MARKOS 4 - Khasi CL Bible (BSI)

Ka pharshi u nongbet

¹ U Jisu u la sdang biang ban hikai harud ka duriaw Galilaïa. U paidbah uba la ïalum sawdong jong u, u la bun haduh katta katta ba u la kiew halor ka lieng bad u la shong ha ka. Ka lieng ka don ha ka um, bad u paidbah u la ïeng ha ryngkew harud ka um.

² U la pyndonkam da ki pharshi ban hikai shibun kiei kiei ïa ki, da kaba ong ha ki:

³ “Ha sngap! Shisien la don u briew uba la mih ban bet kew.

⁴ Katba u bet ïa u symbai ha ka lyngkha, katto katne na u, u la hap ha ka lynti ïaid, bad ki sim ki la wan bad bam ïa u.

⁵ Katto katne na u, u la hap ha ka khyndew ba long maw, ha ka jaka ba duna khyndew. Tang katto katne por ki symbai ki la shylluit, namar ka khyndew kam da jylliew.

⁶ Te haba ka sngi ka la shit, ka la thang noh ïa ki jingthung ba dang lung; bad namar ba ki thied kim da ngam jylliew bha, ki jingthung shen ki tyrkhong noh.

⁷ Katto katne na u symbai u la hap hapdeng ki bniap shiah, kiba mih bad kiba la kjap noh ïa ki jingthung, bad kim shym la pynmih kew ei ei.

⁸ Hynrei katto katne ki symbai ki la hap ha ka khyndew kaba bha, bad ki la shylluit, ki la san bad pynmih sohkew; katto katne ki don laiphew tylli ki sohkew, kiwei pat hynriewphew tylli bad kiwei pat shispah tylli.”

⁹ Bad U Jisu u la pynkut da kaba ong, “To shahshkor te, lada phi don ki shkor!”

Ka jingthmu jong ki pharshi

¹⁰ Mynba U Jisu u don marwei, katto katne ngut na kito kiba la ïohsngew ïa u ki la wan sha u ryngkat bad ki khat-ar ngut ki synran bad ki la kylli ïa u ban batai ïa ki pharshi.

¹¹ “Ha phi la ai ïa ka jingmaïan jong ka Hima U Blei,” U Jisu u la jubab. “Hynrei kiwei pat, kiba long shabar, ki ïohsngew ïa kiei kiei baroh lyngba ki pharshi,

¹² khnang ba, “ ‘Kin khmih bad ïai khmih, pynban kin ym ïohi; Kin sngap bad ïai sngap, pynban kin ym sngewthuh. Namar lada ki ïohi lane sngewthuh, kin phai sha U Blei, bad un map ïa ki.’ ”

U Jisu u batai ïa pharshi u nongbet

¹³ Te U Jisu u la kylli ïa ki, “Hato phim sngewthuh ïa kane ka pharshi? Kumno, te phi lah ban sngewthuh ïa kiwei pat ki pharshi?

¹⁴ U nongbet u bet ïa ka khubor U Blei.

¹⁵ Katto katne ngut ki briew ki long kum ki symbai kiba hap ha ka lynti ïaid; ki tang shu ïohsngew ïa ka khubor, u Soitan u wan bad u shim noh ïa ka.

¹⁶ Kiwei pat ki briew ki long kum ki symbai kiba hap ha ka khyndew ba long maw. Ki tang shu ïohsngew ïa ka khubor, ki pdiang ïa ka da kaba kmen.

¹⁷ Hynrei ka khubor kam ngam jylliew hapoh jong ki, bad kim neh slem. Kumta haba ka jingeh lane ka jingpynshitom beiñ ka wan namar ka khubor, tang kumta hi ki phai dien noh.

¹⁸ Kiwei pat ki briew ki long kum ki symbai ba la bet hapdeng ki bniap shiah. Kine ki long kita kiba ïohsngew ïa ka khubor,

¹⁹ hynrei ki jingpynkhuslai jong kane ka jingim, ka jingieit ïa ka spah, bad baroh kiwei ki jait jingkwah ki tap bad kjap noh ïa ka khubor, bad kim seisoh satia.

²⁰ Hynrei kiwei pat ki briew ki long kum ki symbai ba la bet ha ka khyndew kaba bha. Ki ïohsngew ïa ka khubor, ki pdiang ïa ka, bad ki seisoh: katto katne laiphew, katto katne hynriewphew, bad katto katne shispah.”

