LOUKAS 17 - Khasi CL Bible (BSI)

Ka pop

¹ U Jisu u la ong ha la ki synran, “Kiei kiei kiba pynlong ïa ki briew ban hap ha ka pop ki dei ban jia, hynrei katno ka long kaba shyrkhei ïa uta uba pynlong ïa ki ban jia!

² Kan kham bha ïa u lada la teh ha ka ryndang jong u ïa u mawtylliat uba heh bad bret ïa u sha ka duriaw ban ïa kaba ma u, u pynlong ïa uwei na kine kiba rit ban leh pop.

³ Kumta da husiar ïa kaei kaba phi leh! “Lada u hynmen u para jong phi u leh pop, to sneng tyngeh ïa u, bad lada u kylla-kaba-mut, to map ïa u.

⁴ Lada u leh pop pyrshah ïa phi hynñiew sien ha ka shi sngi, bad man ka por u wan sha phi da kaba ong, ‘nga kylla-kaba-mut,’ phi dei ban map ïa u.”

Ka jingngeit

⁵ Ki apostol ki la ong ha U Trai, “To kham pynkhraw ïa ka jingngeit jong ngi.”

⁶ U Trai u la jubab, “Lada phi don ka jingngeit kat u symbai tyrso, phi lah ban ong ha une u diengsoh lyngdkhur, ‘To jynrat noh ïa lade na ki thied bad thung ïa lade hapoh duriaw!’ bad un kohnguh ïa phi.

Ka kamram jong u shakri

⁷ “Tharai uwei na phi u don u shakri uba dang lur lyngkha lane dang sharai ïa ki langbrot. Haba u wan shapoh ïing na lyngkha hato phi ong ïa u ban pynkloi bad bam ïa la ka jingbam?

⁸ Ym kumta da shisha! Pynban, phi ong ha u, ‘To pynkhreh ïa ka jingbam miet jong nga, nangta to phong ïa ka jaiñ-da jong me bad shakri ïa nga katba nga dang bam bad dih; hadien kata me lah ban bam ïa ka jingbam jong me.’

⁹ U shakri um dei hok ban ïoh ka jingkhublei na ka bynta ka jingkohnguh hukum jong u, hato kam long kumta?

¹⁰ Ka long kumjuh bad phi; haba phi la pyndep ïa baroh kaba la bthah ïa phi ban leh, to ong, ‘Ngi long ki tang ki shakri, ngi la pyndep tang ïa ka kamram jong ngi.’ ”

U Jisu u pynkhiah shiphew ngut ki rangbah

¹¹ Katba U Jisu u don ha la ka lynti sha Jerusalem, u la leit na ka pud hapdeng ka Samaria bad ka Galilaïa.

¹² U la leit lyngba ka shnong ha kaba la ïashem ïa u da ki shiphew ngut ki rangbah kiba pang 'ñiangthohlieh.

¹³ Ki la ïeng kham pajih bad ki la pyrta, “Ko Jisu! Ko Kynrad! To isynei ïa ngi!”

¹⁴ U Jisu u la ïohi ïa ki bad u la ong ha ki, “Khie leit bad ai ba ki lyngdoh kin da khmih bniah ïa phi.” Ha lynti la pynkhuid ïa ki.

¹⁵ Haba uwei na ki, u la ïohi ba u la ïohkhiah, u la wan phai pat, da kaba ïaroh ïa U Blei ha ka sur bajam.

¹⁶ U la dem khrup ïa lade ha khyndew ha ki kjat jong U Jisu bad u la ainguh ïa u. Uta u briew u dei u nong Samaria.

¹⁷ U Jisu u la ong, “La don shiphew ngut ki rangbah ïa kiba la pynkhiah; shano kiwei pat ki khyndai ngut?

¹⁸ Balei une u nongwei u long tang ma u uba la wan phai pat ban ainguh ïa U Blei?”

¹⁹ Bad U Jisu u la ong ha u, “To khie joit bad leit; ka jingngeit jong me ka la pynkhiah ïa me.”

Ka jingwan jong ka Hima

²⁰ Katto katne ngut ki Pharisi ki la kylli ïa U Jisu lano ka Hima U Blei kan wan. Ka jubab jong u ka long, “Ka Hima U Blei kam wan ha ka rukom kum kaba lah ban ïohi.

²¹ Ym don u ban ong, ‘Ha khmih, ka don hangne!’ lane ‘Ka don hangtai!’; namar ka Hima U Blei ka don hapoh jong phi.”

²² Nangta u la ong ha ki synran, “Ka por kan poi ha kaba phin kwah ban ïohi ïa kawei na ki sngi jong U Khun U Briew, hynrei phin ym ïohi ïa ka.

²³ Kin don kito ki ban ong ha phi, ‘Ha khmih, hangtai!’ lane ‘Ha khmih hangne!’ Hynrei wat mih shabar ban wad ïa ka.

²⁴ Kumba ka leilieh ka thaba na shiliang sha shiliang jong ka sahit bneng bad ka pynshai ïa ka na kawei ka liang sha kawei pat, kumta un long U Khun U Briew ha ka sngi jong u.

²⁵ Hynrei, nyngkong u dei ban shahshitom shikatdei eh bad ban shah kyntait da ki briew jong kane ka pateng.

²⁶ Kumba ka la long ha ka por jong u Noah kumta kan long ha ki sngi jong U Khun U Briew.

²⁷ Uwei uwei baroh u ïai ïabam bad ïadih, bad ki shynrang bad ki kynthei ki ïashongkurim, haduh ka sngi kaba u Noah u la leit rung shapoh ka lieng bad ka jingshlei um ka la wan bad ka la pynïap ïa ki baroh.

²⁸ Kan long kumba ka la long ha ka por jong u Lot. Uwei uwei baroh u ïai ïabam bad ïadih, da kaba ïathied bad ïadie, da kaba thung bad tei.

²⁹ Ha ka sngi ba u Lot u mih na Sodom, ka ding bad u kyndok ki la hap na bneng bad la pynïap ïa ki baroh.

³⁰ Kata ka long kumno kan jia ha ka sngi ba yn pynpaw ïa U Khun U Briew.

³¹ “Ha kata ka sngi u briew uba don halor ka tnum jong ka ïing jong u, um dei ban leit hiar shapoh ka ïing ban shim ïa ki jingdon jingem jong u; ha kajuh ka rukom u briew uba don shabar ha ka lyngkha um dei ban leit phai pat sha ïing.

³² Kynmaw ïa ka tnga u Lot!

³³ Uno uno uba pyrshang ban pyllait im ïa la ka jingim un duh noh ïa ka; uno uno uba duh noh ïa la ka jingim un ïoh ïa ka.

³⁴ Ha kata ka miet, nga ong ha phi, yn don ar ngut ki briew kiba thiah ha kajuh ka jingthiah: Ïa uwei yn shim noh, ïa uwei pat yn iehnoh shadien.

³⁵ Ar ngut ki kynthei kin ïatylliat lang ïa u kew: Ïa kawei yn shim noh, ïa kawei pat yn iehnoh shadien.

³⁶ Ar ngut ki rangbah kin ïatrei ha ka lyngkha: Ïa uwei yn shim noh, ïa uwei pat yn iehnoh shadien.”

³⁷ Ki synran ki la kylli ïa u, “Hangno, ko Trai?” U Jisu u la jubab, “Hangno hangno ha kaba don ka metïap, ki pukni kin ïalum hangta.”