LOUKAS 24 - Khasi CL Bible (BSI)

Ka jingmihpat

¹ Dang step phyrngab ha ka step Sngi U Trai, ki kynthei ki la leit sha ka jingtep ki da rah ïa ki musla kiba ki la pynkhreh.

² Ki la shem ba la pyntyllun noh ïa u maw na ka jaka rung sha ka jingtep, kumta ki la rung shapoh;

³ hynrei kim shym shem ïa ka met jong U Trai Jisu.

⁴ Ki la ïeng hangta, ki la shaïong shaphang kane, haba kynsan ar ngut ki rangbah ha ki jaiñ kiba phyrnai eh ki la ïeng hajan jong ki.

⁵ Ha ka jingtieng bakhraw, kita ki kynthei ki la dem khrup ha khyndew, katba ki rangbah ki la ong ha ki, “Balei ba phi ïawad hapdeng kiba ïap ïa uta uba im?

⁶ Um don hangne; la pynmihpat ïa u. Kynmaw ïa kaei kaba u la ong ha phi mynba u dang don ha Galilaïa:

⁷ ‘Ïa U Khun U Briew dei ban aiti ha ki briew kiba pop, ba yn sahnarphna, bad hadien lai sngi un mihpat.’ ”

⁸ Te kita ki kynthei ki la kynmaw ïa ki kyntien jong u,

⁹ ki la leit phai noh na ka jingtep, bad ki la ïathuh ïa kine kiei kiei baroh ha ki khatwei ngut ki synran bad ha baroh kiwei pat.

¹⁰ Kita ki kynthei ki la long ka Mari ka nong Magdala, ka Ïoanna, bad ka Mari ka kmie jong u Jakob; ma ki lem bad kiwei pat ki kynthei kiba bad ki, ki la ïathuh ïa kine kiei kiei baroh ha ki apostol.

¹¹ Hynrei ki apostol ki la pyrkhat ba kaei kaba kita ki kynthei ki la ong ka long ka bym don jingmut, bad kim shym la ngeit ïa ki.

¹² Hynrei u Petros u la ïeng joit bad u la mareh sha ka jingtep; u la dem shapoh bad u la ïohi ïa ki jingsop linen hynrei ym kano kano kawei pat. Nangta u la leit phai pat sha ïing da ka jinglyngngoh ïa kaei kaba la jia.

Ka jingïaid lynti sha Emmaus

¹³ Ha kata kajuh ka sngi, ar ngut na ki nongbud jong U Jisu ki dang leit sha ka shnong kaba kyrteng ka Emmaus, kumba khatwei kilomitar na Jerusalem,

¹⁴ bad ki dang ïakren para ma ki shaphang kiei kiei baroh kiba la jia.

¹⁵ Katba ki dang ïakren bad ïasaidnia, U Jisu hi u la leit hajan bad u la ïaid lem bad ki;

¹⁶ ki la ïohi ïa u, hynrei kumno re kumno kim shym ithuh ïa u.

¹⁷ U Jisu u la ong ha ki, “Shaphang kaei ba phi ïakren para ma phi, katba phi nang ïa-ïaid?” Ki la ïeng, lem bad ka durkhmat basngewsih.

¹⁸ Uwei na ki, uba kyrteng u Kleopas, u la kylli ïa u, “Hato me long tang ma me uba wan sha Jerusalem u bymtip ïa kiei kiei kiba la lah jia hangta ha kine ki khyndiat sngi ba la leit?”

¹⁹ “Kiei kita?” u la kylli. “Kiei kiei kiba la jia ha U Jisu uba na Nasareth,” ki la jubab. “Une u briew u la long u nongïathuhlypa bad la ñiew da U Blei bad da ki briew baroh ba u long uba donbor ha kiei kiei baroh kiba u kren bad leh.

²⁰ Ki rangbah lyngdoh bad ki nongsynshar jong ngi ki la aiti noh ïa u ban rai pynïap, bad ïa u la sahnarphna.

²¹ Bad ngi la kyrmen ba un dei ma u uta u ban sa wan ban pyllaitluid ïa ki Israel! Nalor kata baroh, kane mynta ka dei ka sngi kaba lai naduh ba ka la jia.

²² Katto katne ngut ki kynthei jong ka kynhun jong ngi, ki la pynkyndit ïa ngi; ki la leit dang kynjat shai sha ka jingtep, hynrei kim shym la lah ban shem ïa ka met jong u.

²³ Ki la wan phai pat da kaba ong ba ki la ïohi ka jingïohipaw ïa ki angel kiba la ïathuh ha ki ba u im.

²⁴ Katto katne ngut na ka kynhun jong ngi ki la leit sha ka jingtep bad ki la shem thik kumba ki kynthei ki la ïathuh, hynrei kim shym la ïohi ïa u.”

²⁵ Nangta U Jisu u la ong ha ki, “Katno kiba bieit phi long, katno phi long kiba suki ban ngeit ïa kaei kaei baroh kaba ki nongïathuhlypa ki la ong!

