LEBITIKOS 8 - Khasi CL Bible (BSI)

Ka jingpynkyntang ïa u Aaron bad ki khun shynrang jong u

¹ U Trai u ong ha u Moses,

² “Ïalam ïa u Aaron bad ki khun shynrang jong u sha khmat ka jingkhang jong ka Ïingjaiñ ka Jingdon Ryngkat jong nga bad wanrah ïa ki jaiñkup lyngdoh, ka umphniang pynsleh, u masi lyngraw ban long ka jingkñia namar ka pop, ar tylli ki blang shynrang, bad ka shang ba buh ïa u kpu bakhlem thiat.

³ Nangta lumlang ïa u paidbah baroh hangta.”

⁴ U Moses u leh kumba U Trai u la hukum, bad haba ki paidbah ki la ïalumlang,

⁵ u la ong ha ki, “Kaei kaba ngan sa leh ka long ïa kaei kaba U Trai u la hukum.”

⁶ U Moses u wallam ïa u Aaron bad ïa ki khun shynrang jong u sha khmat bad u bthah ïa ki ban sum da ka um.

⁷ U pynphong ïa ka sopti bad pynkup ïa ka barandi ha u Aaron, bad u pynteh ïa u panpoh ha ka syngkai jong u. U pynphong ïa ka ephod ha u, bad u pynskhem ïa ka da kaba teh ïa ki jingteh ba la thain itynnat ha ka syngkai jong u.

⁸ U pyndeng ha u ïa ka jingdeng shadem, bad u buh ha ka ïa u Urim bad u Thummim.

⁹ U buh ïa ka jaiñspong ha ka khlieh jong u, bad ha khmat jong ka u pyndait ïa ka jingdeng ksiar, kaba long ka dak jong ka jingpynkyntang, kumba U Trai u la hukum ïa u.

¹⁰ Nangta u Moses u shim ïa kata ka umphniang pynsleh, bad u buh ïa ka ha ka Ïingjaiñ ka Jingdon Ryngkat U Trai bad baroh kaba don ha ka, bad ha kane ka rukom u pynkyntang ïa ki baroh sha U Trai.

¹¹ U shim ruh khyndiat na kata ka umphniang bad u synreit ïa ka hynñiew sien ha ka duwan bad ki tiar jong ka baroh, bad ha ka dabor bad ka jingpynshong jong ka, khnang ban pynkyntang ïa ki sha U Trai.

¹² U pynkyntang ïa u Aaron da kaba theh khyndiat ïa ka umphniang pynsleh ha ka khlieh jong u.

¹³ Nangta u Moses u wallam ïa ki khun shynrang u Aaron kham sha khmat bad u pynphong sopti ïa ki, u buh ïa ki panpoh sawdong ka syngkai jong ki, bad u pynteh tupia ha ki khlieh jong ki, kumba U Trai u la hukum.

¹⁴ Nangta u Moses u wanlam ïa uta u masi lyngraw ban pynlong ka jingkñia namar ka pop, bad u Aaron bad ki khun shynrang jong u ki buh ïa la ki kti ha ka khlieh jong u.

¹⁵ U Moses u pynïap ïa u, u shim khyndiat ka snam, bad u pyndei ïa ka da la ka shynriah'ti ha ki reng kiba don ha ki dong jong ka duwan, khnang ban pynkyntang ïa ka. Nangta u theh ïa ka snam kaba sah baroh ha trai ka duwan. Ha kane ka rukom u pynkyntang ïa ka bad u pynkhuid ïa ka.

¹⁶ U Moses u shim ïa ka khleiñ baroh kaba don ha ki doh jem, ïa ka bynta kaba kynsai tam jong u dohnud, bad ïa ki khyllai ba sop khleiñ, bad u thang ïa ki baroh ha ka duwan.

¹⁷ U shim ïa kaba sah na u masi lyngraw, ïa ka snieh jong u, ïa ka doh bad ïa ki snier jong u, bad u thang ïa ki shabar ka jaka shong dara, kumba U Trai u la hukum.

¹⁸ Nangta pat, u Moses u wanlam ïa uta u langbrot ban pynlong ka jingkñia ainguh thang, bad u Aaron bad ki khun shynrang jong u ki buh ïa la ki kti ha ka khlieh jong u.

¹⁹ U Moses u pynïap ïa u, bad u theh ïa ka snam ha baroh sawdong jong ka duwan.

