MARKOS 3 - Khasi CL Bible (BSI)

U briew uba ïapshiliang ka kti

¹ Nangta U Jisu u la leit pat sha ka synagog, ha kaba u la ïohi ïa uba ïapshiliang ka kti.

² Katto katne ngut ki briew kiba don hangta ki kwah ban mudui ïa U Jisu ba u leh bymdei; kumta ki la peit bha ïa u bad khmih lada un pynkhiah ïa uta u briew ha ka sngi Sabbaton.

³ U Jisu u la ong ha uta u briew, “Wan shane sha khmat.”

⁴ Nangta u la kylli ïa ki briew, “Kaei kaba ka Hukum jong ngi ka shah ïa ngi ban leh ha ka sngi Sabbaton? Ban ïarap lane ban pynsniew? Ban pynim ïa ka jingim u briew lane ban pynjot ïa ka?” Hynrei kim shym la ong ei ei.

⁵ U Jisu u la bitar katba u la peit sawdong ïa ki, hynrei ha ka kajuh ka por u la sngewsih na ka bynta jong ki, namar ba ki eh mynsiem bad leh bymdei. Te u la ong ha uta u briew, “Rah ïa la ka kti.” U la rah ïa ka, bad ka la khiah bha pat.

⁶ Kumta ki Pharisi ki la mihnoh na ka synagog bad mar kumta hi ki la ïakynduh bad katto katne ngut ki dkhot ka kynhun u Herod, bad ki la thaw ki jingthmu ban pynïap noh ïa U Jisu.

U paidbah harud ka duriaw

⁷ U Jisu bad ki synran jong u ki la leit noh sha ka duriaw Galilaïa, bad u paidbah babun u la bud ïa u. Ki la wan na Galilaïa, na Judia,

⁸ na Jerusalem, na ka ri Idumia, na ka ri kaba shaphang mihngi jong ka Jordan, bad na ka jaka sawdong ki nongbah Tyros bad Sidon. Baroh kine ki briew ki la wan sha U Jisu namar ki la lah ïohsngew ïa kiei kiei kiba u la leh.

⁹ U paidbah u la bun haduh katta katta ba U Jisu u la ong ïa ki synran jong u ban pynkhreh da ka lieng na ka bynta jong u, khnang ba ki briew kin ym tur kyrthep ïa u.

¹⁰ U la lah pynkhiah ïa kiba bun ki briew, bad baroh kito kiba pang ki la ïai kyntur sha u khnang ba ïohktah ïa u.

¹¹ Bad man ba ki briew kiba don ki mynsiem bymkhuid ha ki, ki la ïohi ïa u, ki dem khrup ha khmat jong u bad ki lynñiar, “Me long U Khun U Blei!”

¹² U Jisu, da ka ktien kaba eh u la hukum ïa ki mynsiem bymkhuid ban ym ïathuh ïano ïano ba u long uei.

U Jisu u jied ïa ki khat-ar ngut ki apostol

¹³ Nangta U Jisu u la leit sha u lum bad u la khot bad u ïa ki rangbah kiba u kwah.

¹⁴ Ki la wan sha u, bad u la jied khat-ar ngut, ïa kiba u la khot apostol. “Nga la jied ïa phi ban long lem bad nga,” u la ong ïa ki.

¹⁵ “Ngan phah ruh ïa phi ban ïalap, bad phin don ka bor ban beh noh ïa ki ksuid.”

¹⁶ Kine ki dei ki khat-ar ngut kiba u la jied: U Simon (U Jisu u la ai kyrteng ïa u, u Petros);

¹⁷ u Jakob bad u para jong u, u Ïoannis, ki khun jong u Sebedi (U Jisu u la ai kyrteng ïa ki, Boanerjes, kaba mut “ki Khun u Pyrthat”);

¹⁸ u Andriw, u Philip, u Bartholomai, u Matthaïos, u Thomas, u Jakob u khun jong u Alphaïos, u Thaddaïos, u Simon uba shitrhem,

¹⁹ bad u Judas Iskariot, uba la shetkylla ïa U Jisu.

U Jisu bad u Beelsebul

²⁰ Nangta U Jisu u la leit sha ïing. U paidbah babun u la ïalum biang kat haduh ba U Jisu bad ki synran jong u kim don por shuh ban bam.

²¹ Mynba kiba na ka longïing jong u ki la ïohsngew shaphang kata, ki la leit ban shimti ïa u, namar ki briew ki la ïa-ong, “U la lamwir!”

²² Katto katne ki nonghikai ka Hukum kiba la wan na Jerusalem ki ïa-ong, “U don ïa u Beelsebul ha u! U dei u ksuid rangbah uba ai ïa u ka bor ban beh noh ïa ki.”

²³ Kumta U Jisu u la khot ïa ki ha u bad u la kren ïa ki ha ki pharshi: “Kumno u Soitan u lah ban beh noh ïa u Soitan?

²⁴ Lada ka ri ka phiah ïa lade ha ki kynhun kiba ïaleh pyrshah para ma ki, kata ka ri kan kyllon noh.

²⁵ Lada ka longïing ka phiah ïa lade ha ki kynhun kiba ïaleh pyrshah para ma ki, kata ka longïing kan kyllon noh.

²⁶ Kumta lada ka hima u Soitan ka phiah ha ki kynhun, kan ym lah ban neh, hynrei kan kyllon noh bad poi sha ka jingkut.

²⁷ “Ym don uno uno uba lah ban prong bad rung shapoh ka ïing kaba skhem jong u briew bad rah noh ïa ki tiar ki tar lymda u teh nyngkong ïa u briew uba khlaiñ; te un sa lah ban lute ïa ka ïing jong u.

²⁸ “Nga ong skhem ïa phi ba ïa ki briew lah ban map ïa ki pop jong ki baroh, bad ïa baroh kiei kiei kiba sniew kiba ki lah ban ong.

²⁹ Hynrei uno uno uba ong kiei kiei kiba sniew pyrshah ïa U Mynsiem Bakhuid yn ym map lano lano ruh, namar u la leh ïa ka pop bymjukut.”

³⁰ (U Jisu u la ong ïa kane namar katto katne ki briew ki ïa-ong, “U don u mynsiem bymkhuid ha u.”)

Ka kmie U Jisu bad ki para jong u

³¹ Nangta ka kmie U Jisu bad ki para jong u ki la wan poi. Ki la ïeng shabar jong ka ïing bad ki phah khubor shapoh, ban kylli shaphang jong u.

³² U paidbah u dang ïashong sawdong U Jisu, bad ki la ong ha u, “Khmih ka kmie jong me bad ki para shynrang bad kynthei jong me ki don habar, bad ki donkam ïa me.”

³³ U Jisu u la jubab, “Kaei ka kmie jong nga? Kiei ki para jong nga?”

³⁴ U la peit ïa ki briew kiba shong sawdong jong u bad u la ong, “Khmih! Hangne ki don ka kmie jong nga bad ki para jong nga!

³⁵ Uno uno uba leh ïa kaei kaba U Blei u kwah ïa u ban leh, u long u para jong nga, ka para jong nga, ka kmie jong nga.”