MARKOS 5 - Khasi CL Bible (BSI)

U Jisu u pynkhiah ïa u briew uba don mynsiem bymkhuid

¹ U Jisu bad ki synran jong u ki la poi sha shiliang ka duriaw Galilaïa, ha ka ri Gerasa.

² Tang shu hiar na ka lieng, U Jisu u la ïakynduh ïa u briew uba wan mih na ki krem jingtep kiba don hangta. Une u briew u don ïa u mynsiem bymkhuid hapoh jong u bad u shong u sah ha ki jaka tep briew.

³ Ym don shuh uba lah ban teh kynjri ïa u;

⁴ bunsien ïa ki kjat bad ki kti jong u la teh da ki kynjri, hynrei man ka por u bthat ïa ki kynjri bad pynpait ïa ki nar ha ki kjat jong u. U khlaiñ haduh katta katta ba ym don uba lah ban pyndem ïa u.

⁵ Mynsngi bad mynmiet u ju shang ha ki jaka tep briew bad ki jaka lum, da kaba lynñiar bad ot ïa lade da ki maw.

⁶ Kham na jngai u la ïohi ïa U Jisu; kumta u la mareh, u la dem khohsiew ha khmat jong u, bad u la lynñiar ha ka sur bajam,

⁷ “Ko Jisu, U Khun jong U Blei Bahakhlieh Tam Eh! Me kwah aïu bad nga? Nga kyrpad ïa me ban ym pynshitom ïa nga!”

⁸ (U la ong ïa kane namar U Jisu u la ong, “Me u mynsiem bymkhuid, mihnoh na une u briew!”)

⁹ Kumta U Jisu u la kylli ïa u, “Kaei ka kyrteng jong me?” Uta u briew u la jubab, “Ka kyrteng jong nga ka long ‘U Paidbah’ — ngi ïadon shibun!”

¹⁰ Bad u la ïai kyrpad ïa U Jisu ban ym phah noh ïa ki mynsiem bymkhuid na kata ka thain.

¹¹ La don hangta hajan, ka kynhun jong ki sniang kiba bun, kiba ïabam jingbam ha ka sharing lum.

¹² Kumta kita ki mynsiem bymkhuid ki la ïakyrpad ïa U Jisu, “Phah ïa ngi ha kitei ki sniang, bad shah ïa ngi ban rung hapoh jong ki.”

¹³ U la shah ïa ki ban leit, bad ki mynsiem bymkhuid ki la mih na uta u briew bad ki la rung hapoh ki sniang. Ka kynhun sniang baroh kawei — kaba don baroh ar hajar tylli ki sniang — ka la noh kynsan sha ka riat jong ka duriaw bad ïap jyllop.

¹⁴ Ki rangbah kiba ïa-ap ïa ki sniang ki la phet bad pynphriang ïa ka khubor ha ka shnong bad ha ki jaka rep. Ki briew ki la wan ban khmih ïa kaei kaba la jia

¹⁵ bad haba ki la wan ha U Jisu, ki la ïohi ïa uta u briew uba ju don shibun ki ksuid hapoh jong u. U la shong hangta, u la phong jaiñ bad ba u la tipbriew, bad baroh ki la sheptieng.

¹⁶ Kito kiba la ïohi ïa kata ki la ïathuh ha ki briew kaei kaba la lah jia ïa uta u briew uba don ksuid, bad ïa kita ki sniang.

¹⁷ Kumta ki la ong ïa U Jisu ban mihnoh na ka thain jong ki.

¹⁸ Katba U Jisu u dang kiew halor ka lieng, uta u briew uba shongksuid u la kyrpad ïa u, “Shah ïa nga ban leit bad me!”

¹⁹ Hynrei U Jisu um shah ïa u. Pynban, u la ong ïa u, “Khie leit phai pat sha ïing sha la ki ba-ha-ïing ha-sem jong me bad ïathuh ïa ki haduh katno U Trai u la leh na ka bynta jong me bad kumno u la lehsbun ïa me.”

²⁰ Kumta uta u briew u la leit bad u la ïaid lyngba ïa ka Dekapolis, da kaba ïathuh ïa kaei kaba U Jisu u la lah leh ïa u. Bad baroh kiba la ïohsngew ïa kata, ki la sngewlyngngoh.

Ka khun u Jairos bad ka kynthei kaba la ktah ïa ka jaiñkup U Jisu

²¹ U Jisu u la leit phai pat sha shiliang ka duriaw. Hangta harud ka duriaw, u paidbah babun u la ïalumlang sawdong jong u.

