MIKAH 6 - Khasi CL Bible (BSI)

Ka jingmudui U Trai pyrshah ïa ki Israel

¹ To shahshkor ïa ka jingmudui U Trai pyrshah ïa ki Israel. To khie, A Trai, bad wanrah ïa ka jingmudui jong me; to ai ba ki lumbah bad ki lumrit kin ïohsngew ïa kaei kaba me ong.

² Phi ki lumbah, phi ki nongrim bymjukut jong ka khyndew, to shahshkor ïa ka jingmudui jong U Trai! U Trai u don ka jingmudui pyrshah ïa la ki briew. Un wanrah ïa ka jingkynnoh pyrshah ïa ki Israel.

³ U Trai u ong, “Ko ki briew jong nga, nga la leh aïu ïa phi? Kumno nga la long ka jingkit ïa phi? To jubab ïa nga.

⁴ Nga la wan ïalam noh ïa phi na ka ri Ijipt; nga la pyllait ïa phi na ka jinglongmraw; nga la phah ïa u Moses, u Aaron, bad ka Miriam ban ïalam ïa phi.

⁵ Ko ki briew jong nga, to kynmaw ïa kaei kaba u Balak u syiem ka Moab u la thmu ban leh ïa phi bad kumno u Balaam u khun jong u Beor u la jubab ïa u. To kynmaw ïa kiei kiei kiba la jia ha lynti na ka jaka shong dara ha Akasia sha Gilgal. To kynmaw ïa kine kiei kiei bad phin shem ïa kaei kaba nga la leh ban pyllait im ïa phi.”

Kaei kaba U Trai u dawa

⁶ Da-ei ngan wallam sha U Trai, U Blei ka bneng, haba nga wan ban mane ïa u? Hato ngan wallam sha u da ki khun masi bakynsai tam kum ki jingainguh thang?

⁷ Hato U Trai un sngewbha lada nga wallam sha u da ki hajar ki langbrot lane da ka umphniang Olib kaba tuid khlem kut? Hato ngan ai ha u da u khun nyngkong jong nga ban siew na ka bynta ki pop jong nga?

⁸ Em, U Trai u la ïathuh ïa ngi ïa kaei kaba bha. Kaei kaba u dawa na ngi ka long kane: Ban leh ïa kaei kaba hok, ban pyn-i ïa ka jingieit baneh, bad ban im ha ka jingïasyllok basngewrit bad U Blei jong ngi.

⁹ Ka long ka jingstad ban sheptieng ïa U Trai. U pyrta ïa ka nongbah, “To shahshkor phi ki briew kiba ïalum ha ka nongbah!

¹⁰ Ha ki ïing jong ki briew kiba sniew don ki jingkynshew kiba ki la lum da kaba leh bymhok. Ki pyndonkam da ki jingthew bashukor, kaei kaei kaba nga isih.

¹¹ Kumno nga lah ban map ïa kito kiba pyndonkam da ki tarajur bad jingthew bashukor?

¹² Ki briew bariewspah jong phi ki kjit na kiba duk, bad baroh ki long ki nongshukor.

¹³ Te nga la dep sdang ïa ka jingpynjot bad jingpynpra ïa phi namar ki pop jong phi.

¹⁴ Phin bam, hynrei phin ym sngewhun — ha ka jingshisha phin dang ïai thngan hi. Phin rah bak ïa kiei kiei, hynrei phin ym lah ban ri ïa ki; ïa kino kino kiba phi lah ban ri, ngan pynjot ïa ki ha ka thma.

¹⁵ Phin bet ïa u kew, hynrei phin ym ïoh ban ot. Phin khem ïa ka umphniang na ki soh Olib, hynrei phin ym lah da lei lei ban pyndonkam ïa ka. Phin ïoh shna ïa ka waiñ, hynrei phin ym ïoh dih da lei lei ïa ka.

¹⁶ Kane kan jia namar ba phi la bud ïa ki jingleh ba-ijli jong u syiem Omri bad jong u khun jong u, u syiem Ahab. Phi la ïai bteng ban bud ïa ki rukom pynïaidkam jong ki, bad kumta ngan wallam ïa ka jingjot ha phi, bad baroh kin kyntait ïa phi. Ki briew ha kylleng kin ñiewbeiñ ïa phi.”