MARKOS 6 - Khasi CL Bible (BSI)

Ïa U Jisu la kyntait ha Nasareth

¹ U Jisu u la mihnoh na kata ka jaka bad u la leit phai pat sha la shnong; ki synran ki bud ïa u.

² Ha ka sngi Sabbaton u la sdang ban hikai ha ka synagog. Bun ki briew ki la don hangta; bad haba ki la ïohsngew ïa u, baroh ki la sngewlyngngoh. “Nangno u la ïoh ïa kane baroh?” ki la kylli. “Ka jingstad aïu kane ba la ai ha u? Kumno u leh ïa ki kambah?

³ Hato um dei uto u misteri, u khun jong ka Mari, bad u hynmen jong u Jakob, u Josis, u Judas bad u Simon? Hato ki para kynthei jong u kim shong kim sah hangne?” Bad kumta ki la kyntait noh ïa u.

⁴ U Jisu u la ong ïa ki, “Ïa u Nongïathuhlypa la burom ha kylleng lait noh tang ha la ka shnong bad da ki ba-ha-ïing bad ka longïing jong u.”

⁵ Um shym la lah ban leh kino kino ki kambah hangta, lait noh tang kaba buh ïa ki kti jong u ha ki khyndiat ngut ki briew kiba pang bad u la pynkhiah ïa ki.

⁶ U la sngewlyngngoh shikatdei, namar ki briew kim shym don jingngeit. Nangta U Jisu u la leit sha ki nongrit kiba don sawdong ha kata ka thain, u da hikai ïa ki briew.

U Jisu u phah ïa ki khat-ar ngut ki synran

⁷ U la khot lang ïa ki khat-ar ngut ki synran bad u la phah ïa ki ar ngut ar ngut. U la ai ïa ki ka bor halor ki mynsiem bymkhuid

⁸ bad u la hukum ïa ki, “Wat rah ei ei bad phi ha ka jingleit jong phi lait noh tang ïa u diengduh — ym ïa u kpu, ym ïa ka pla khrong, ym ïa ka pisa ha ki pla sopti jong phi.

⁹ Phong ïa ki juti, hynrei wat rah sopti nalor kaba phi la phong.”

¹⁰ U la ong ruh, “Hangno hangno ba la khot sngewbha ïa phi, sah ha kajuh ka ïing haduh ba phin da mih na kata ka jaka.

¹¹ Lada phi wan poi ha ka shnong kaba ki briew kim khot sngewbha ïa phi lane kim sngap ïa phi, mihnoh na ka bad kynther noh ïa u pui pui na ki kjat jong phi. Kata kan long ka jingmaham ïa ki!”

¹² Kumta ki la leit bad ïalap ba ki briew kin phai noh na ki pop jong ki.

¹³ Ki la beh noh bun ki ksuid, bad ki la tah umphniang Olib ha kiba bun ki briew kiba pang bad ki la pynkhiah ïa ki.

Ka jingïap u Ïoannis u Nongpynbaptis

¹⁴ Mynta u syiem Herod u la ïohsngew shaphang kane baroh, namar ka nam U Jisu ka la phriang kylleng. Katto katne ngut ki briew ki ïa-ong, “U Ïoannis u Nongpynbaptis u la im pat! Dei na kata ka daw balei u don ïa kane ka bor ban leh ki kambah.”

¹⁵ Kiwei pat, ki la ong, “U dei u Elijah.” Kiwei ki ong, “U dei u Nong ïathuhlypa, kum uwei na ki Nongïathuhlypa jong ki por ba-mynshuwa.”

¹⁶ Haba u Herod u la ïohsngew ïa kata, u la ong, “U dei u Ïoannis u Nongpynbaptis! Nga la phah khrai ïa ka khlieh jong u, hynrei u la im pat!”

¹⁷ U Herod da lade hi u hukum ïa ka jingkem ïa u Ïoannis, bad u la phah teh kynjri ïa u bad phah set ha ka byndi. U Herod u la leh ïa kane namar ka Herodias, ïa kaba u la lah shongkurim, wat la ka la long ka tnga u para jong u, u Philip.

¹⁸ U Ïoannis u Nongpynbaptis u la ïai-ong ïa u Herod, “Kam long kaba dei ïa me ban shongkurim ïa ka tnga u para jong me!”

