MIKAH 7 - Khasi CL Bible (BSI)

Ka jinghiar ka longbriew manbriew ka Israel

¹ Ka long ka jingduh jingkyrmen! Nga long kum u briew uba thngan uba shem ba ym don soh ba dang sah ha ki dieng bad ym don sohwaiñ ha ki dieng sohwaiñ. Ïa baroh ki sohwaiñ bad baroh ki soh Dumbur ba-bang la kheit lut.

² Ym don shuh u briew uba hok uba dang don ha ka ri, ym don mano mano baïaineh bad U Blei. Uwei pa uwei u ap ïa ka kabu ban pynïap briew. Uwei pa uwei u behmrad ïa la u para shnong.

³ Ki long kiba tbit baroh ha kaba leh ïa kaba sniew. Ki rangbah synshar bad ki nongbishar ki bamsap. U briew uba lah u ong ha ki ïa kaei kaba u kwah, bad kumta ki ïasylla lang.

⁴ Wat kiba bha tam bad bahok tam na ki, ki long ki bymdondor kum ki ñiut. Ka sngi ka la poi haba U Blei un pynshitom ïa ki briew, kumba u la maham ïa ki lyngba ki nongap phira, ki nongïathuhlypa. Mynta ki don ha ka jingkulmar jingmut.

⁵ Wat ngeit ïa la u paramarjan ne shaniah ha la u paralok. Da husiar ïa kaei kaba phi kren wat ha la ka tnga.

⁶ Ha kine ki por, ki khun shynrang ki ñiew ïa la ki kpa kum kiba bieit, ki khun kynthei ki pyrshah ïa la ki kmie, bad ki kynthei samla ki ïakajia bad la ki kiaw; ki nongshun jong u briew ki dei ki dkhot na ka longïing jong u hi.

⁷ Hynrei ngan ap khmih ïa U Trai; ngan ap skhem ïa U Blei, u ban pyllait im ïa nga. U Blei jong nga un sngew ïa nga.

U Trai u wanrah ka jingpynim

⁸ Ki nongshun jong ngi kim don daw ban risa beiñ halor jong ngi. Ngi la kyllon noh, hynrei ngin khie pat. Ngi don ha ka jingdum mynta, hynrei U Trai un ai jingshai ïa ngi.

⁹ Ngi la leh pop pyrshah ïa U Trai, te mynta ngi dei ban ïaishah ïa ka jingbitar jong u shipor. Hynrei ha kaba kut un ïada ïa ngi bad un pynbeit ïa ka bymdei kaba la leh ha ngi. Un wallam ïa ngi shabar sha ka jingshai; ngin im ban ïohi ba u pyllait im ïa ngi.

¹⁰ Te ki nongshun jong ngi kin ïohi ïa kane bad kin shah pynjahburom — kijuh ki nongshun kiba la pynthut ïa ngi da kaba kylli, “Hangno U Trai U Blei jong phi u don?” Ngin ïohi ba ki la shahjop, shah ïuh kum ka ktieh ha ki lynti bah.

¹¹ Ko ki briew ka Jerusalem, ka por ban tei pat ïa ki kynroh ka nongbah ka la poi. Ha kata ka por ïa ka ri jong phi yn pynïar.

¹² Ki briew jong phi kin wan phai na kylleng — na Assyria kaba ha mihngi, na Ijipt ha ka phang shathie, na ki thain ka Ïuphratis, na ki duriaw ba sha jngai bad ki lumbah ba don sha jngai bah.

¹³ Hynrei ka pyrthei kan long kum ka ri shyiap namar ka jingbymman jong kito kiba shong ha ka.

Ka jingisynei U Trai ïa ki Israel

¹⁴ To long u nongaplangbrot ïa la ki briew, A Trai, ki briew kiba me la jied. Wat la ki shong saphred ha ka ri khlaw, ka don ka jaka baseisoh sawdong jong ki. To ai ba kin leit bad bam na ki jaka phlang bajyrngam jong ka Bashan bad ka Gilead, kumba ki la leh mynshuwa la slem bah.

¹⁵ To leh ïa ki kambah na ka bynta jong nga, A Trai, kumba me la leh ha ki sngi mynba me la wallam ïa ngi na ka ri Ijipt.

¹⁶ Ki jaitbynriew kin ïohi ïa kane bad kin sngewkhuslai wat hapdeng ka jingkhlaiñ jong ki baroh. Ha ka jinglyngngoh kin set ïa la ki shyntur bad tap ïa la ki shkor.

¹⁷ Kin par ha ka khyndew kum ki bseiñ; kin mih shabar na ki kut jong ki, da ka jingkyiuh bad jingsheptieng. Kin phai sha U Trai U Blei jong ngi ha ka jingsheptieng.

¹⁸ Ym don uwei pat u blei kum ma me, A Trai; me map ïa ki pop jong ki briew jong me kiba la lait im. Mem neh junom ha ka jingbitar, hynrei me sngewbha haba me pynpaw ïa ka jingieit baïaineh jong me.

¹⁹ Men long uba leh-isynei sa shisien pat. Men ïuh ha ki kjat ïa ki pop jong ngi bad ñiat ïa ki sha trai jong ka duriaw!

²⁰ Men pyn-i ïa ka jingïaineh jong me bad ka jingieit baneh ha la ki briew, ki khun ki ksiew jong u Abraham bad jong u Jakob, kumba me la kular ïa ki kpa tymmen jong ngi la slem bah.