MARKOS 16 - Khasi CL Bible (BSI)

Ka jingmihpat

¹ Hadien ba ka sngi Sabbaton ka la kut, ka Mari ka nong Magdala, ka Mari ka kmie u Jakob, bad ka Salome ki la thied ki musla ban leit pynsleh ïa ka met U Jisu.

² Dang step eh ha ka Sngi U Trai, hamar ba dang shu mih ka sngi, ki la leit sha ka jingtep.

^3-4 Ha lynti ki la ïa-ong para ma ki, “Uei u ban pyntyllun na ka bynta jong ngi ïa u maw na ka jingkhang ban rung sha ka jingtep?” (U la long u maw uba heh shibun.) Te ki la khmih bad ki la ïohi ba ïa u maw la lah pyntyllun noh.

⁵ Kumta ki la rung shapoh ka jingtep, ha kaba ki la ïohi ïa u samla uba shong ha ka liang kamon uba phong da ka jaiñkup balieh — bad ki la sheptieng.

⁶ “Wat sheptieng,” u la ong. “Nga tip ba phi ïawad ïa U Jisu uba na Nasareth, ïa uba la sahnarphna. Um don hangne — u la mihpat! Ha khmih, hangne ka jaka ha kaba ki la buh ïa u.

⁷ Mynta to leit bad ai ïa kane ka khubor sha ki synran jong u, kynthup ïa u Petros: ‘Un leit sha Galilaïa ha shuwa jong phi; hangta phin ïohi ïa u, kumba u la ong ha phi.’ ”

⁸ Kumta ki la leit noh bad mareh na ka jingtep, ki da sngewkhuslai bad sngewshyrkhei. Kim shym la ïathuh ei ei hano hano ruh, namar ki la sheptieng. [

U Jisu u mihpaw ha ka Mari ka nong Magdala

⁹ Hadien ba U Jisu u la mihpat na ka jingïap dang step phyrngab ha ka Sngi U Trai, u la mihpaw nyngkong ha ka Mari ka nong Magdala, na kaba u la pynmih noh ïa ki hynñiew tylli ki ksuid.

^10-11 Ka la leit bad ïathuh ïa ki nongbud jong u. Ki dang ïasngewsih bad ïam; bad haba ki la ïohsngew ïa ka, ba ka ong ba U Jisu u im bad ba ka la lah ïohi ïa u, kim shym la ngeit ïa ka.

U Jisu u la mihpaw ha ki ar ngut ki synran

¹² Hadien kane, U Jisu u la mihpaw ha kawei pat ka rukom ha ki ar ngut na ki katba ki dang ïa-ïaid lynti sha la shnong.

¹³ Ki la wan phai bad ki la ïathuh ha kiwei pat, hynrei kim shym la ngeit ïa kata.

U Jisu u mihpaw ha ki khatwei ngut

¹⁴ Khatduh eh, U Jisu u la mihpaw ha ki khatwei ngut ki synran katba ki dang ïabam. U la kren tyngeh ïa ki, namar kim shym la don jingngeit bad namar ka jingmutlop palat ïa ka ban ngeit ïa kito kiba la lah ïohi ïa u ba u im.

¹⁵ U la ong ïa ki, “Leit sha ka pyrthei baroh kawei bad ïalap ïa ka Gospel sha ki jaitbynriew baroh.

¹⁶ Ïa uno uno uba ngeit bad uba shah pynbaptis, yn pynim; ïa uno uno u bymngeit, yn pynrem.

¹⁷ Ïa kiba ngeit yn ai ka bor ban leh ïa ki kambah: Kin beh noh ïa ki ksuid ha ka kyrteng jong nga; kin kren ha ki thylliej kiba pher;

¹⁸ lada ki shim ïa ki bseiñ lane dih kano kano ka bih, kin ym mynsaw; kin buh ïa la ki kti ha kiba pang, ki ban ïoh ka jingkhiah.”

Ïa U Jisu la shim noh sha bneng

¹⁹ Hadien ba U Trai Jisu u la lah kren bad ki, ïa u la shim noh sha bneng bad u la shong ha ka liang kamon jong U Blei.

²⁰ Ki synran ki la leit bad ïalap kylleng, bad U Trai u la trei lem bad pynshisha ba ka jingïalap jong ki ka la long kaba shisha da ki kambah kiba ki la leh.]