MIKAH 4 - Khasi CL Bible (BSI)

Ka jingsynshar ka jingsuk bashityllup jong U Trai

¹ Ha ki sngi ki ban wan u lumbah ha kaba ka Templ ka ïeng un long uba jrong tam na baroh, uba tyllep ïa ki lumrit baroh. Ki jaitbynriew kiba bun kin wan tuid sha u,

² bad ki briew jong ki, kin ong, “ïa ngin ïaleit sha u lum jong U Trai, sha ka Templ jong U Blei ki Israel. Naba un hikai ïa ngi ïa kaei kaba u kwah ïa ngi ban leh; ngin ïaid ha ki lynti kiba u la jied. Naba ka jinghikai U Trai ka wan na Jerusalem; na Seïon u kren ha la ki briew.”

³ Un pynbeit ïa ki jingïakajia hapdeng ki jaitbynriew, hapdeng ki bor bakhraw hajan bad hajngai. Kin shoh tyrnem ïa la ki waitlam ban pynlong ki lyngkor bad ïa ki sum sha ki wait ngor tnat dieng. Ki jaitbynriew kin ym ïaleh thma shuh, kin ym pynkhreh shuh ban ïaleh thma.

⁴ Uwei pa uwei un shongsuk hapdeng ki bri sohwaiñ bad ki dieng Dumbur la ki jong hi, bad yn ym don mano mano ban pynsheptieng ïa u. U Trai Badonbor Baroh u la kular ïa kane.

⁵ Kawei pa kawei ka jaitbynriew ka mane bad kohnguh ïa la u jong u blei, hynrei ngi ngin mane bad kohnguh ïa U Trai U Blei jong ngi junom la junom.

Ki Israel kin wan phai na ka jingshah ringmraw

⁶ “Ka por kan poi,” ong U Trai, “haba ngan lumlang ïa ki briew kiba nga la pynshitom, kito kiba la shahshitom ha ka jingshah ringmraw.

⁷ Ki la long kiba dkoh bad jngai na ïing, hynrei ngan pynlong ka jingsdang kaba thymmai bad kito kiba sah, bad kin long ka jaitbynriew kaba khraw. Ngan synshar halor jong ki ha u lum Seïon naduh kata ka por bad junom.”

⁸ Bad ma pha, ko Jerusalem, ha kaba U Blei, kum u nongaplangbrot, u sumar ïa la ki briew, phan long pat sa shisien ka nongbah jong ka hima kaba la ju long ka jong pha.

⁹ Balei pha kyang jam? Balei ba pha shahshitom kum ka briew kaba suh kha? Hato ka long namar ba pham don u syiem, bad ki nongaibuit jong pha ki la ïap?

¹⁰ To phai bad to ud, ko ki briew ka Jerusalem, kum ka briew ka ban sa kha khun, naba mynta phin sa hap ban ieh ïa ka nongbah bad ban im ha rudnong. Phi dei ban leit sha Babilon, hynrei hangta U Trai un pyllait ïa phi na ki nongshun jong phi.

¹¹ Ki jaitbynriew kiba bun ki la ïalumlang ban tur ïaleh ïa phi. Ki ong, “Ïa ka Jerusalem dei ban pynjot! Ngin ïohi ïa kane ka nongbah ha ki jingjot!”

¹² Hynrei kine ki jaitbynriew kim tip ïa kaei kaba U Trai u don ha ka jingmut jong u. Kim sngewthuh ba la lumlang ïa ki ban shah pynshitom ha kajuh ka rukom ba wanrah ïa u kew ban shoh.

¹³ U Trai u ong, “Ko ki briew ka Jerusalem, to leit bad pynshitom ïa ki nongshun jong phi! Ngan pynlong ïa phi kiba khlaiñ kum u masi kyrtong uba don ki reng nar bad ki kjat rnong. Phin pynlwet ïa ki jaitbynriew ba bun, bad ïa ka spah kaba ki la ïoh da ka jingleh jubor phin ai sngewbha ïa nga, U Trai jong ka pyrthei baroh kawei.”