MATHAÏOS 3 - Khasi CL Bible (BSI)

Ka jingïalap u Ïoannis u Nongpynbaptis

¹ Ha kata ka por u Ïoannis Nongpynbaptis u la wan sha ka ri shyiap jong ka Judia bad u la sdang ban ïalap.

² “To phai noh na ki pop jong phi,” u la ong, “naba ka Hima ki bneng ka la jan!”

³ U Ïoannis u la long uta u briew ïa uba u Isaïah u nongïathuhlypa u la kren shaphang jong u haba u la ong, “U don uwei uba pyrta ha ka ri shyiap, To pynkhreh ka lynti ïa U Trai; to pynlong ka lynti kaba beit na ka bynta jong u ban ïaid!”

⁴ Ïa ki jaiñ jong U Ïoannis la shna da u shñiuh jong ka ut; u la panpoh da u panpoh snieh ha ka syngkai jong u, bad ka jingbam jong u ka la long da ki puit bad ka ngap khlaw.

⁵ Ki briew ki la wan sha u na Jerusalem, na ka probins baroh kawei jong ka Judia bad na kylleng ka ri kaba hajan ka wah Jordan.

⁶ Ki la phla ïa la ki pop, bad u la pynbaptis ïa ki ha ka wah Jordan.

⁷ Haba u Ïoannis u la ïohi ïa shibun ki Pharisi bad ki Saddusi kiba la wan sha u ban shah pynbaptis, u la ong ha ki, “Phi ki bseiñ — uei uba la ïathuh ha phi ba phi lah ban lait na ka jingpynshitom kaba U Blei un sa phah?

⁸ To leh ïa kito kiei kiei ki ban pyn-i ba phi la phai noh na ki pop jong phi.

⁹ Bad wat leit pyrkhat ba phi lah ban lait na ka jingpynshitom da kaba ong ba u Abraham u long u kpa tymmen jong phi. Nga ong ha phi ba U Blei u lah ban shim ïa kine ki maw bad pynlong ki khun ki ksiew na ka bynta u Abraham!

¹⁰ Ïa u sdie la pynkhreh ban khet ïa ki dieng na ki thied; ïa uwei pa uwei u dieng u bym sei ki soh babha yn khet noh bad bret ha ka ding.

¹¹ Nga pynbaptis ïa phi da ka um ban pyn-i ba phi la kylla-kaba-mut, hynrei uta uba wan hadien jong nga un pynbaptis ïa phi da U Mynsiem Bakhuid bad da ka ding. U long uba kham khraw ban ïa nga; bad ngam long uba bit wat tang ban rah ïa ki juti jong u.

¹² U don la ka byrsha pynher stait ban shoh ïa u kew baroh. Un lumlang ïa u kew ha ka thiar jong u, hynrei un thang ïa u stait ha ka ding ka bym ju lip.”

Ka jingpynbaptis ïa U Jisu

¹³ Ha kata ka por U Jisu u la wan poi na Galilaïa bad u la wan sha u Ïoannis ha ka wah Jordan ba yn shah pynbaptis ha u.

¹⁴ Hynrei u Ïoannis u la pyrshang ban pynkylla ïa ka jingmut jong u. “Nga dei ban shah pynbaptis ha me,” u Ïoannis u la ong, “bad me la wan pynban sha nga!”

¹⁵ Hynrei U Jisu u la jubab ïa u, “Ai ba kan long kumta ïa mynta. Naba kumne keiñ ngin pyndep ïa kata baroh kaba U Blei u dawa.” Kumta u Ïoannis u la mynjur.

¹⁶ Hadien ba U Jisu u la shah pynbaptis, u la wan kiew noh na ka um. Nangta ïa ka bneng la plie ha u, bad u la ïohi ïa U Mynsiem jong U Blei uba wan hiar kum ka paro bad ka da wan shong halor jong u.

¹⁷ Nangta ka sur ktien ka la ong na bneng, “Une u long U Khun uba ieit eh jong nga, ha uba nga sngewbha eh.”