MIKAH 1 - Khasi CL Bible (BSI)

¹ Ha ka por ba u Jotham, u Ahas, bad u Hesekaïah ki la long ki syiem ka Judah, U Trai u la ai ïa kane ka khubor ha u Mikah, uba na ka shnong Moresheth. U Trai u la pynpaw ha u Mikah ïa kine kiei kiei baroh shaphang ka Samaria bad ka Jerusalem.

Ka jingïam sngewsih na ka bynta ka Samaria bad ka Jerusalem

² To sngew ïa kane, phi ki jaitbynriew baroh; to sngap ïa kane, ko phi kiba im ha ka pyrthei! U Trai Nongsynshar un sakhi pyrshah ïa phi. To shahshkor! U kren na ka templ ba kynja bneng.

³ U Trai u wan mih na ka jaka bakhuid jong u; un wan hiar bad ïaid ha kliar jong ki lumbah.

⁴ Te ki lum kin um hapoh jong u kum ka bthing ha ka ding, kin noh sha ki jaka them kum ka um batuid arsut ïa u lumrit.

⁵ Kane baroh kan jia namar ba ki paid Israel ki la leh pop bad ïaleh pyrshah ïa U Blei. Ïano yn kynnoh na ka bynta ka jingïaleh pyrshah ki Israel? Ka Samaria hi, ka nongbah! Mano ba shah kynnoh ïa ka jingmane bleithaw ha Judah? Ka Jerusalem hi!

⁶ Kumta U Trai u ong, “Ngan pynlong ïa ka Samaria ka kynton ñiut ha rudnong, ka jaka ban thung ïa ki dieng sohwaiñ. Ngan theh noh ïa ka jakhlia jong ka nongbah sha ka jaka them, bad ngan pynpaw shabar tang ïa ki maw nongrim jong ka nongbah.

⁷ Ïa ki bleithaw bakordor jong ka baroh yn pynpait lyngkhot, baroh kaba la ai sha ki nuti ka templ yn pynjot ha ka ding, bad ki durblei jong ka baroh kin long ka kynton ba la shu ieh. Ka Samaria ka la lum ïa kine kiei kiei na ka bynta ki jinglehniam ba pynseisoh, bad mynta ki nongshun jong ka kin rah noh ïa ki na ka bynta ki nuti ka templ shawei pat.”

⁸ Nangta u Mikah u la ong, “Namar kane ngan ïambriew bad ïam sngewsih. Ban pynpaw ïa ka jingsngewsih jong nga, ngan ïaid da ka kjat suda bad khlem jaiñkup. Ngan jlew kum u myrsiang, bad ngan ud kum ka ostrit.

⁹ Ïa ki jingmong ka Samaria yn ym lah pynkhiah, bad ka Judah kan shahshitom ha kajuh ka rukom; ka jingpynjot ka la poi haduh ki khyrdop ka Jerusalem hi, ha kaba ki briew jong nga ki shong.”

Ki nongshun ki nang jan sha Jerusalem

¹⁰ Wat ïathuh ïa ki nongshun jong ngi ha Gath shaphang ka jingshahjop jong ngi; wat ai ba kin ïohi ba phi ïam. Ko ki briew ka Beth Leaphrah, pyn-i ïa ka jinglyng-a jong phi da kaba kyrsum ha u pui pui!

¹¹ Phi ki briew ka Shaphir, leit shah ringmraw, ha ka jinglyngkhuit bad jinglehrain. Kito kiba shong ha Saanan kim nud ban mih shabar na ka nongbah jong ki. Haba phi ïohsngew ïa ki briew jong ka Bethesel ki ïambriew, phin tip ba ym don jakarieh hangta.

¹² Ki briew jong ka Maroth ki ap da ka jinglyng-a ïa ka jingïarap, namar ba U Trai u la wallam ïa ka jingjot sha jan ka Jerusalem.

¹³ Phi kiba shong ha Lakhish, teh ïa ki kali ïapom ha ki kulai. Phi pynbud ïa ki pop jong ki Israel bad kumta ka pynlong ïa ka Jerusalem ban leh pop.

¹⁴ Bad mynta, ko ki paid ka Judah, to khublei khatduh ïa ka shnong Moresheth Gath. Ki syiem ka Israel kin ym ïoh jingïarap na ka shnong Akhsib.

¹⁵ Ko ki briew ka Mareshah, U Trai un aiti noh ïa phi ha u nongshun, u ban kurup ïa ka shnong jong phi. Ki nongïalam ka Israel kin leit bad rieh ha ka krem ha Adullam.

¹⁶ Ko ki paid Judah, to khi ïa la u shñiuh ha ka jingsngewsih na ka bynta ki khun kiba phi ieit. To pynlong ïa lade kiba syllen kum ki pukni, namar ïa ki khun jong phi yn shim noh na phi ban ïalam sha ka jingringmraw.