LEBITIKOS 6 - Khasi CL Bible (BSI)

¹ U Trai u ai ha u Moses ïa kine harum ki jingbuhbeit ryntih.

² Dei ban ai ïa ka jingkñia lada uno uno u leh pop pyrshah ïa U Trai da kaba kyntait ban pynphai ïa kaei kaba u para Israel u la phah buh ha u lane da kaba tuh na u lane da kaba u shukor ïa u

³ lane da kaba thok shaphang kano kano ba ka la jah noh bad u smai ba um shym shem pat ïa ka.

^4-5 Haba u briew u leh pop ha kano kano na kine, u dei ban siew pat ïa kata baroh kaba u la ïoh da ki lad bymdei. Ha kata ka sngi ba la lap ba u la leh pop, u dei ban pynphai pura sha u trai, lem bad arphew bynta na ka shispah.

⁶ U dei ruh ban wallam sha u lyngdoh kum ka jingkñia namar ka jingleh palat sha U Trai, ïa u langbrot ne u 'langsohmoh u bym don kano kano ka jingduna. Ka jingpynshong dor kan long kat kum ba la buh.

⁷ U lyngdoh un ai ïa ka jingkñia namar ka pop jong uta u briew bad yn map ïa u.

Ki jingkñia kiba yn thang lut

⁸ U Trai u hukum ïa u Moses,

⁹ ban ai ha u Aaron bad ki khun shynrang jong u ïa kine harum ki jingbuhbeit ryntih kiba ïadei bad ka jingainguh thang. Ïa ka jingainguh thang dei ban ieh halor ka duwan baroh shi miet, bad hangta ka ding ruh ka dei ban ïai meh.

¹⁰ Nangta u lyngdoh, uba kup ïa ka jaiñkup linen bad uba phong ïa ka patlun linen kaba lyngkot, un weng noh ïa u dpei khleiñ ba sah ha ka duwan bad un buh ïa u harud jong ka duwan.

¹¹ Nangta un leit pli ïa la ki jaiñ bad un rah ïa uta u dpei shabar ka jaka shong dara, sha ka jaka lehniam bakhuid.

¹² Ïa ka ding halor ka duwan dei ban ïai pynmeh bad ym dei ban shah ba kan lip noh. Man la ka step u lyngdoh un buh diengïap ha ka, un pynbeit ïa ka jingainguh thang halor jong ka, bad un thang ruh ïa ka khleiñ jong ka jingainguh ïasyllok.

¹³ Ka ding ka dei ban ïai meh lynter halor ka duwan bad ym dei ban shah ba kan lip noh.

Ki jingkñia ainguh bam

¹⁴ Kine ki long ki jingbuhbeit ryntih kiba ïadei bad ki jingainguh bam. U lyngdoh na ki khun shynrang u Aaron un wallam ïa ka jingainguh bam sha U Trai ha khmat ka duwan.

¹⁵ Nangta un shim shi kham u 'purew bad ka umphniang, bad ïa ka jingiwbih halor jong ka, bad un thang ha ka duwan kum ka dak ba ïa kata baroh la kñia ainguh ha U Trai. Ka jingiw na kane ka jingainguh ka long kaba pynsngewbha ïa U Trai.

^16-17 Ki lyngdoh kin bam ïa kaba sah baroh. Yn pynlong ïa u kpu ba la shet khlem thiat bad ban bam ha ka jaka bakhuid, ka phyllaw jong ka Ïingjaiñ ka Jingdon Ryngkat U Trai. U Trai u la ai ha ki lyngdoh kum ka bynta jong ki na kata ka jingainguh bam. Ka long kaba khuid, kumba long ki jingainguh namar ka pop bad ki jingainguh namar ki jingleh palat.

¹⁸ Ha ki por ki ban wan baroh uno uno na ki shynrang kiba hiarpateng na u Aaron ki lah ban bam ïa ka pateng la pateng kum ka bynta na ki jingkñia ainguh bam sha U Trai. Uno uno uwei pat uba ktah ïa ka jingainguh bam un mynsaw na ka bor ka jingkhuid jong ka.

¹⁹ U Trai u ai ha u Moses ïa kine harum ki jingbuhbeit ryntih

²⁰ na ka bynta ka jingpynsleh lyngdoh ïa kiba hiarpateng na u Aaron. Ha ka sngi ba yn pynkyntang ïa u, un ai kum ka jingainguh sha U Trai shi kilo u 'purew (kaba ïaryngkat bad ka jingainguh bam ba man ka sngi), shiteng ha ka por mynstep bad shiteng ha ka por janmiet.

²¹ Dei ban khleh ïa u bad ka umphniang bad shet ha u khiew ba la tap bad nangta dei ban pynlwet ïa u bad ai kum ka jingainguh bam, ka jingiw kaba pynsngewbha ïa U Trai.

²² Na ka bynta ka por baroh ka ban sa wan ïa kane ka jingkñia ainguh dei ban leh da uwei pa uwei u Lyngdoh uba hiarpateng na u Aaron u ban shakri kum u Rangbah Lyngdoh. Dei ba yn thang lut khoit ïa ka kum ka jingkñia sha U Trai.

²³ Ym dei ban bam ïa kano kano ka bynta jong ka jingainguh bam ba u lyngdoh u wanrah, ïa baroh dei ban thang lut khoit.

Ki jingkñia namar ka pop

²⁴ U Trai u hukum ïa u Moses

²⁵ ban ai ha u Aaron bad ha ki khun jong u ïa kine harum ki jingbuhbeit ryntih kiba ïadei bad ka jingkñia namar ka pop. Ïa u mrad ba la wanrah kum ka jingkñia namar ka pop dei ban pynïap ha ka bynta bashatei jong ka duwan, ha kaba ju pynïap ïa ki mrad na ka bynta ki jingainguh thang. Kane ka long ka jingainguh kaba khuid bha.

²⁶ U lyngdoh uba kñia ïa uta u mrad un bam ïa u ha ka jaka bakhuid, ha ka phyllaw jong ka Ïingjaiñ ka Jingdon Ryngkat U Trai.

²⁷ Uno uno ne uei uei uba ktah ïa ka doh jong uta u jingkñia un mynsaw da ka bor jong ka jingkhuid jong ka. Lada kano kano ka bynta jong jaiñkup ka bit snam na uta u jingkñia, dei ban sait ïa ka ha ka jaka bakhuid.

²⁸ Ïa u khiew khyndew ha kaba la shet ïa ka doh dei ban pynpait noh ïa u, bad lada dei u khiew shet da ka rnong, dei ban da kyrshut bha ïa u bad phler da ka um.

²⁹ Uno uno u shynrang uba na ka longïing u lyngdoh u lah ban bam ïa kane ka jingainguh; ka dei kaba khuid bha.

³⁰ Hynrei lada wanrah wat tang khyndiat na ka snam shapoh ka Ïingjaiñ bad pyndonkam ïa ka ha kaba lehniam ban ïohmap ïa ki pop, ïa u mrad ym dei ban bam; dei ban thang lut khoit ïa u.