MARKOS 1 - Khasi CL Bible (BSI)

Ka jingïalap u Ïoannis u Nongpynbaptis

¹ Kane ka dei ka Khubor Babha shaphang U Jisu Khrist, U Khun U Blei.

² Ka sdang kumba u Isaïah u Nongïathuhlypa u la thoh: “U Blei u la ong, ‘Ngan phah ïa u nonglamktien ha shuwa jong phi ban pynkhreh lynti na ka bynta jong phi.’

³ Don uba pyrta ha ka ri shyiap, ‘Pynkhreh ïa ka lynti na ka bynta U Trai; Pynbeit ïa ka lynti ïaid na ka bynta jong u ban ïaid!’ ”

⁴ Kumta u Ïoannis u la wan sha ka ri shyiap, da kaba pynbaptis bad ïalap. “To phai noh na ki pop jong phi bad to shah pynbaptis,” u la ong ïa ki briew, “bad U Blei un map noh ïa ki pop jong phi.”

⁵ Bun ki briew na ka probins jong ka Judia bad ka nongbah Jerusalem ki la leit ban ïohsngew ïa u Ïoannis. Ki la phla ïa la ki pop, bad u la pynbaptis ïa ki ha ka wah Jordan.

⁶ U Ïoannis u la phong da ki jaiñ ba la shna na ki shñiuh ut, bad u panpoh snieh sawdong ïa ka syngkai jong u, bad ka jingbam jong u ka la long da ki puit bad ka ngap khlaw.

⁷ U la pynbna ha ki briew, “U briew u ban wan hadien jong nga u long uba kham khraw ban ïa nga. Ngam long uba bit nam wat ban dem bad law ïa ki juti jong u.

⁸ Nga pynbaptis ïa phi da ka um, hynrei un pynbaptis ïa phi da U Mynsiem Bakhuid.”

Ka jingpynbaptis bad ka jingpynshoi ïa U Jisu

⁹ Ym slem hadien, U Jisu u la wan na Nasareth kaba ha ka probins jong ka Galilaïa, bad la pynbaptis da u Ïoannis ha ka wah Jordan.

¹⁰ U Jisu u tang shu mih na ka um, u la ïohi ïa ka bneng ba la plie bad U Mynsiem ba u wan hiar halor jong u kum ka paro.

¹¹ Bad ka sur ka la wan na bneng, “Me long U Khun ba-ieit jong nga hi. Nga sngewbha ïa me.”

¹² Shisyndon U Mynsiem u la pynlong ïa u ban leit sha ka ri shyiap,

¹³ ha kaba u la shong hangta sawphew sngi, da kaba shah pynshoi ha u Soitan. Ki mradkhlaw ki la don ruh hangta, hynrei ki angel ki la wan bad ïarap ïa u.

U Jisu u khot saw ngut ki nongtong dohkha

¹⁴ Hadien ba la set ïa u Ïoannis ha ka byndi, U Jisu u la leit noh sha Galilaïa bad ïalap ïa ka Khubor Babha na U Blei.

¹⁵ “Ka por kaba dei ka la poi,” u ong, “bad ka Hima U Blei ka la hajan! To phai noh na ki pop jong phi bad ngeit ïa ka Khubor Babha!”

¹⁶ Katba U Jisu u dang ïaid narud ka duriaw Galilaïa, u la ïohi ar ngut ki nongtong dohkha, u Simon bad u para jong u, u Andriw, ba ki dang ïatong dohkha da ka jar.

¹⁷ U Jisu u la ong ïa ki, “Wan bad nga, bad ngan hikai ïa phi ban tong ïa ki briew.”

¹⁸ Shisyndon ki la iehnoh ïa la ki jar bad ki la leit bad u.

¹⁹ U la leit kham katto katne nangta bad u la ïohi ar ngut kiwei pat shi para, u Jakob bad u Ïoannis, ki khun jong u Sebedi. Ki don halor ka lieng jong ki ba ki dang ïapynbiang ïa ki jar jong ki.

²⁰ U Jisu u tang shu ïohi ïa ki, u la khot ïa ki; ki la iehnoh ïa la u kpa jong ki, u Sebedi ha ka lieng ryngkat bad ki rangbah kiba trei bylla, bad ki la leit bad U Jisu.

U briew uba don u mynsiem bymkhuid

²¹ U Jisu bad ki synran jong u ki la wan sha ka shnong Kapernam, bad ha ka sngi Sabbaton kaba bud, U Jisu u la leit sha ka synagog bad u la sdang ban hikai.

²² Ki briew kiba la ïohsngew ïa u ki la sngewlyngngoh ïa ka rukom ba u la hikai, namar um long kum ki nonghikai ka Hukum; hynrei u la hikai da ka bor.

