LEBITIKOS 5 - Khasi CL Bible (BSI)

Ki jingleh kiba donkam ïa ka jingkñia namar ka pop

¹ Ki Jingkñia namar ka Pop ki donkam na ka bynta kine ki jingleh. Lada uno uno u shah khot da ki bor ba-halor ban ai sakhi ha ka ïingbishar bad um ïathuh ei ei ïa kata kaba u la ïohi ne u la ïohsngew, u dei ban kit hi ïa kaba mih nangta.

² Lada uno uno u kum ktah ïa kaei kaei kaba la ñiew bymkhuid, kum ïa ka mrad ba la ïap, u long u bymkhuid bad ba la rem mar ïasngewthuh ïa kaei ba u la leh.

³ Lada uno uno u kum ktah ïa kaei kaei ka bymkhuid kaba mih na u briew, la ka long kaba kumno kumno, u long uba la rem hi mar ïasngewthuh ïa kaei ba u la leh.

⁴ Lada uno uno u smai khlem da pyrkhat, kam pher la ka long ïa kano kano, u long uba la rem mar ïasngewthuh ïa kaei ba u la leh.

⁵ Haba u briew u hap ha ka jingpynrem, u dei ban phla ïa kata ka pop,

⁶ bad kum ka bainong namar ka pop jong u, u dei ban wallam sha U Trai ïa ka langbrot ne ka blang kynthei kum ka jingainguh. U lyngdoh un ai ïa ka jingkñia namar ka pop jong uta u briew.

⁷ Lada u briew um kotbor ban wallam da ka langbrot ne da ka blang, un wanrah sha U Trai ar tylli ki paro ne ar tylli ki lyngdkhur kum ka jingpli ïa la ka pop, kawei na ka bynta ka jingkñia namar ka pop bad kawei pat na ka bynta ka jingkñia ainguh thang.

⁸ Un wanrah ïa ki ha u lyngdoh, u ban kñia shuwa ïa ka sim na ka bynta ka jingkñia namar ka pop. Un khyrwait ïa ka ryndang jong ka khlem da pyndkut ïa ka khlieh na ka,

⁹ bad un synreit khyndiat ïa ka snam jong ka ha ka krung jong ka duwan. Ïa ka snam kaba dang sah yn pjiar ha trai ka duwan. Kane ka long ka jingkñia ban map ïa ka pop.

¹⁰ Nangta un kñia ïa kaba ar kum ka jingainguh thang, kat kum ki jingbuhbeit ryntih. Ha kane ka rukom u lyngdoh un ai ïa ka jingkñia na ka bynta ka pop jong uta u briew bad yn map ïa u.

¹¹ Lada u briew um kotbor ban wanrah ar tylli ki paro ne ar tylli ki lyngdkhur, un wallam shi kilo u 'purew kum ka jingkñia namar ka pop. Um dei ban theh kano kano ka umphniang Olib ne kano kano ka jingiwbih halor jong u, namar ka dei ka jingkñia namar ka pop, ym ka jingkñia bam.

¹² Un wanrah ïa u ha u lyngdoh, u ban shim shi kham na u kum ka dak ba la ainguh sha U Trai, bad un thang ïa u ha ka duwan kum ka jingkñia ainguh bam. Ka long ka jingkñia ban pynkhuid ïa ka pop.

¹³ Ha kane ka rukom u lyngdoh un ai ïa ka jingkñia namar ka pop ba uta u briew u la leh, bad yn map ïa u. U purew uba dang sah un long jong u lyngdoh, kumba ka long ha ka jingkñia ainguh bam.

Ka jingkñia namar ka jingleh palat

¹⁴ U Trai u ai ha u Moses ïa kine harum ki jingbuhbeit ryntih.

¹⁵ Lada uno uno u leh pop khlem tip da kaba kum klet ban wan ai ïa ka jingsiew ba long kyntang sha U Trai, un wallam ïa ka jingkñia namar ka jingleh palat sha U Trai da u langbrot ne u 'langsohmoh u bym don kano kano ka jingduna. Ka jingpynshong dor ïa u kan long kumba la buh.

¹⁶ U dei ban siew ïa kata baroh ïa kaba u la klet ban wallam bad un siew tam arphew bynta na ka shispah. Un ai ïa kata ha u lyngdoh, bad u lyngdoh un ai ïa ka jingkñia da uta u mrad namar ka pop jong uta u briew bad yn map ïa u.

¹⁷ Lada uno uno u leh pop khlem tip da kaba u pynkheiñ ïa kano kano ka hukum U Trai, u long uba la rem bad u dei ban ïoh ïa ka bainong.

¹⁸ U dei ban wanlam sha u lyngdoh kum ïa ka jingkñia namar ka jingleh palat da u langbrot ne u 'langsohmoh u bym don kano kano ka jingduna. Ka jingpynshong dor ïa u kan long kat kum ba la buh. U lyngdoh un ai ïa ka jingkñia namar ka pop jong uta u briew bad yn map ïa u.

¹⁹ Kane ka long ka jingkñia namar ka jingleh palat ïa ka pop pyrshah ïa U Trai.