LEBITIKOS 9 - Khasi CL Bible (BSI)

U Aaron u ai ïa ki jingkñia

¹ Ha ka sngi hadien ba la pyndep ïa ki jinglehniam ka jingpynkyntang, u Moses u khot ïa u Aaron bad ïa ki khun shynrang jong u bad ïa ki nongïalam jong ki Israel.

² U ong ha u Aaron, “Shim ïa uwei u masi lyngraw bad uwei u langbrot ki bym don kano kano ka jingduna bad kñia ïa ki ha U Trai, ïa u masi lyngraw kum ka jingkñia namar ka pop bad ïa u langbrot kum ka jingkñia ainguh thang.

³ Nangta ong ïa ki paid Israel ban wallam ïa uwei u 'langsohmoh ban pynlong ka jingkñia namar ka pop, uwei u khun masi uba shisnem, bad uwei u khunlangbrot uba shisnem, ki bym don kano kano ka jingduna, ban pynlong ka jingkñia ainguh thang,

⁴ bad sa uwei u masi bad uwei u langbrot ban pynlong ka jingkñia ainguh ïasyllok. Dei ban kñia ïa ki ha U Trai ryngkat bad ka jingainguh bam ba la khleh bad ka umphniang. Ki dei ban leh ïa kane namar U Trai un wanpaw ha ki mynta ka sngi.”

⁵ Ki wanlam sha khmat ka Ïingjaiñ ïa kaei kaei baroh kaba u Moses u la hukum, bad ki paidbah baroh ki ïalumlang ban mane ïa U Trai.

⁶ U Moses u ong, “U Trai u la hukum ïa phi ban leh ïa kane baroh, khnang ba ka jingshai batyngshaiñ jong ka jingdon ryngkat jong u kan paw ha phi.”

⁷ Nangta u ong ha u Aaron, “Khie leit sha ka duwan bad kñia ïa ka jingkñia namar ka pop bad ïa ka jingainguh thang ba yn ïohmap ïa ki pop jong phi bad ïa ki pop jong ki paidbah. Leh ïa kane ba yn ïohmap noh ïa ki pop jong ki paidbah, kumba U Trai u la hukum.”

⁸ U Aaron u leit sha ka duwan bad u pynïap ïa uta u masi lyngraw kum ka jingkñia namar ka pop jong u hi.

⁹ Ki khun shynrang jong u ki wanrah ïa ka snam, bad u wieh ïa la ka shynriah'ti ha ka, bad u tah ïa ka ha ki reng kiba ha ki dong jong ka duwan, bad u theh ïa kaba sah baroh ha trai ka duwan.

¹⁰ Nangta u thang ha ka duwan ïa ka khleiñ, ïa ki khyllai, bad ïa ka bynta bakynsai tam jong u dohnud, kumba U Trai u la hukum ïa u Moses.

¹¹ Hynrei ïa ka doh bad ïa ka snieh u thang shabar ka jaka shong dara.

¹² U pynïap ïa u mrad ïa uba la wanlam na ka bynta ka jingkñia ainguh thang jong u hi. Ki khun shynrang jong u ki wanrah ïa ka snam, bad u theh ïa ka sawdong ka duwan.

¹³ Ki ai ha u ïa ka khlieh bad ïa kiwei pat ki lyngkhot doh, bad u thang ïa ki ha ka duwan.

¹⁴ Nangta u sait ïa ki doh jem bad ïa ki kjat-dien bad u thang lang ïa ki ha ka duwan halor kita kiwei pat ki jingkñia ainguh thang.

¹⁵ Hadien kata, u wanlam sa ïa ki jingainguh jong ki paidbah. U shim ïa uta 'langsohmoh ba la wallam na ka bynta ka jingkñia namar ki pop jong ki paidbah, u pynïap ïa u, bad u ainguh ïa u kumba u la leh ïa uta u jingkñia namar ka pop jong u hi.

¹⁶ U wanlam ruh ïa u mrad na ka bynta ka jingkñia ainguh thang, bad u kñia ïa u katba kum ka jingbuhbeit ryntih.

¹⁷ U kñia ïa ka jingainguh bam bad u shim shi kham u purew bad u thang ïa u halor ka duwan. (Kane ka long nalor ka jingainguh thang kaba man ka sngi.)

¹⁸ U pynïap ïa u masi lyngraw bad ïa u langbrot kum ka jingkñia ainguh ïasyllok na ka bynta ki paidbah. Ki khun shynrang jong u ki wanrah ha u ïa ka snam, bad u theh ïa ka sawdong ka duwan.

¹⁹ U Aaron u buh ïa ki bynta bakhleiñ jong u masi lyngraw bad jong u langbrot

²⁰ halor ki shadem jong ki bad u rah ïa ki baroh sha ka duwan. U thang ïa ka khleiñ halor ka duwan,

²¹ bad u ai ïa ki shadem bad ki kjat-dien kamon kum ka jingai kaba kyrpang sha U Trai na ka bynta ki lyngdoh, kumba u Moses u la hukum.

²² Haba u Aaron u la pyndep lut ïa kita ki jingkñia, u rah ïa la ki kti sha uta u paidbah bad u kyrkhu ïa ki; bad nangta u wan hiar noh.

²³ U Moses bad u Aaron ki leit rung shapoh ka Ïingjaiñ ka Jingdon Ryngkat U Trai, bad haba ki mih shabar, ki la kyrkhu ïa u paidbah, bad ka jingshai kaba tyngshaiñ na ka jingdon U Trai ka paw ha u paidbah baroh.

²⁴ Kynsan U Trai u phah ïa ka ding, bad ka bam duh ïa ka jingkñia ainguh thang bad ïa ki bynta bakhleiñ baroh ha ka duwan. Haba ki paidbah ki ïohi ïa kata, ki la ïa-pyrta jam, bad ki ïadem ngon haduh khyndew.