LOUKAS 14 - Khasi CL Bible (BSI)

U Jisu u pynkhiah ïa u briew uba pang

¹ Ha kawei ka sngi Sabbaton, U Jisu u la leit ban bam ha ka ïing jong uwei na ki Pharisi kiba kham pawkhmat; bad ki briew ki la khmih bha ïa U Jisu.

² Uwei u briew uba ki kjat bad ki kti jong u ki la sieb u la wan sha U Jisu,

³ bad U Jisu u la kylli ïa ki nonghikai ka Hukum bad ïa ki Pharisi, “Hato ka Hukum jong ngi ka shah ne em ban pynkhiah ha ka sngi Sabbaton?”

⁴ Hynrei kim shym ong ei ei. U Jisu u la shim ïa uta u briew, U la pynkhiah ïa u, bad U la phah noh ïa u.

⁵ Nangta u la ong ha ki, “Lada uno uno na phi u don u khun ne u masi dab uba jia ryngkhat u hap hapoh ka pukri ha ka sngi Sabbaton, hato phin ym tan ïa u shisyndon shabar ha ka sngi Sabbaton hi?”

⁶ Hynrei kim shym la lah ban jubab ïa u shaphang kane.

Ka jingsngewrit bad ka jingkhot basa

⁷ U Jisu u la ïohi kumno katto katne ngut kiba shah khot sngewbha ki da jied ïa ki jaka bakyrpang tam, kumta u la ïathuh ïa kane ka pharshi ha ki baroh:

⁸ “Haba uno uno u khot sngewbha ïa phi sha ka jingkhawai shongkurim, wat shong ha ki jaka bakyrpang. Ka lah ban jia ba uno uno uba kham donkam ban ïa phi u la shah khot sngewbha,

⁹ bad ba u nongpdiang ïa phi, uba la khot sngewbha ïa phi baroh ar ngut, un hap wan bad ong ha phi, ‘Ai noh ha u ïa kane ka jaka shong.’ Nangta phin sngewlehrain bad wan ban shong ha ka jaka ba hapoh eh.

¹⁰ Pynban, haba la khot sngewbha ïa phi, khie leit bad shong ha ka jaka ba hapoh eh, khnang ba u nongpdiang ïa phi un wan ha phi bad ong, ‘Ale kiew shane, ko paralok jong nga, sha ka jaka ba kham kyrpang.’ Kane kan wanrah ka burom ïa phi ha khmat jong baroh kiwei pat kiba shah khot sngewbha.

¹¹ Naba ïa uno uno uba pynkhraw ïa lade, yn pynrit; bad ïa uno uno uba pynrit ïa lade, yn pynkhraw.”

¹² Nangta U Jisu u la ong ha u nongpdiang ïa u, “Haba me ai ïa ka bam step ne ka bam miet, wat khot sngewbha ïa ki paralok jong me lane ïa ki hynmen ki para shynrang jong me lane ïa ki ba-ha-ïing jong me lane ki paramarjan kiba riewspah jong me — naba kin khot sngewbha kylliang ïa me, bad ha kane ka rukom yn sa siew ïa me na ka bynta kaei kaba me la leh.

¹³ Haba me khreh ka jingkhawai, khot sngewbha ïa kiba duk, kiba khrew, kiba dkoh, bad kiba matlah;

¹⁴ bad men long uba la kyrkhu, namar kim lah ban siew kylliang ïa me. U Blei un siew pat ïa me ha ka sngi ba ki briew kiba bha ki mihpat na ka jingïap.”

Ka pharshi ka jingkhawai bakhraw

¹⁵ Haba uwei na ki rangbah kiba ïashong bam u la ïohsngew ïa kane, u la ong ha U Jisu, “A katno kiba kmen long kito kiba shong ha ka jingkhawai ha ka Hima U Blei!”

¹⁶ U Jisu u la ong ha u, “La don shisien uwei u briew uba la khreh ka jingkhawai kaba khraw ha kaba u la khot sngewbha bun ki briew.

¹⁷ Haba ka la dei ka por ïa ka jingkhawai, u la phah ïa u shakri jong u ban ong ha ki nongshahkhot sngewbha jong u, ‘To wan, la dep khreh ïa kaei kaei baroh!’

