaleh pyrshah ïa u palat ïa ka shisien.

¹⁰ Kum ïa ki shiah kiba la thain bad ïa u phlangïap ba-tyrkhong, ïa phi ki nongbuaid yn thang duh!

¹¹ Na pha, ko Ninebeh, la wan u briew uba dap da ki jingpyrkhat bymman, uba la ïasylla pyrshah ïa U Trai.

¹² Kane ka long kaei kaba U Trai u ong ha ki briew jong u ki Israel: “Wat la ki nong Assyria ki khlaiñ bad ki kham bun paid, ïa ki yn pynjot thiaw bad kin jah noh. Ko ki briew jong nga, nga la pynlong ïa phi ban shahshitom, hynrei ngan ym leh shuh ïa ka.

¹³ Ngan pynkut mynta ïa ka bor jong ka Assyria halor jong phi bad ngan pyndkut ïa ki kynjri kiba teh ïa phi.”

¹⁴ Kane ka long kaei kaba U Trai u la rai shaphang ki nong Assyria: “Kin ym don kino kino kiba hiarpateng ki ban bah ïa ka kyrteng jong ki. Ngan pynjot ïa ki bleithaw kiba don hapoh ka templ jong ki blei jong ki. Nga pynkhreh ka jingtep ïa ki nong Assyria — kim don hok ban im!”

¹⁵ Ha khmih, u nonglamktien u wan halor ki lumbah lem bad ka khubor kaba bha! U don ha la ka lynti ban pynbna ïa ka jingjop! Ko ki paid Judah, to rakhe ïa ki Jingkhawai Niam jong phi bad to ai ha U Blei ïa kaei kaba phi la kular kyntang ha u. U bymman da lei lei ruh un ym hiarthma shuh ïa ka ri jong phi. La pynjot thiaw ïa ki baroh!