MARKOS 10 - Khasi CL Bible (BSI)

U Jisu u hikai shaphang ka jingpyllait tnga

¹ Nangta, U Jisu u la mihnoh na kata ka jaka, u la leit sha ka probins jong ka Judia, bad u la jam sha shiliang ka wah Jordan. Ki paidbah ki la ïalum biang ha u, bad u la hikai ïa ki, kumba u ju leh.

² Katto katne ngut ki Pharisi ki la wan ha u bad ki la pyrshang ban riam ïa u. “Ïathuh ïa ngi,” ki la kylli, “hato ka Hukum jong ngi ka shah ne em ïa u briew ban pyllait ïa ka tnga jong u?”

³ U Jisu u la jubab da ka jingkylli, “Kaei kaba ka hukum u Moses ka ai ha phi?”

⁴ Ka jingjubab jong ki ka long, “U Moses u la shah ïa u briew ban pyntip da ka jingthoh ïa ka jingpyllait tnga bad iehnoh ïa ka tnga jong u.”

⁵ U Jisu u la ong ïa ki, “U Moses u la thoh ïa kane ka hukum na ka bynta jong phi, namar ba ka long kaba eh ban hikai ïa phi.

⁶ Hynrei ha kaba nyngkong, ha ka por ka jingpynlong, ‘U Blei u la thaw ïa ki, shynrang bad kynthei,’ kumba ka Jingthoh Bakhuid ka ong.

⁷ ‘Bad na kane ka daw, u briew un iehnoh ïa la u kpa bad ka kmie bad ïaineh bad la ka tnga,

⁸ bad baroh ar ngut kin ïalong kawei.’ Kumta kim ïalong shuh ar ngut, hynrei kawei.

⁹ U briew um dei ban pynïakhlad, te, ïa kaei kaba U Blei u la pynïasoh lang.”

¹⁰ Haba ki la rung pat shapoh ïing, ki synran ki la kylli ïa U Jisu shaphang kane.

¹¹ U la ong ïa ki, “U briew uba pyllait ïa ka tnga jong u bad shongkurim ïa kawei pat ka briew, u klim pyrshah ïa la ka tnga.

¹² Ha kajuh ka rukom, ka briew kaba pyllait ïa la u tnga bad shongkurim ïa uwei pat u briew, ka klim.”

U Jisu u kyrkhu ïa ki khynnah rit

¹³ Katto katne ngut ki briew ki la wallam ïa ki khynnah ha U Jisu ba un buh ïa ki kti jong u ha ki, hynrei ki synran ki la mai ïa kita ki briew.

¹⁴ Haba U Jisu u la ïohi ïa kane, u la sngewbitar bad u la ong ïa ki synran jong u, “Shah ïa ki khynnah ban wan ha nga, bad wat khang ïa ki, namar ka Hima U Blei ka long na ka bynta kum kine.

¹⁵ Nga kren skhem ïa phi ba uno uno u bym pdiang ïa ka Hima U Blei kum u khynnah un ym lah lano lano ruh ban rung hapoh jong ka.”

¹⁶ Nangta u la shim ïa ki khynnah ha la ki ksang'ti, u la buh ïa ki kti jong u halor jong ki, bad u la kyrkhu ïa ki.

U briew uba riewspah

¹⁷ Katba U Jisu u la sdang biang ha ka jingïaid lynti jong u, uwei u briew u la wan mareh, u la dem khohsiew ha khmat jong u, bad u la ong ïa u, “Ko Nonghikai Babha, kaei kaba nga dei ban leh ban ïoh ïa ka jingim bymjukut?”

¹⁸ “Balei me khot babha ïa nga?” U Jisu u la kylli ïa u. “Ym don uba bha lait noh tang U Blei hi.

¹⁹ Me tip ïa ki hukum: ‘Wat pynïap; wat klim; wat tuh; wat kynnoh bym dei ïano ïano; wat thok; burom ïa u kpa jong me bad ïa ka kmie jong me.’ ”

²⁰ “Ko Nonghikai,” uta u briew u la ong, “naduh ba nga dang khynnah, nga la kohnguh ïa kine ki hukum baroh.”

