LEBITIKOS 7 - Khasi CL Bible (BSI)

Ki jingkñia namar ka jingleh palat

¹ Kine harum ki long ki jingbuhbeit ryntih kiba ïadei bad ki jingkñia namar ki jingleh palat, kiba khuid bha.

² Ïa u mrad na ka bynta kane ka jingkñia dei ban pynïap ha ka bynta bashatei jong ka duwan, ha kaba ju pynïap ïa ki mrad ba la wallam kum ki jingainguh thang, bad ïa ka snam jong u dei ban synreit ha baroh sawdong jong ka duwan.

³ Ïa ka khleiñ jong u baroh dei ban weng bad ainguh halor kata ka duwan: ka dongnai, ka khleiñ kaba sop ïa ki doh jem,

⁴ ki khyllai bad ka khleiñ kaba sop ïa ki, bad ïa ka bynta kaba kynsai tam jong u dohnud.

⁵ U lyngdoh u dei ban thang ïa kata ka khleiñ baroh halor kata ka duwan kum ka jingainguh bam sha U Trai. Ka dei ka jingkñia namar ka jingleh palat.

⁶ Uno uno u shynrang na ka longïing lyngdoh u lah ban bam ïa ka, hynrei dei ban bam ïa ka ha ka jaka kaba khuid, naba ka long kaba khuid bha.

⁷ Don tang kawei ka aiñ kaba ïadei lang ïa ka jingkñia namar ka pop bad ka jingkñia namar ka jingleh palat: ka doh ka dei jong u lyngdoh uba pyndep ïa ka jingkñia.

⁸ Ka snieh jong u mrad ba la kñia ïa uba la wanrah kum ka jingainguh thang ruh ka dei jong u lyngdoh uba pyndep ïa ka jingkñia.

⁹ Ka jingainguh bam baroh ïa kaba la syang ha dpei, lane ïa kaba la sdieh ha ka karai lane ha u khiew ba la tap ka dei ka jong u lyngdoh uba pyndep ïa ka jingkñia ainguh sha U Blei.

¹⁰ Hynrei ki jingainguh bam baroh ki bym shym la shet, la ki long kiba la khleh ne kiba khlem khleh umphniang, ki dei jong ki lyngdoh na ka ïing u Aaron, bad ki dei ban ïasam lang mar katjuh.

Ki jingainguh ïasyllok

¹¹ Kine ki long ki jingbuhbeit ryntih kiba ïadei bad ki jingainguh ïasyllok ïa kiba wanrah sha U Trai.

¹² Lada u briew u wallam ïa kane ka jingainguh kum ka jingai sngewnguh sha U Blei, u dei ruh ban wanrah, ryngkat bad uta u mrad ïa uba yn kñia, ïa ka jingainguh ïa u kpu bakhlem thiat: ki kpu kiba rben ba la khleh bad ka umphniang Olib lane kiba stang ba la kyllan da ka umphniang Olib lane da u 'purew ba la shet khleh bad ka umphniang Olib.

¹³ Nalor kita, u dei ruh ban wanrah kum ka jingainguh ïa ki kpu ba la khleh thiat.

¹⁴ U dei ban wallam shi bynta na uwei pa uwei u jait kpu kum ka jingai kaba kyrpang sha U Trai; kata ka dei ka bynta jong u lyngdoh uba shim ïa ka snam jong u mrad bad uba theh ïa ka sawdong ka duwan.

¹⁵ Ïa ka doh jong uta u mrad dei ban bam noh ha kata hi ka sngi ba la kñia ïa u; ym dei ban pynsah wat tang khyndiat ruh haduh ka step kaba bud.

¹⁶ Lada u briew u wanlam ïa ka jingainguh ïasyllok ban pyndep ïa la ka jingkular lane kum ka jingainguh mon sngewbha jong u hi, ym da donkam ban bam lut ïa ka ha kajuh ka sngi ba la kñia; hynrei ïa kaba sah lah ban bam ha ka sngi kaba bud.

¹⁷ Ïa kano kano ka doh kaba sah haduh ka sngi kaba lai dei ban thang noh ïa ka.

¹⁸ Lada la bam ïa ka ha ka sngi kaba lai, U Blei un ym pdiang ïa ka jingainguh jong uta u briew. Ïa kata ka jingainguh yn ym ñiew kum ka jingainguh jong u hynrei yn kheiñ ba ka long ka bymkhuid, bad uno uno uba bam ïa ka un kit hi ïa la ka pop.