¹⁸ Hynrei baroh ki la sdang, uwei hadien uwei pat, ban ai daw. Uba nyngkong u la ong ha u shakri, ‘Nga la thied ïa ka lyngkha bad nga dei ban leit bad khmih ïa ka; sngewbha pdiang ïa ka jingbymlah wan jong nga.’

¹⁹ Uwei pat u la ong, ‘Nga la thied san jur ki masi dab bad nga don ha ka lynti ban tynjuh ïa ki; sngewbha pdiang ïa ka jingbymlah wan jong nga.’

²⁰ Uwei pat u la ong, ‘Nga dang shu shongkurim, bad na kata ka daw ngam lah ban wan.’

²¹ “U shakri u la leit phai bad u la ïathuh ïa kane baroh ha u kynrad jong u. U kynrad u la bitar shla bad u la ong ha u shakri, ‘To leit kloi sha ki lynti bah bad ki lynti rit jong ka nongbah, bad wallam ïa kiba duk, kiba khrew, kiba matlah, bad kiba dkoh.’

²² Shen shen u shakri u la ong, ‘La pyndep ïa ka hukum jong me, ko kynrad, hynrei dang don jaka na ka bynta kiba bun.’

²³ Kumta u kynrad u la ong ha u shakri, ‘Khie leit sha ki lynti bah ha rudnong bad sha ki lynti khim bad ïawer ïa ki briew ban wan shapoh khnang ba ka ïing jong nga kan dap.

²⁴ Nga ong ha phi baroh ba ym don na kito ki rangbah kiba la shah khot sngewbha ki ban ïohmad ïa ka jingbam miet jong nga!’ ”

Ka dor jong ka jinglong synran

²⁵ Shisien mynba ki paidbah babun ki la ïaleit lem bad U Jisu, u la phai sha ki bad u la ong ha ki,

²⁶ “Uno uno uba wan sha nga um lah ban long u synran jong nga lymda u ieit ïa nga kham palat ban ïa kaba u ieit ïa u kpa bad ka kmie jong u, ïa ka tnga bad ki khun jong u, ïa ki hynmen ki para shynrang bad kynthei jong u, bad ïa lade kumjuh.

²⁷ Uno uno u bym bah ïa la ka diengphna bad wan nadien jong nga, um lah ban long u synran jong nga.

²⁸ “Lada uno uno na phi u thmu ban tei ïa ka jaka ap phira, nyngkong u shong bad u kheiñ ïa ka jinglut, ban khmih la u don bun ka pisa ban pyndep ïa ka kam.

²⁹ Lada um don, un ym lah ban tei pyndep ïa ka jaka ap phira hadien ba u la seng nongrim; bad baroh kiba ïohi ïa kaei kaba la jia kin rkhie ïa u.

³⁰ ‘Une u briew u la sdang ban tei hynrei um lah ban pyndep ïa ka kam!’ kin ong.

³¹ “Lada u syiem u mih bad ki shiphew hajar ngut ki rangbah ban ïaleh ïa uwei pat u syiem uba wan pyrshah ïa u lem bad arphew hajar ngut ki rangbah, nyngkong un shong bad rai la u long uba khlaiñ bha ban ïakynduh ïa uwei pat u syiem.

³² Lada um sngewlah, un phah ïa ki nonglamktien ban ïashem ïa uwei pat u syiem, ban kyrpad ïa ki kyndon jingsuk katba u dang jngai bah ha ka lynti.

³³ Ha kajuh ka rukom,” U Jisu u la pynkut, “ym don uno uno na phi uba lah ban long u synran jong nga lymda u iehnoh ïa kiei kiei baroh kiba u don.

Ka mluh ka bymdondor

³⁴ “Ka mluh ka long kaba bha, hynrei lada ka duh noh ïa ka jingmad, ym don lynti shuh da kumno kumno ban pynbang pat ïa ka.

³⁵ Kam long kaba bha ïa ka khyndew lane ïa ka kynton sboh; la bret noh ïa ka. Shahshkor, te, lada phi don ki shkor!”