MIKAH 3 - Khasi CL Bible (BSI)

U Mikah u pynrem ïa ki nongïalam Israel

¹ To shahshkor, phi ki nongsynshar ki Israel! Phi la dei ban sngewkhia shaphang ka jingbishar hok,

² pynban phi isih ïa kaei kaba bha bad phi ieit ïa kaei kaba sniew. Phi khoh snieh im ïa ki briew jong nga bad phi tar ïa ka doh na ki shyieng jong ki.

³ Phi bam syndon ïa ki briew jong nga. Phi puid noh ïa ka sniehdoh jong ki, pynkheiñ ïa ki shyieng jong ki, bad shaiñ ïa ki kum ïa ka doh ha u khiew.

⁴ Ka por kan poi haba phin kyang sha U Trai, hynrei un ym jubab ïa phi. Un ym sngap ïa ki jingduwai jong phi, naba phi la leh ïa kaba sniew.

⁵ Ki briew jong nga ki la shah shukor ha ki nongïathuhlypa kiba la kular ïa ka jingsuk ïa kito kiba da siewdor ïa ki, hynrei ki byrngem da ka thma ïa kito ki bym siew.

⁶ Ïa kine ki nongïathuhlypa, U Trai u ong, “Ko ki nongïathuhlypa, ka sngi jong phi ka la jan kut noh; ka sngi ka la jan wai na ka bynta jong phi. Namar ba phi ïalam bakla ïa ki briew jong nga, phin ym don shuh ki jingïohipaw ban ïathuhlypa, bad phin ym lah ban ïathuh lypa ei ei.”

⁷ Kito kiba ïathuh lypa ïa ka lawei kin shah pynjahburom da ka jingbymlah jong ki. Baroh kin shah pynlehrain namar U Blei um shym jubab ïa ki.

⁸ Hynrei na ka bynta jong nga, U Trai u pyndap ïa nga da U Mynsiem bad ka bor, bad u ai ha nga ka jingsngewthuh ïa ka jingbishar hok bad ka jingshlur ban ïathuh ha ki paid Israel kiei ki long ki pop jong ki.

⁹ To shahshkor ïa nga, phi ki nongsynshar ki Israel, phi kiba isih ïa ka jingbishar hok bad pynkylla ïa kaba dei sha kaba bakla.

¹⁰ Phi tei ïa ka nongbah jong U Blei, ka Jerusalem, ha ka nongrim jong ka jingpynïap briew bad ka jingbishar bymhok.

¹¹ Ïa ki nongsynshar ka nongbah la tap-lup da ki jingbamsap, ki lyngdoh ki pynbatai ïa ka hukum na ka bynta ka tulop, ki nongïathuhlypa ki ai ïa ki jingpynpaw jong ki na ka bynta ka pisa — bad baroh ki kam ba U Trai u don bad ki. “Yn ym don jingma ka ban hap halor jong ngi,” ki ong. “U Trai u long lem bad ngi.”

¹² Bad kumta, namar jong phi, ïa ka Seïon yn lur kum ïa ka lyngkha, ka Jerusalem kan long kum ka kynton ñiut, bad u lum ka Templ un long kum ka khlaw.