¹⁹ Kumta ka Herodias ka buhnud pyrshah ïa u Ïoannis bad ka la kwah ban pynïap noh ïa u, hynrei kam shym la lah namar u Herod.

²⁰ U Herod u la sheptieng ïa u Ïoannis namar u la tip ba u Ïoannis u long u briew uba bha bad uba khuid, bad kumta u ju da ïa u. U ju sngewbha ban sngap ïa u, wat la u shitom jingmut shikatdei eh man ka por ba u ïohsngew ïa u.

²¹ Ha kaba khatduh, ka Herodias ka la ïoh ïa ka kabu jong ka. Ka dei ha ka sngi kha jong u Herod, mynba la pynlong ka jingkhawai na ka bynta baroh ki rangbah synshar baheh kyrdan ha ka jingsynshar jong u, ki Rangbah shipai, bad ki nongshong shnong bapawkhmat jong ka Galilaïa.

²² Ka khun jong ka Herodias ka la wan shapoh bad ka la shad, bad ka la pynsngewbha ïa u Herod bad ïa kiba u la khot sngewbha. Kumta u syiem u la ong ha kata ka khynnah, “Kaei kaba pha kwah ban ïoh? Ngan ai ïa pha ïa kano kano kaba pha kwah.”

²³ Da ki jingsmai ba bunsien u la ong ha ka, “Nga smai ba ngan ai ha pha kano kano kaba pha pan, wat haduh shiteng ka hima jong nga!”

²⁴ Kumta ka khynnah ka la leit noh bad ka la kylli ïa ka kmie jong ka, “Kaei ngan pan?” “Ka khlieh jong u Ïoannis u Nongpynbaptis,” ka la jubab.

²⁵ Mar kumta hi ka khynnah ka la leit phai kloi kloi pat sha u syiem bad ka la dawa, “Nga kwah ïa phi ban ai mynta hangne ha ka pliang, ïa ka khlieh u Ïoannis u Nongpynbaptis!”

²⁶ Kane ka pynlong ïa u syiem ban sngewsih haduh katta katta, hynrei um lah ban kyrngah ïa ka namar ki jingsmai ba u la pynlong ha khmat jong baroh kiba u la khot sngewbha.

²⁷ Kumta shisyndon u la phah ïa u nongap phira ryngkat bad ki hukum ban wallam ïa ka khlieh jong u Ïoannis. U nongap phira u la mihnoh, u leit sha ka byndi, bad khrai ïa ka khlieh jong u Ïoannis;

²⁸ nangta u la wallam ïa ka ha ka pliang bad ai ha ka khynnah, kaba la ai ïa ka ha la ka kmie.

²⁹ Haba ki synran jong u Ïoannis ki la ïohsngew shaphang kane, ki la wan bad shim noh ïa ka met jong u bad tep noh ïa ka.

U Jisu u bsa ïa ki san hajar ngut

³⁰ Ki apostol ki la wan phai bad ki la ïakynduh ïa U Jisu; bad ki la ïathuh ha u ïa baroh kaba ki la leh bad la hikai.

³¹ La don bun ki briew kiba la wan bad leit, haduh ba U Jisu bad ki synran jong u kim don por shuh wat ban bam jingbam. Kumta u la ong ïa ki, “To ngin ïaleit noh tang ma ngi sha ka jaka ba ngin ïalong tang para ma ngi bad phi lah ban pynjahthait shipor.”

³² Kumta ki la sdang ban leit da ka lieng tang ma ki hi sha ka jaka kynjah.

³³ Kumno re kumno, la don bun ki briew kiba la ïohi ïa ki ba ki leit bad ki la tip shisyndon ba ki long kiei; kumta ki la ïaleit na baroh ki shnong bad mareh na ryngkew bad ki la poi ha ka jaka shuwa ïa U Jisu bad ki synran.

³⁴ Haba U Jisu la hiar na ka lieng, u la ïohi ïa une u paidbah babun, bad ïa ka mynsiem jong u la pyndap da ka jingsngewsynei ïa ki, namar ki la long kum ki langbrot khlem u nongsharai. Kumta u la sdang ban hikai bun kiei kiei ïa ki.

³⁵ Haba ka sngi ka la sdang noh, ki synran ki la wan ha u bad ki la ong, “Ka por ka dier palat, bad kane ka dei ka jaka kynjah.

³⁶ To phah noh ïa ki briew, bad ai ba kin leit sha ki lyngkha kiba hajan bad ki nongrit khnang ba kin thied ei ei ïa lade ban bam.”