²³ Hamar kata ka por uwei u briew uba don u mynsiem bymkhuid u la wan rung hapoh ka synagog bad u la lynñiar,

²⁴ “Kaei kaba me kwah na ngi, ko Jisu na Nasareth? Hato me la wan hangne ban pynjot ïa ngi? Nga tip me long uei — me long u nonglamktien bakhuid jong U Blei!”

²⁵ U Jisu u la hukum ïa u mynsiem, “Sngap jar bad mihnoh na une u briew!”

²⁶ U mynsiem bymkhuid u la pynring kyrthat ïa u briew, u la lynñiar jam, bad u la mihnoh na u.

²⁷ Ki briew baroh ki la sngewlyngngoh ba ki la sdang ban ïa-ong para ma ki, “Kaei kane? Hato ka dei ka jait jinghikai thymmai? Une u briew u don ka bor ban ai hukum ïa ki mynsiem bymkhuid, bad ki kohnguh ïa u!”

²⁸ Bad kumta ka khubor shaphang U Jisu ka la phriang stet kylleng ka probins jong ka Galilaïa.

U Jisu u pynkhiah ïa kiba bun ki briew

²⁹ U Jisu bad ki synran jong u, kynthup ïa u Jakob bad u Ïoannis, ki la mih na ka synagog bad ki la leit beit sha ka ïing u Simon bad u Andriw.

³⁰ Ka kiaw kurim jong u Simon ka thiah pang ha jingthiah na ka jingpang shit, bad mar ïapoi U Jisu, la ïathuh shaphang jong ka.

³¹ U la leit sha ka, u la shim ïa ka na ka kti, bad u la khyllie ïa ka. Ka jingshit ka la iehnoh ïa ka, bad ka la sdang ban shakri ïa ki.

³² Hadien ba ka sngi ka la sep bad ba ka janmiet ka la poi, ki briew ki la wallam sha U Jisu ïa baroh kiba pang bad kito kiba shongksuid.

³³ Baroh ki briew jong ka shnong ki la ïalum ha khmat jong ka ïing.

³⁴ U Jisu u la pynkhiah bun kiba pang na ki jait jingpang kiba bun bad beh noh ïa kiba bun ki ksuid. Um shah ba ki ksuid kin kren ei ei, namar ki la tip u long uei.

U Jisu u ïalap ha Galilaïa

³⁵ Dang step phyrngab ha ka sngi kaba bud, slem shuwa ban shai, U Jisu u la ïeng bad mihnoh na ka ïing. U la mihnoh na ka shnong sha ka jaka bakynjah, hangta u la duwai.

³⁶ Hynrei u Simon bad ki paralok jong u ki la leit wad ïa u,

³⁷ bad haba ki la shem ïa u, ki la ong, “Baroh ki ïawad ïa me.”

³⁸ Hynrei U Jisu u la jubab, “Ngi dei ban leit sha kiwei nongrit ha kine ki thain. Nga dei ban ïalap ha ki ruh, namar dei na kata ka daw ba nga la wan.”

³⁹ Kumta u la leit sha baroh ki jaka ha Galilaïa, da kaba ïalap ha ki synagog bad beh noh ïa ki ksuid.

U Jisu u pynkhiah ïa u briew

⁴⁰ U briew uba pang na ka jingpang 'ñiangthohlieh u la wan ha U Jisu, u la dem khohsiew bad u la kyrpad ïa u ban ïarap. “Lada me mon,” u la ong, “me lah ban pynkhuid ïa nga.”

⁴¹ U Jisu u la dap da ka jingsngewsynei bad u la kner ïa la ka kti bad u la ktah ïa u. “Nga mon,” u la jubab. “To long khuid!”

⁴² Mar kumta hi ka jingpang ka iehnoh ïa uta u briew, bad u la long khuid.

⁴³ Nangta U Jisu u la ong skhem ïa u bad phah noh ïa kumta hi,

⁴⁴ hadien u la ong ïa u, “Sngap, wat ïathuh hano hano ruh shaphang kane. Hynrei leit beit sha u lyngdoh bad ai ba un khmih ïa me; te khnang ban pynshisha ha baroh ba me la ïohkhiah, sa ai ka jingkñia kaba u Moses u la hukum.”

⁴⁵ Hynrei uta u briew u la leit bad u la sdang ban pynphriang ïa ka khubor kylleng. Ha ka jingshisha, u la ïathuh ha baroh haduh ba U Jisu um lah shuh ban rung shapoh shnong ha kaba paw paidbah. Hynrei, U la shong noh ha ki jaka kynjah, bad ki briew ki la ïawan sha u na kylleng.