Ka sharak hapoh ka shang

²¹ U Jisu u la bteng, “Hato ju don uno uno uba wallam ïa ka sharak bad buh ïa ka hapoh ka shang lane ha khrum jingthiah? Hato um buh ïa ka ha u diengpynïeng sharak?

²² Ïa kaei kaei ba la buhrieh yn sei shabar ha kaba paw, bad ïa kaei kaei ba la tap yn sa law noh.

²³ To shahshkor, te lada phi don ki shkor!”

²⁴ U la ong ruh ha ki, “To shahshkor ïa kaei kaba phi ïohsngew! Da kijuh ki aiñ kiba phi bishar ïa kiwei, U Blei un sa pyndonkam ban bishar ïa phi — hynrei wat da kaba kham eh.

²⁵ Ïa u briew uba don ei ei yn ai shuh, bad na u briew u bym don ei ei yn shim noh na u wat ïa kata kaba khyndiat kaba u don.”

Ka pharshi u symbai uba nang san

²⁶ U Jisu u la ong shuh shuh, “Ka Hima U Blei ka ong kumne. U briew u bet symbai ha la ka lyngkha.

²⁷ U thiah mynmiet, u khie bad ha ka por mynsngi, bad ha baroh kata ka por ki symbai ki speh bad ki nang san. Pynban um tip kumno kane ka jia.

²⁸ Ka khyndew hi ka pynlong ïa u jingthung ban san bad ban seisoh; nyngkong u speh balung u mih, hadien ka kop, bad khatduh ka kop ba-dap da u symboh kew.

²⁹ Haba u kew u la ih, u briew u sdang ban ot ïa u da ka rashi, namar ka aïom ot ka la poi.

Ka pharshi u symbai Tyrso

³⁰ “Kaei ngin ong, ka Hima U Blei ka long kaba kumno?” U Jisu u kylli. “Ka pharshi kaba kumno ngin pyndonkam ban batai ïa ka?

³¹ Ka long kumne. U briew u shim ïa u symbai tyrso, u symbai barit tam ha ka pyrthei, bad u thung ïa u ha ka khyndew.

³² Hadien katto katne por u san bad u long uba heh tam na ki jingthung baroh. U pynmih ki tnat kiba heh haduh ba ki sim ki wan bad thaw skum ha ka jingkah syrngiew jong u.”

³³ U Jisu u la ïalap ïa ka khubor jong u ha ki briew, u da pyndonkam shibun kiwei pat ki pharshi kum kine; u la ïathuh shibun ïa ki kat kaba ki lah ban sngewthuh.

³⁴ Um kren ha ki khlem pyndonkam da ki pharshi, hynrei haba u don tang bad ki synran, u batai ïa kiei kiei baroh ha ki.

U Jisu u pynjai jai ïa ka 'erïong

³⁵ Ha ka janmiet jong kata kajuh ka sngi, U Jisu u la ong ha ki synran jong u, “To ngin ïaleit sha shiliang jong ka duriaw.”

³⁶ Kumta ki la iehnoh ïa u paidbah; ki synran ki la kiew halor ka lieng ha kaba U Jisu u la lah shong, bad ki la ïalam ïa u bad ki. Kiwei ki lieng ruh ki la don hangta.

³⁷ Kynsan kynsan ka lyer kaba jur ka la beh, bad ki jingat phyllung ki la sdang ban phaloh shapoh ka lieng, haduh ba ka la jan dap da ka um.

³⁸ U Jisu u don ha ka bynta kaba shadien jong ka lieng, u da ïohthiah, ka khlieh jong u ha ka syngkhlieh. Ki synran ki la kyrsiew ïa u bad ki la ong, “Ko Nonghikai, hato mem sngewlem ïa ngi ba ngin sa ïap?”

³⁹ U Jisu u la ïeng bad u la hukum ïa ka lyer, “Long jai jai!” bad u la ong ïa ki jingat phyllung, “Long jai jai!” Ka lyer ka la kynjah jar bad ka la don ka jingjai jai kaba khraw.

⁴⁰ Nangta U Jisu u la ong ïa ki synran jong u, “Balei ba phi sheptieng? Hato phim pat don jingngeit satia?”

⁴¹ Hynrei ki la sheptieng haduh katta katta bad ki la ïa-ong para ma ki, “Uei une u briew? Wat ka lyer bad ki jingat phyllung ki kohnguh ïa u!”