MATHAÏOS 14 - Khasi CL Bible (BSI)

Ka jingïap u Ïoannis U Nongpynbaptis

¹ Ha kata ka por, u Herod, u nongsynshar jong ka Galilaïa, u la ïohsngew shaphang U Jisu.

² “U dei shisha u Ïoannis u Nongpynbaptis, uba la im pat,” u la ïathuh ha ki rangbah synshar jong u. “Dei kata keiñ balei ba une u la don ïa kane ka bor ban leh ki kambah.”

³ Naba u Herod u la lah hukum mynshuwa ban kem ïa u Ïoannis, bad u la phah teh kynjri bad set byndi ïa u. U la leh ïa kane namar ka Herodias, ka tnga jong u Philip u para jong u.

⁴ Naba katto katne por u Ïoannis u Nongpynbaptis u la ong ïa u Herod, “Ka long ka bym dei ïa me ban shongkurim ïa ka Herodias!”

⁵ U Herod u la kwah ban pynïap ïa u, hynrei u la sheptieng ïa ki paid Jiw, namar ki la ñiew ïa u Ïoannis kum u nongïathuhlypa.

⁶ Ha ka sngi kha jong u Herod, ka khun jong ka Herodias, ka la shad ha khmat jong ka kynhun baroh kawei.

⁷ U Herod u la sngewbha eh haduh ba u la kular ïa ka, “Nga smai ba ngan ai ha pha ïa kano kano kaba pha pan!”

⁸ Ha ka jingaibuit ka kmie jong ka, ka la pan na u, “To ai ïa nga mynta hangne ïa ka khlieh jong u Ïoannis u Nongpynbaptis ha ka pliang!”

⁹ U syiem u la sngewsih, hynrei namar ka jingkular kaba u la lah pynlong ha khmat baroh ki nongshahkhot sngewbha jong u, u la ai ki hukum ba ïa ka jingkwah jong ka yn ai.

¹⁰ Kumta u la phah khrai khlieh ïa u Ïoannis ha byndi.

¹¹ Ïa ka khlieh la wallam shapoh ha ka pliang bad la ai ha ka khynnah, kaba la rah ïa ka sha la ka kmie.

¹² Ki synran jong u Ïoannis ki la ïawan, ki la bah ïa ka met jong u, bad ki la tep ïa ka; nangta ki la leit bad ïathuh ha U Jisu.

U Jisu u bsa ïa ki san hajar ngut

¹³ Haba U Jisu u la ïohsngew ïa ka khubor shaphang jong u Ïoannis, u la mih nangta da ka lieng bad u la leit sha ka jaka bakynjah marwei hi. Ki briew ki la tip shaphang kata, kumta ki la iehnoh ïa la ki shnong bad ki la ïabud ïa u na ryngkew.

¹⁴ U Jisu u la hiar na ka lieng, bad haba u la ïohi ïa u paidbah babun, ïa ka dohnud jong u la pyndap da ka jingisynei ïa ki, bad u la pynkhiah ïa kito kiba la pang.

¹⁵ Ha kata ka janmiet ki synran jong u ki la wan sha u bad ki la ong, “Ka la da dier eh, bad kane ka dei ka jaka bakynjah. To phah noh ïa ki paidbah bad shah ïa ki ban leit sha ki shnong ban thied jingbam na ka bynta ïa lade.”

¹⁶ “Kim donkam ban leit,” la jubab U Jisu. “Ma phi hi to ai ei ei ha ki ban bam!”

¹⁷ “Baroh kaba ngi don hangne ki long san tylli ki kpu bad ar tylli ki dohkha,” ki la jubab.

¹⁸ “Te wanrah ïa ki hangne ha nga,” U Jisu u la ong.

¹⁹ U la hukum ïa ki paidbah ban shong halor u phlang; nangta u la shim ïa ki san tylli ki kpu bad ïa ki ar tylli ki dohkha, u la khmied sha bneng, bad u la ainguh ïa U Blei. U la kdiah ïa ki kpu bad u la ai ïa ki ha ki synran, bad ki synran ki la ai ïa ki ha u paidbah.

²⁰ Uwei pa uwei u la bam bad u la kdang. Nangta ki synran ki la lum khat-ar tukri pura jong kaei kaba la sah tam.

²¹ Ka jingkheiñ ïa ki rangbah kiba la bam ka la long san hajar ngut, khlem da ñiew ïa ki kynthei bad ki khynnah.

U Jisu u ïaid halor ka um

²² Nangta U Jisu u la pynlong ïa ki synran ban kiew ha ka lieng bad ban nang leit sha shiliang ka duriaw, katba u la nang phah noh ïa u paidbah.

²³ Hadien ka jingphah noh ïa u paidbah, u la leit kiew ïa u lumrit marwei hi ban duwai.

²⁴ Haba ka janmiet ka la poi, U Jisu u la don hangta marwei; bad hamar kane ka por ka lieng ka la don jngai ha ka duriaw, ba la kynting shane shatai da ki jingat phyllung, namar ba ka lyer ka la beh pyrshah ïa ka.

²⁵ Hapdeng lai bad hynriew baje mynstep U Jisu u la wan sha ki synran, da kaba ïaid halor ka um.

²⁶ Haba ki la ïohi ba u ïaid halor ka um, ki la sngewshyrkhei. “Ka dei ka rngai!” ki la ong, bad ki la lynñiar da ka jingsheptieng.

²⁷ U Jisu u la kren ha ki shisyndon. “To long shlur!” u la ong. “Dei ma nga. To wat sheptieng!”

²⁸ Nangta u Petros u la jubab. “Ko Trai, lada dei shisha ma me, hukum ïa nga ban wan sha me halor ka um.”

²⁹ “To wan!” la jubab U Jisu. Kumta u Petros u la hiar na ka lieng bad u la sdang ban ïaid halor ka um sha U Jisu.

³⁰ Hynrei haba u la ïohi ïa ka lyer kaba khlaiñ, u la sheptieng bad u la sdang ban ngam shapoh um. “To pynim ïa nga, A Trai!” u la pyrta.

³¹ Shisyndon U Jisu u la kner bad u la batskhem ïa u bad U la ong, “Katno kaba rit ka jingngeit me don! Balei ba me artatien?”

³² Baroh ar ngut ki la kiew halor ka lieng, bad ka lyer ka la sangeh.

³³ Nangta ki synran hapoh ka lieng ki la mane ïa U Jisu. “Da shisha me long U Khun U Blei!” ki la pynbna.

U Jisu u pynkhiah ïa uba pang ha Gennesaret

³⁴ Ki la ïaleit sha shiliang ka duriaw bad ki la wan poi ha Gennesaret, ha kaba ki briew ki la ithuh ïa U Jisu.

³⁵ Kumta ki la phah khot ïa ki briew kiba pang ha baroh ki jaka sawdong jong ka ri bad ki la wallam ïa ki sha U Jisu.

³⁶ Ki la kyrpad ïa u ba un shah ïa kito kiba pang la kumno kumno ban ïohktah ïa ka tduh jong ka jaiñkup jong u; bad ïa baroh kito kiba la ktah ïa ka la pynkhiah.