²¹ U Jisu u la khmih shaiñ ha u da ka jingieit bad u la ong, “Me donkam tang kawei kaei kaei. Khie leit bad die ïa baroh kaba me don bad ai ïa ka pisa ha kiba duk, bad men ïoh ïa ka spah ha bneng; nangta sa wan bad bud ïa nga.”

²² Haba uta u briew u la ïohsngew ïa kane, ka jingidiaw ka la tap ïa ka khmat jong u baroh kawei, bad u la leit noh da ka jingsngewsih, namar u la long uba riewspah haduh katta katta.

²³ U Jisu u la peit sawdong ha ki synran jong u bad u la ong ïa ki, “A katno ka long kaba eh ïa kiba riewspah ban rung sha ka Hima U Blei!”

²⁴ Ki synran ki la sngewkyndit halor kine ki ktien, hynrei U Jisu u la ong shuh shuh, “Ko khun jong nga, katno ka long kaba eh ban rung sha ka Hima U Blei!

²⁵ Ka long kaba kham eh ïa u briew uba riewspah ban rung sha ka Hima U Blei ban ïa ka ut ban rung lyngba i thliew thyrnia.”

²⁶ Ha kane ki synran ki la sngewphylla haduh katta bad ki la ïa-ong para ma ki, “Mano keiñ uba lah ban lait im?”

²⁷ U Jisu u la khmih shaiñ ha ki bad u la jubab, “Kane ka long ka bym lah ïa u briew, hynrei ym ïa U Blei; kiei kiei baroh ki long kiba lah ïa U Blei.”

²⁸ Nangta U Petros u la kren, “Khmih, ngi la iehnoh ïa kiei kiei baroh bad ngi la bud ïa me.”

²⁹ “Ho-oid,” U Jisu u la ong ïa ki, “bad nga ong ïa phi ba uno uno uba iehnoh ïa ka ïing ne ki hynmen ki para shynrang ne kynthei lane ka kmie lane u kpa lane ki khun lane ki lyngkha na ka bynta jong nga bad na ka bynta ka gospel, un ïohpdiang kham palat ha kane ka pateng ba mynta.

³⁰ Un ïohpdiang shispah shah shuh shuh ki ïing, ki hynmen ki para shynrang ne kynthei, ki kmie, ki khun bad ki lyngkha — bad ki jingshah pynshitom beiñ ruh kumjuh; bad ha ka pateng ka ban sa wan un ïoh ka jingim bymjukut.

³¹ Hynrei bun kiba long nyngkong mynta kin sa long khatduh, bad bun kiba long khatduh mynta kin sa long nyngkong.”

U Jisu u kren ha ka sien kaba lai shaphang ka jingïap jong u

³² U Jisu bad ki synran jong u ki la don mynta ha ka jingïaid lynti ban leit kiew sha Jerusalem. U Jisu u la nang leit ha shuwa ki synran, kiba la dap da ka jingsngewtieng; ki briew kiba la bud nadien ki la sheptieng. Sa shisien pat U Jisu u la shim ïa ki khat-ar ngut ki synran sharud bad u la kren ïa kiei kiei ki ban sa jia ïa u.

³³ “Sngap,” u la ong ïa ki, “ngi dang leit kiew sha Jerusalem ha kaba ïa U Khun U Briew yn sa aiti ha ki rangbah lyngdoh bad ki nonghikai ka Hukum. Kin rai pynrem ban pynïap ïa u bad nangta kin aiti ïa u sha ki Jentil,

³⁴ ki ban sa rkhiebeiñ ïa u, kin bynthiew halor jong u, kin sympat ïa u, bad pynïap ïa u; hynrei hadien lai sngi un sa mihpat.”

Ka jingkyrpad u Jakob bad u Ïoannis

³⁵ Nangta u Jakob bad u Ïoannis, ki khun shynrang jong u Sebedi, ki la wan ha U Jisu, “Ko Nonghikai,” ki la ong, “ka don kaei kaei kaba ngi kwah ïa me ban leh na ka bynta jong ngi.”