¹⁹ Lada ka doh kaba la kum dei bad kaei kaei ïa kaba la ñiew bymkhuid, ym dei ban bam, hynrei ban thang noh ïa ka. Uno uno ïa uba la ñiew ba u long uba khuid u lah ban bam ïa ka doh,

²⁰ hynrei uno uno ïa uba la ñiew bymkhuid u bam ïa ka, yn ym ñiew shuh ïa u kum uwei na ki briew U Blei.

²¹ Shuh shuh, lada uno uno u bam ïa ka doh jong kane ka jingainguh hadien ba u la ktah ïa kaei kaei ka bymkhuid, la ka dei kaba na u briew ne na u mrad, ïa u ruh yn ym ñiew shuh kum uwei na ki briew U Blei.

²² U Trai u la ai ha u Moses ïa kine harum ki jingbuhbeit ryntih na ka bynta ki paid Israel.

²³ Ym dei ban bam ïa ka khleiñ jong ki masi, ki langbrot, ne ki blang.

²⁴ Ïa ka khleiñ jong uno uno u jait mrad uba shu ïap hi ne uba la shah pynïap ha u mradkhlaw ym dei ban bam, hynrei lah ban pyndonkam na ka bynta kiwei pat ki jingthmu.

²⁵ Uno uno uba bam ïa ka khleiñ jong u mrad ïa uba wanlam kum ka jingainguh bam sha U Trai yn ym ñiew shuh ïa u kum uwei na ki briew jong U Blei.

²⁶ Kam pher la hangno hangno ki Israel ki shong ki sah, kim dei da lei lei ban pyndonkam ïa ka snam jong ki sim ne ki mrad kum ka jingbam.

²⁷ Uta uba pynkheiñ ïa kane ka aiñ yn ym ñiew shuh kum uwei na ki briew U Blei.

²⁸ U Trai u la ai ha u Moses ïa kine harum ki jingbuhbeit ryntih na ka bynta ki paid Israel.

²⁹ Uno uno uba wallam ïa ka jingainguh ïasyllok u dei ban wanrah ruh shi bynta na ka kum ka jingai kaba kyrpang sha U Trai, da kaba wanrah hi ïa ka da la ki kti kum ka jingainguh bam.

³⁰ Un wallam ïa ka khleiñ lem bad ka shadem jong u mrad ban ai kum ka jingai kaba kyrpang sha U Trai.

³¹ U lyngdoh un thang ïa kata ka khleiñ ha ka duwan, hynrei kata ka shadem kan dei jong ki lyngdoh.

³² Ïa ka kjat-dien kamon jong u mrad yn ai kum ka jingai kaba kyrpang

³³ ha u lyngdoh uba kñia ïa ka snam bad ïa ka khleiñ jong ka jingainguh ïasyllok.

³⁴ Ka shadem jong u mrad ka long ka jingai kaba kyrpang, bad ka kjat-dien kamon ka long ka jingai kaba kyrpang kaba U Trai u la shim na ki paid Israel bad ban ai ha ki lyngdoh. Kane ka long kaba ki paid Israel ki dei ban ai ha ki lyngdoh pateng la pateng.

³⁵ Kane ka long ka bynta jong ka jingbam ba la ainguh sha U Trai ïa kaba la ai ha u Aaron bad ki khun jong u ha kata ka sngi ba pynkyntang ïa ki kum ki lyngdoh.

³⁶ Ha kata ka sngi U Trai u la hukum ïa ki paid Israel ban ai ïa kane ka bynta jong ka jingainguh. Ka dei ka aiñ ba ki paid Israel ki dei ban kohnguh pateng la pateng.

³⁷ Kine keiñ ki long kita ki jingbuhbeit ryntih kiba ïadei bad ki jingainguh thang, ki jingainguh bam, ki jingkñia namar ka pop, ki jingkñia namar ka jingleh palat, ki jingkñia pynkyntang, bad ki jingainguh ïasyllok.

³⁸ Hangta halor u Lum Sinai ha ka ri shyiap, U Trai u la ai ïa kine ki hukum ha u Moses ha kata ka sngi ba u la ong ïa ki paid Israel ban wallam ïa ki jingainguh jong ki.