MATHAÏOS 1 - Khasi CL Bible (BSI)

Ki kpa tymmen jong U Jisu Khrist

¹ Kane ka dei ka thup kyrteng jong ki kpa tymmen U Jisu Khrist, uba hiarpateng na u Dabid, uba long uba hiarpateng na u Abraham.

^2-6 Naduh u Abraham haduh u syiem Dabid, ïa kine harum ki kpa tymmen la thoh kyrteng: U Abraham, u Isaak, u Jakob, u Judah bad ki para shynrang jong u; nangta u Peres bad u Serah (ka kmie jong ki ka dei ka Tamar), u Hesron, u Ram, u Amminadab, u Nahshon, u Salmon, u Boas (ka kmie jong u ka dei ka Rahab), u Obed (ka kmie jong u ka dei ka Ruth), u Jesse, bad u syiem Dabid. Na u Dabid haduh ka por ha kaba ïa ki paid Israel la ringmraw sha Babilon, ïa kine harum ki kpa tymmen la thoh kyrteng:

^7-11 U Dabid, u Solomon (ka kmie jong u ka dei ka briew kaba la ju long ka tnga jong u Uriah), u Rehoboam, u Abijah, u Asa, u Jehoshaphat, u Jehoram, u Ussaïah, u Jotham, u Ahas, u Hesekaïah, u Manasseh, u Amon, u Josaïah, bad u Jehoïakhin lem bad ki para shynrang jong u.

^12-16 Na ka por hadien ka jingshah ringmraw ha Babilon haduh ka jingkha ïa U Jisu, ïa kine harum ki kpa tymmen la thoh kyrteng: U Jehoïakhin, u Shealtiel, u Serubbabel, u Abiud, u Eliakim, u Asor, u Sadok, u Akhim, u Eliud, u Eleasar, u Matthan, u Jakob, bad u Joseph, uba la shongkurim ïa ka Mari, ka kmie jong U Jisu, ïa uba la khot U Messaïah.

¹⁷ Te kumta, la don khatsaw pateng bynriew naduh u Abraham haduh u Dabid, bad khatsaw pateng na u Dabid haduh ka jingshah ringmraw ha Babilon, bad khatsaw pateng naduh nangta haduh ka jingkha ïa u Messaïah.

Ka jingkha ïa U Jisu Khrist

¹⁸ Kane ka long kumno ka jingkha ïa U Jisu Khrist ka la jia. Ka kmie jong u ka Mari ka la ïatehktien bad u Joseph, hynrei ha shuwa ba kin ïashongkurim, la shem ïa ka ba ka la punkhun na U Mynsiem Bakhuid.

¹⁹ U Joseph u long u briew uba ju ïai leh borabor ïa kaba dei, hynrei um kwah ban pynjahburom ïa ka Mari ha kaba paw; kumta u la thmu ban pynkut noh ïa ka jingïatehktien ha kaba jar jar.

²⁰ Katba u dang puson halor kane, u angel jong U Trai u la mihpaw ha u ha ka jingphohsniew bad u ong, “Ko Joseph, uba hiarpateng na u Dabid, wat sheptieng ban shim ïa ka Mari ban long ka tnga jong me. Namar dei da U Mynsiem Bakhuid ba ka la punkhun.

²¹ Kan kha i khun shynrang, bad men khot kyrteng ïa u, U Jisu — namar un pyllait im ïa ki briew jong u na ki pop jong ki.”

²² Mynta kane baroh ka la jia khnang ban pynlong ïa kaei kaba U Trai u la kren lyngba ki nongïathuhlypa ban urlong shisha,

²³ “Ka Theisotti kan punkhun bad kan kha ïa u khun, bad yn khot kyrteng ïa u, U Immanuel” (kaba mut “U Blei u long lem bad ngi”).

²⁴ Kumta haba u Joseph u la kyndit thiah, u la shongkurim ïa ka Mari, kumba u angel jong U Trai u la bthah ïa u ban leh kumta.

²⁵ Hynrei um shym la ïathiah shongkha bad ka ha shuwa ban kan kha ïa u khun jong ka. Bad u Joseph u la khot kyrteng ïa u, U Jisu.