MIKAH 2 - Khasi CL Bible (BSI)

Ka kupar jong kito kiba banbeiñ ïa kiba duk

¹ Katno kaba sngewtriem kan long ïa kito kiba peitmat bad thmu ïa kaba sniew! Haba poi ka step, mar ïa-ïoh ïa ka kabu, ki leh ïa kaba sniew kaba ki la thmu.

² Haba ki ikwah ïa ki lyngkha, ki shu knieh ïa ki; haba ki ikwah ïa ki ïing, ki shu shim ïa ki. Ym don ka longïing ne ka jingdon jingem jongno jongno kaba shongshngain.

³ Bad kumta U Trai u ong, “Nga dang thmu ban wallam ïa ka jingjot ha phi, bad phin ym lah ban lait na ka. Phin sa shem ïa lade ha ka jingeh, bad nangta phin ym ïaid sngewsarong shuh.

⁴ Haba kata ka por ka poi, ki briew kin pyndonkam ïa ka jingïathuhkhana jong phi kum ka nuksa ïa ka jingpynjot, bad kin rwai ïa kane ka jingrwai sngewsih ïa ka jingshem jong phi: “La pynjot thiaw ïa ngi! U Trai u la shim noh ïa ka ri jong ngi bad u la ai ïa ka sha kito kiba la ring koidi ïa ngi.”

⁵ Te namarkata, haba ka por ka poi ba ïa ka ri yn ai pat sha ki briew jong U Trai, yn ym don shuh ka bynta ïano ïano na phi.

⁶ Ki briew ki ïalap ha nga bad ki ong, “Wat ïalap ha ngi. Wat ïalap shaphang kata baroh. U Blei un ym pynjahburom ïa ngi.

⁷ Hato phi pyrkhat ba ki paid Israel ki don hapoh ka jingtim? Hato U Trai u la duh noh ïa la ka jingïaishah? Hato un da leh shisha ïa kine kiei kiei? Hato um shym kren bha ïa kito kiba leh ïa kaba dei?”

⁸ U Trai u jubab, “Phi tur ïaleh ïa ki briew jong nga kum ki nongshun. Ki rangbah ki wan phai na ka thma, da kaba pyrkhat ba kin shngain ha ïing, hynrei hangta ki shem, ïa kiba ap ban tuh noh ïa ki jaiñphong na ka met jong ki.

⁹ Phi beh noh ïa ki kynthei jong ki briew jong nga na ki ïing ba ki ieit, bad phi lute khlem kut ïa ki jingkyrkhu jong nga na ki khun jong ki.

¹⁰ To ïeng joit bad mihnoh; naba ym don shuh ka jingshngain hangne. Ki pop jong phi ki la long jingtim sha ka jingpynjot ïa kane ka jaka.

¹¹ “Kine ki briew ki kwah ïa u jait nongïathuhlypa uba ïaid kylleng uba dap da ka lamler bad jingshukor bad u ong, ‘Nga ïathuhlypa ba ka waiñ bad ka kyiad kin tuid na ka bynta jong phi.’

¹² “Hynrei ngan lumlang ïa phi, phi baroh ki paid Israel kiba dang sah. Ngan wallam lang ïa phi kum ki langbrot sha ka kynhun. Kum ka jaka bam phlang ba-dap da ki langbrot, ka ri jong phi kan dap biang sa shisien da ki paidbah babun.”

¹³ U Blei un plie ïa ka lynti na ka bynta jong ki bad un ïalam noh ïa ki na ka jingshah ringmraw. Kin mih bran na ki khyrdop ka nongbah bad kin long kiba laitluid. U syiem jong ki, U Trai da lade hi, un ïalam ïa ki shabar.