²⁶ Hato kam long kaba donkam ïa U Messaïah ban shahshitom ïa kine kiei kiei baroh bad nangta ban rung sha ka burom jong u?”

²⁷ Bad U Jisu u la batai ha ki ïa kaei kaba la ong shaphang jong u hi ha baroh ki Jingthoh Bakhuid, da kaba sdang da ki kitab u Moses bad ki jingthoh jong ki nongïathuhlypa baroh.

²⁸ Haba ki la jan poi hajan ka nongrit sha kaba ki thmu ban leit, U Jisu u la leh kumba u nang leit kham jngai;

²⁹ hynrei ki la bat ïa u, ki da ong, “To sah bad ngi; ka sngi la jan kut bad ka la khreh dum.” Kumta u la leit ban sah bad ki.

³⁰ U la shong bam bad ki, u la shim ïa u kpu, bad u la duwai; nangta u la kdiah ïa u kpu bad u la ai ïa u ha ki.

³¹ Te ïa ki khmat jong ki la plie bad ki la ithuh ïa u, hynrei u la jah noh na khmat jong ki.

³² Ki la ong para ma ki, “Hato kam shym la long kum ka ding kaba klang hapoh jong ngi mynba u la kren ha ngi ha ka lynti bad batai ïa ki Jingthoh Bakhuid ha ngi?”

³³ Ki la ïeng joit shisyndon bad ki la leit phai pat sha Jerusalem, ha kaba ki la shem ïa ki khatwei ngut ki synran kiba la ïalumlang bad kiwei pat kiba ong,

³⁴ “U Trai u la mihpat da shisha! U la paw ha u Simon!”

³⁵ Ki ar ngut te ki la batai ha ki ïa kaei kaba la jia ha kata ka lynti, bad ba kumno ki la ithuh ïa U Trai mynba u la kdiah ïa u kpu.

U Jisu u mihpaw ha ki synran jong u

³⁶ Katba ki ar ngut ki dang ïathuh ha ki ïa kane, kynsan U Trai hi u la ïeng hapdeng jong ki bad u la ong ha ki, “Ka jingsuk lem bad phi.”

³⁷ Ki la sngewshyrkhei, da kaba pyrkhat ba ki ïohi ïa ka rngai.

³⁸ Hynrei, u la ong ha ki, “Balei ba phi ïasheptieng? Balei ba kine ki jingartatien ki wan ha ki jingpyrkhat jong phi?

³⁹ Khmih ïa ki kti jong nga bad ki kjat jong nga, bad peit ba dei ma nga hi. Tba ïa nga, bad phin tip, naba ka rngai kam don ka doh bad ki shyieng, kumba phi ïohi ba nga don.”

⁴⁰ U la ong ïa kane bad u la pyn-i ha ki ïa ki kti jong u bad ïa ki kjat jong u.

⁴¹ Kim pat lah hi ban ngeit, ki la shlei da ka jingkmen bad ka jingphylla; kumta u la kylli ïa ki, “Phi don ei ei hangne ban bam?”

⁴² Ki la ai ha u shi lyngkhot ka dohkha ba la shet,

⁴³ ïa kaba u la shim bad bam ha khmat jong ki.

⁴⁴ Nangta u la ong ha ki, “Kine ki long kita kiei kiei kiba nga la ïathuh ha phi mynba nga dang don lem bad phi: Kaei kaei baroh kaba la thoh shaphang jong nga ha ka Hukum u Moses, ha ki jingthoh jong ki nongïathuhlypa, bad ha Ki Salm ka dei ban urlong shisha.”

⁴⁵ Nangta u la plie ïa ki jingpyrkhat jong ki ban shemphang ïa ki Jingthoh Bakhuid, bad u la ong ha ki,

⁴⁶ “Kane ka long kaei kaba la thoh: U Messaïah u dei ban shahshitom bad u dei ban mihpat na ka jingïap hadien lai sngi,

⁴⁷ bad ha ka kyrteng jong u ïa ka khubor shaphang ka Jingkylla-kaba-mut bad ka jingmap ïa ki pop dei ban ïalap sha ki jaitbynriew baroh, da kaba sdang na Jerusalem.

⁴⁸ Phi long ki sakhi ïa kine kiei kiei.

⁴⁹ Bad nga hi ngan phah halor jong phi ïa kaei kaba U Kpa jong nga u la kular. Hynrei phi dei ban ap ha ka nongbah tad ynda ka bor ba najrong ka wan hiar halor jong phi.”

Ïa U Jisu la shim noh sha bneng

⁵⁰ Nangta u la ïalam ïa ki shabar ka nongbah haduh ha Bethania, ha kaba u la rah ïa la ki kti bad u la kyrkhu ïa ki.

⁵¹ Katba u dang kyrkhu ïa ki, u la leit noh na ki bad la shim noh ïa u sha bneng.

⁵² Ki la mane ïa u bad ki la leit phai pat sha Jerusalem, kiba la pyndap da ka jingkmen bakhraw,

⁵³ bad ki la pynlut ïa ka por jong ki baroh hapoh ka Templ da kaba ainguh ïa U Blei.