³⁶ “Kaei kata?” U Jisu u la kylli ïa ki.

³⁷ Ki la jubab, “Haba men shong halor ka khet jong me ha ka Hima kaba dap da ka burom jong me, ngi kwah ba men shah ïa ngi ban shong bad me, uwei sha kamon jong me bad uwei sha kadiang jong me.”

³⁸ U Jisu u la ong ïa ki, “Phim tip ïa kaei kaba phi pan. Hato phi lah ban dih na ka khuri jong ka jingshahshitom kaba nga dei ban dih? Hato phi lah ban shah pynbaptis ha ka rukom ba ka dei ïa nga ban shah pynbaptis?”

³⁹ “Ngi lah,” ki la jubab. U Jisu u la ong ïa ki, “Da shisha phin sa dih na ka khuri kaba nga dei ban dih bad ban shah pynbaptis ha ka rukom ba dei ban pynbaptis ïa nga.

⁴⁰ Hynrei ngam don satia ka hok ban jied mano u ban shong sha kamon jong nga bad sha kadiang jong nga. Dei U Blei u ban ai ïa kine ki jaka ha kito ïa kiba u la pynkhreh ïa ki.”

⁴¹ Haba kiwei pat ki shiphew ngut ki synran ki la ïohsngew shaphang kata, ki la bitar ïa u Jakob bad u Ïoannis.

⁴² Kumta U Jisu u la khot lang ïa ki baroh sha u bad u la ong, “Phi tip ba ki briew ïa kiba la ñiew kum ki nongsynshar jong kita kiba mane blei thala, ki leh donbor halor jong ki, bad ki nongïalam ki don ïa ka bor nadong shadong.

⁴³ Kane pat, kam dei ka rukom kaba long hapdeng jong phi. Lada uno uno napdeng jong phi u kwah ban long uba khraw, u dei ban long u shakri ïa kiwei;

⁴⁴ bad lada uno uno napdeng jong phi u kwah ban long nyngkong, u dei ban long u mraw jong baroh.

⁴⁵ Namar wat U Khun U Briew um shym la wan ba un shah shakri; u la wan ban shakri bad ban aiti ïa la ka jingim ban pynim ïa kiba bun ki briew.”

U Jisu u la pynkhiah ïa u Bartimaïos uba matlah

⁴⁶ Ki la wan sha Jerikho, bad katba U Jisu u sdang ban mihnoh ryngkat bad ki synran jong u bad u paidbah babun, u nongkhrong uba matlah uba kyrteng u Bartimaïos, u khun jong u Timaïos, u dang shong harud lynti.

⁴⁷ Haba u la ïohsngew ba dei U Jisu uba na Nasareth, u la sdang ban pyrta, “Ko Jisu! U Khun U Dabid! To isynei ïa nga!”

⁴⁸ Bun ki briew ki la kynhied ïa u bad ki la ong ïa u ban sngap jar. Hynrei u la pyrta kham jam shuh shuh, “Ko Khun U Dabid, to isynei ïa nga!”

⁴⁹ U Jisu u la sangeh bad u la ong, “Khot ïa u.” Kumta ki la khot ïa uta u briew uba matlah. “To lehkmen!” ki la ong. “Ïeng joit, u khot ïa me.”

⁵⁰ U la bret noh ïa ka jaiñkup jong u, u la rynsied, bad u la wan sha U Jisu.

⁵¹ “Kaei kaba me kwah ïa nga ban leh na ka bynta jong me?” U Jisu u la kylli ïa u. “Ko Nonghikai,” uta u briew uba matlah u la jubab, “Nga kwah ban ïoh imat biang.”

⁵² “Khie leit,” U Jisu u ong ïa u, “ka jingngeit jong me ka la pynkhiah ïa me.” Mar kumta hi u la lah ban ïohi bad u la bud ïa U Jisu ha ka lynti.