^20-21 U ot lyngkhot lyngkhot ïa langbrot, bad u sait ïa ki doh jem bad ki kjat-dien da ka um, bad u thang ïa ka khlieh, ïa ka khleiñ bad ïa ki lyngkhot doh baroh ha ka duwan, kumba U Trai u la hukum. Kane ka jingainguh thang ka long ka jingainguh bam, bad ka jingiw kaba pynsngewbha ïa U Trai.

²² Nangta u Moses u wanlam ïa u langbrot uba ar uba long na ka bynta ka jingpynkyntang ïa ki lyngdoh, bad u Aaron bad ki khun shynrang jong u ki buh ïa la ki kti ha ka khlieh jong u.

²³ U Moses u shim khyndiat ka snam bad u tah ïa ka ha ka shkor kamon jong u Aaron, ha ka 'tikmie ba sha kamon, bad ha ka 'jatkmie ba sha kamon jong u.

²⁴ Nangta u wanlam ïa ki khun shynrang u Aaron kham sha khmat bad u tah ïa kata ka snam ha ki shkor kamon jong ki, ha ki 'tikmie ba sha kamon, bad ha ki 'jatkmie ba sha kamon jong ki. Nangta u Moses u theh ïa ka snam kaba sah ha baroh sawdong ka duwan.

²⁵ U shim ïa ka khleiñ, ïa ka dongnai, ïa ka khleiñ baroh kaba sop ïa ki doh jem, ïa ka bynta kaba kynsai tam jong u dohnud, ïa ki khyllai ba sop khleiñ, bad ïa ka kjat-dien kamon.

²⁶ Nangta u shim ïa uwei u kpu na ka shang ba la buh ïa ki kpu bakhlem thiat ba la pynkyntang sha U Trai, uwei u kpu ba la khleh umphniang, uwei u kpu uba stang, bad u buh ïa ki halor kata ka khleiñ bad ka kjat-dien kamon.

²⁷ U buh ïa kata ka jingbam baroh ha ki kti u Aaron bad ki khun shynrang jong u, bad ki ai ïa kine kum ka jingai kaba kyrpang sha U Trai.

²⁸ Nangta u Moses u shim ïa ka jingbam na ki bad u thang ïa ka ha ka duwan, halor ka jingkñia ainguh thang, kum ka jingainguh jingpynkyntang. Kane ka long ka jingkñia ainguh bam, bad ka jingiw na ka, ka pynsngewbha ïa U Trai.

²⁹ Nangta u Moses u shim ïa ka shadem bad u ai ïa ka kum ka jingai kaba kyrpang ha U Trai. Kata ka long ka bynta jong u Moses na u langbrot ka jingpynkyntang. U Moses u la leh ïa kiei kiei baroh kumba U Trai u la hukum.

³⁰ U Moses u shim ïa ka umphniang pynsleh bad khyndiat ka snam kaba don ha ka duwan bad u synreit ïa ki ha u Aaron bad ha ki khun shynrang jong u bad ha ki jaiñkup jong ki. Ha kane ka rukom u pynkyntang ïa ki bad ïa ki jaiñ jong ki sha U Trai.

³¹ U Moses u ong ha u Aaron bad ha ki khun shynrang jong u, “Rah ïa kane ka doh sha khmat ka jingkhang jong ka Ïingjaiñ ka Jingdon Ryngkat U Trai, shet ïa ka, bad bam hangta ïa ka bad u kpu uba don ha ka shang ba la buh ïa ki jingainguh ka jingpynkyntang, kumba U Trai u la hukum.

³² Thang noh ïa ka doh ne ïa u kpu ba sah baroh.

³³ Hynñiew sngi phim dei ban mih na ka jingkhang ka ïingjaiñ, tat ynda la pyndep lut ïa ki jinglehniam ka jingpynkyntang.

³⁴ U Trai u la hukum ïa ngi ban leh ïa kiei kiei kiba ngi la leh mynta ka sngi, khnang ban map ïa ka pop jong phi.

³⁵ Phi dei ban sah ha khmat ka jingkhang jong ka Ïingjaiñ miet la bad sngi haduh hynñiew sngi, ban leh ïa kata kaba U Trai u la hukum. Lada phim leh kumta, phin ïap. Kane ka long kaba U Trai u la hukum ïa nga.”

³⁶ Kumta u Aaron bad ki khun shynrang jong u ki leh ïa kata baroh kaba U Trai u la hukum lyngba u Moses.