MIKAH 5 - Khasi CL Bible (BSI)

¹ Ko ki briew ka Jerusalem, lumlang ïa la u paid! Ngi lah shah kerkut! Ki ïatur ïaleh ïa u nongïalam ki Israel!

Ka jingkular U Blei ïa u nongsynshar na Bethlehem

² U Trai u ong, “Ko Bethlehem Ephrathah, pha long kaba rit tam na ki shnong ha Judah, hynrei na pha ngan pynmih ïa u nongsynshar ïa ki Israel, uba ka tynrai longïing jong u ka long na ki por mynbarim.”

³ Kumta, U Trai un sa aiti noh ïa la ki briew sha ki nongshun jong ki haduh ba ka briew ka ban sa kha kan ïoh ïa u khun jong ka. Nangta kito ki paid Israel kiba dang don ha ka jingshah ringmraw kin wan ïasoh lang bad ki briew la jong.

⁴ Haba u wan, un sa synshar ïa la ki briew da ka jingkhlaiñ kaba wan na U Trai bad da ka burom jong U Trai U Blei hi. Ki briew jong u kin shong ha ka jingshngain namar ki briew na kylleng ka pyrthei kin ithuh ïa ka jingkhraw jong u, bad un wanrah ïa ka jingsuk.

Ka jingpyllait bad ka jingpynshitom

⁵ Haba ki Assyria ki hiarthma ïa ka ri jong ngi bad tur lyngba ki jingïada jong ngi, ngin phah ïa ki nongïalam bakhlaiñ tam ban ïaleh ïa ki.

⁶ Da ka borbah jong ki tiar thma kin jop ïa ki Assyria, ka ri jong u Nimrod, bad kin pyllait im ïa ngi na ki Assyria haba ki hiarthma ïa ka ri jong ngi.

⁷ Ki paid Israel kiba lait im kin long kum ka umjer ba pynpyngngad ba la phah da U Trai na ka bynta ki jaitbynriew ba bun, kum ki um slap ha ki jingthung ba dang mih. Kin shaniah ha U Blei, ym ha u briew.

⁸ Kito kiba dang sah napdeng ki jaitbynriew kin long kum u sing uba wad jingbam ha ka khlaw ne ha ka jaka bam phlang: U rung hapdeng ki langbrot, u kynrup ïa ki, bad tar lyngkhot ïa ki — bad hangta ym don jingkyrmen ban lait im.

⁹ Ka Israel kan jop ïa ki nongshun jong ka bad pynjot ïa ki baroh.

¹⁰ U Trai u ong, “Ha kata ka por ngan shim noh ïa ki kulai jong phi bad yn pynjot ïa ki kali ïapom.

¹¹ Ngan pynjot ïa ki nongbah ha ka ri jong phi bad pynpra ïa ki jingïada jong phi baroh.

¹² Ngan pynjot ïa ki jingleh myntor kiba phi pyndonkam bad ngan iehnoh ïa phi khlem ki nongkren byrtong.

¹³ Ngan pynjot ïa ki bleithaw bad ki rishot maw bakyntang jong phi; phin ym mane shuh ïa kiei kiei kiba phi hi phi la thaw.

¹⁴ Ngan pynpra phom ïa ki dur jong ka bleithaw Asherah ha ka ri jong phi bad ngan pynjot ïa ki nongbah jong phi.

¹⁵ Bad ha ka jingbitar bakhraw jong nga, ngan pynhiarkput ïa ki jaitbynriew baroh ki bym shym la kohnguh ïa nga.”