²² U Jairos, u rangbah synshar ka synagog hangta, u la wan poi, bad haba u la ïohi ïa U Jisu, u la dem ha ki kjat jong u,

²³ bad u la kyrpad rit ïa u, “Ka khun rit jong nga ka pang jur. To sngewbha ban wan bad buh ïa la ki kti halor jong ka, khnang ba kan khiah bad ïoh im.”

²⁴ Nangta U Jisu u la leit bad u. Kumta bun ki briew ki la ïaleit lang bad U Jisu, ki da ïa-thngian sha u na baroh ki liang.

²⁵ La don ka briew kaba don ka jingpang mihsnam kaba jur la khat-ar snem,

²⁶ wat la ka la ïoh jingsumar na kiba bun ki nongsumar. Ka la pynlut ïa ka pisa jong ka baroh, hynrei ha ka jaka ba kan kham ïoh jingkhiah, ka la nang kham shitom.

²⁷ Ka la ïohsngew shaphang U Jisu, kumta ka la wan ryngkat bad u paidbah nadien jong u,

²⁸ da kaba ong ha lade, “Lada nga tang shu ïohktah ïa ki jaiñkup jong u, ngan ïohkhiah.”

²⁹ Ka la ktah ïa ka jaiñkup jong u, bad ka jingmihsnam jong ka, ka la sangeh shisyndon; bad ka la don ka jingsngewthuh hapoh jong ka ba ka ïohkhiah na ka jingshitom jong ka.

³⁰ Mar kumta U Jisu u la tip ba ka bor ka la mihnoh na u, kumta u la phai sawdong sha u paidbah bad u la kylli, “Mano ba la ktah ïa ki jaiñkup jong nga?”

³¹ Ki synran jong u ki la jubab, “Me ïohi kumno ki briew ki ïa-thngian ïa me; balei ba me kylli uei uba la ktah ïa me?”

³² Hynrei U Jisu u la ïai peit sawdong ban ïohi mano ba la leh ïa kata.

³³ Kata ka briew ka la sngewthuh ïa kaei kaba la jia ïa ka, kumta ka la wan, ka da kyiuh da ka jingsheptieng, ka la dem khohsiew ha ki kjat jong u, bad ka la ïathuh ha u ïa ka jingshisha baroh.

³⁴ U Jisu u la ong ha ka, “Ko khun jong nga, ka jingngeit jong pha ka la pynkhiah ïa pha. Khie leit ha kaba suk, bad to long kaba la khiah na ka jingshitom jong pha.”

³⁵ Katba U Jisu u dang kren ïa kane, katto katne ngut ki nonglamktien ki la wan na ka ïing jong u Jairos bad ki la ong ïa u, “Ka khun jong phi ka la lah ïap. Balei phin pynshitom shuh ïa U Nonghikai?”

³⁶ U Jisu um shym la patiaw ïa kaei kaba ki la ong, hynrei u la ong ha u Jairos, “Wat sheptieng, shu ngeit.”

³⁷ Te um shym la shah ïano ïano ruh ban leit bad u, hynrei tang ïa u Petros bad u Jakob bad u para jong u, u Ïoannis.

³⁸ Ki la poi ha ka ïing jong u Jairos, ha kaba U Jisu u la ïohi ïa ka jingkhynwin bad u la ïohsngew ïa baroh ka jingïam bad ka jingïam kthang.

³⁹ U la rung shapoh bad u la ong ïa ki, “Balei katne katne ka jingkhynwin? Balei ba phi ïa-ïam? Ka khynnah kam shym ïap — ka shu ïohthiah!”

⁴⁰ Ki la ïa-rkhie ïa u, kumta u la phah noh ïa ki baroh shabar, u la shim ïa u kpa bad ïa ka kmie jong ka, bad ki lai ngut ki synran jong u, bad rung shapoh ka kamra ha kaba ka khynnah ka thiah.

⁴¹ U la shim ïa ka na ka kti bad u la ong ïa ka, “Talitha, koum,” kaba mut, “Ko Khynnah rit, nga ong ïa pha ban khie joit!”

⁴² Mar kumta hi ka la khie bad ka la sdang ban ïaid shane shatai. (Ka la don khat-ar snem ka rta.) Haba kane ka la jia, ki la lyngngoh shikatdei eh.

⁴³ Hynrei U Jisu u la ai ïa ki ka hukum bapyrkhing ban ym ïathuh hano hano ruh, bad u la ong, “Ai ei ei ïa ka ban bam.”