³⁷ “Phi dei ma phi hi ban ai ei ei ïa ki ba kin bam,” U Jisu u la jubab. Ki la kylli, “Hato me kwah ïa ngi ban leit bad pynlut arspah tylli ki sbai rupa ha u kpu khnang ban bsa ïa ki?”

³⁸ Kumta U Jisu u la kylli ïa ki, “Katno phi don kpu? Khie leit bad khmih.” Haba ki la shem, ki la ïathuh ïa u, “San tylli ki kpu bad ar tylli ki dohkha ruh.”

³⁹ U Jisu te u la ong ïa ki synran jong u ba baroh ki briew kin phiah ha ki kynhun kynhun bad shong halor u phlang bajyrngam.

⁴⁰ Kumta ki briew ki la shong ha ki laiñ, ha ki kynhun bashispah ngut bad ki kynhun basanphew ngut.

⁴¹ Nangta U Jisu u la shim ïa ki san tylli ki kpu bad ar tylli ki dohkha, u la khmied sha bneng, bad u la ainguh ïa U Blei. U la kdiah ïa ki kpu bad ai ïa ki ha ki synran jong u ban sam ha ki briew. U la ïasam ruh ïa ki ar tylli ki dohkha hapdeng jong ki baroh.

⁴² Uwei pa uwei u la bam bad u la ïoh ha ban da biang.

⁴³ Nangta ki synran ki la ïalum khat-ar tukri kiba dap da kaei kaba la sah tam na u kpu bad ki dohkha.

⁴⁴ Ka jingdon ki rangbah ïa kiba la bsa ka la long san hajar ngut.

U Jisu u ïaid halor ka um

⁴⁵ Mar kumta hi U Jisu u la pynlong ïa ki synran ban kiew halor ka lieng bad ban leit ha shuwa jong u sha Bethsaida, sha shiliang jong ka duriaw, katba u dang phah noh ïa u paidbah.

⁴⁶ Hadien ba u la khublei ïakhlad ïa ki briew, u la leit noh sha u lum ban duwai.

⁴⁷ Haba la janmiet, ka lieng ka la don hapdeng ka duriaw, katba U Jisu u dang don marwei ha ryngkew.

⁴⁸ U la ïohi ba ki synran jong u ki dang ïaleh shitom ha ki boitha, namar ki dang king pyrshah ïa ka lyer, kumta katto katne por hapdeng lai bad hynriew baje mynstep u la wan sha ki, da kaba ïaid halor ka um. U la don jingmut ban ïaid najan jong ki,

⁴⁹ hynrei ki la ïohi ïa u ba u ïaid halor ka um. “Ka dei ka rngai!” ki la pyrkhat, bad ki la lynñiar.

⁵⁰ Ki la sheptieng haduh katta katta haba ki la ïohi ïa u. Mar kumta hi U Jisu u la kren ïa ki, “Long shlur!” u la ong. “Dei ma nga. Wat sheptieng!”

⁵¹ Nangta u la kiew halor ka lieng bad ki, bad ka lyer ka la long jai jai. Ki synran ki la sngewlyngngoh haduh katta katta,

⁵² namar kim pat shym la sngewthuh ïa ka jingmut bashisha jong ka jingbsa ïa ki san hajar ngut; ki jingmut jong ki kim lah ban ïohkem ïa kata.

U Jisu u pynkhiah ïa uba pang ha Gennesaret

⁵³ Ki la leit sha shiliang ka duriaw bad ki la wan poi ha Gennesaret, ha kaba ki la teh ïa ka lieng.

⁵⁴ Haba ki la hiar na ka lieng, mar kumta hi, ki briew ki la ithuh ïa U Jisu.

⁵⁵ Kumta ki la ïamareh ha baroh kata ka thain; bad shano shano ba ki la ïohsngew ba u don, ki la wallam ha u ïa ki briew kiba pang kiba thiah ha ki jingthiah jong ki.

⁵⁶ Bad shano shano ba U Jisu u leit, sha ki nongrit, ki shnong, ki lyngkha, ki paidbah ki rah ïa kito kiba pang sha ki jaka ïew bad kyrpad ïa u ban shah ïa ki la kumno kumno ban ktah ïa ka rmiang jaiñkup jong u; bad baroh kiba ktah ïa ka, ki ïohkhiah.