LEBITIKOS 4 - Khasi CL Bible (BSI)

Ki jingkñia ainguh namar ki pop ba leh da ka jingbymtip

¹ U Trai u hukum ïa u Moses

² ban ïathuh ha ki Israel ba uno uno u briew uba leh pop khlem tip bad u pynkheiñ ïa kano kano ka hukum U Trai, u dei ban bud ïa kine ki aiñ harum.

³ Lada dei u Rangbah Lyngdoh uba leh pop bad da kumta u wanrah ïa ka jingpynrem ha ki paidbah, un ai ïa u masi lyngraw u bym don kano kano ka jingduna bad un kñia sha U Trai namar ka pop jong u.

⁴ Un wanlam ïa uta u masi sha ka jingkhang ka Ïingjaiñ, un buh ïa la ka kti ha ka khlieh jong u, bad un pynïap ïa u hangta ha ka jingdon ryngkat U Trai.

⁵ Nangta u Rangbah Lyngdoh un shim khyndiat ka snam jong uta u masi bad rah ïa ka shapoh ka Ïingjaiñ.

⁶ Un wieh ïa la ka shynriah'ti ha kata ka snam bad synreit ïa ka hynñiew sien ha khmat ka jingkah jong ka Jaka Kyntang.

⁷ Nangta un tah snam khyndiat ha ki reng kiba don ha ki dong jong ka duwan ka jingiwbih thang kaba hapoh ka Ïingjaiñ. U dei ban theh ïa ka snam kaba sah, ha trai ka duwan ki jingkñia ainguh thang kiba don ha khmat jingkhang jong ka Ïingjaiñ.

⁸ Na uta u masi un shim noh ïa ka khleiñ baroh, ïa ka khleiñ kaba sop ïa ki snier,

⁹ ki khyllai bad ka khleiñ kaba sop ïa ki, bad ïa ka bynta kaba kynsai tam jong u dohnud.

¹⁰ U lyngdoh un shim ïa kane ka khleiñ bad un thang ha ka duwan ka jingkñia ainguh thang, kumba u ju leh ïa ka khleiñ na u mrad ba la pynïap na ka bynta ka jingainguh ïasyllok.

¹¹ Hynrei un shim ïa ka snieh, ïa ka doh met, ïa ka khlieh, ïa ki kjat, bad ïa ki doh jem ba kynthup ïa ki snier,

¹² un rah ïa ki shabar ka jaka shong dara sha ka jaka lehniam bakhuid ha kaba yn theh ïa u dpei, bad hangta un thang ha ka kynton diengïap.

¹³ Lada dei u paid Israel baroh uba leh pop khlem tip bad u hap ha ka jingpynrem ba u la pynkheiñ ïa kawei na ki hukum U Trai,

¹⁴ kumta haba la bna ïa kata ka pop, u paidlang un wanlam ïa u masi lyngraw kum ka jingainguh namar ka pop. Kin wanrah sha ka Ïingjaiñ ka Jingdon Ryngkat U Trai.

¹⁵ Ki nongïalam jong uta u paidlang kin buh ïa la ki kti ha ka khlieh jong u, bad kin pynïap ïa u hangta.

¹⁶ U Rangbah Lyngdoh un rah khyndiat ka snam jong uta u masi shapoh ka Ïingjaiñ,

¹⁷ un wieh ïa la ka shynriah'ti ha kata ka snam, bad un synreit ïa ka hynñiew sien ha khmat ka jingkah jong ka Jaka Kyntang.

¹⁸ Un tah snam khyndiat ha ki reng kiba don ha ki dong jong ka duwan ka jingiwbih thang kaba hapoh ka ïingjaiñ bad un theh ïa ka snam kaba sah, ha trai ka duwan ki jingkñia ainguh thang, kiba don ha khmat ka jingkhang jong ka Ïingjaiñ.

¹⁹ Nangta un shim ïa ka khleiñ jong u baroh bad thang halor ka duwan.

²⁰ Un leh kumjuh ïa une u masi lyngraw kumba u ju leh ïa u masi lyngraw jong ka jingkñia ainguh namar ka pop, bad ha kane ka rukom un pyndep ïa ka jingkñia namar ka pop jong uta u paidlang, bad yn map ïa ki.

²¹ Nangta un shim ïa uta u masi lyngraw shabar ka jaka shong dara bad thang ïa u kumba u thang ïa u masi lyngraw ïa uba la kñia ainguh namar la ka jong ka pop. Kane ka long ka jingkñia ainguh ban map noh ïa ka pop jong uta u paidlang.

²² Lada u dei u nongsynshar uba leh pop khlem tip bad u hap ha ka jingpynrem ba u la pynkheiñ ïa kawei na ki hukum U Trai,

²³ kumta mar ïatip ïa kata ka pop, un wallam kum ka jingainguh jong u ïa u 'langsohmoh u bym don kano kano ka jingduna.

²⁴ Un buh ïa la ka kti ha ka khlieh jong u bad un pynïap ïa u ha ka phang kaba shatei jong ka duwan, ha ka jaka ba ki ju pynïap ïa ki mrad na ka bynta ki jingkñia ainguh thang. Kane ka long ka jingkñia ainguh ban map noh ïa ka pop.

²⁵ U lyngdoh un wieh ïa la ka shynriah'ti ha ka snam jong uta u mrad, un tah ïa ka ha ki reng kiba don ha ki dong jong ka duwan, bad un theh ïa kaba sah, ha trai jong kata ka duwan.

²⁶ Nangta un thang ïa ka khleiñ jong u baroh halor ka duwan, kumba ju thang ïa ka khleiñ jong ki mrad ba la pynïap na ka bynta ki jingainguh ïasyllok. Ha kane ka rukom u lyngdoh un ai ïa ka jingkñia namar ka pop jong uta u nongsynshar, bad yn map ïa u.

²⁷ Lada dei uwei na ki riewpaidbah uba leh pop khlem tip bad u long uba la rem ba u pynkheiñ ïa kawei na ki hukum U Trai,

²⁸ te un tang shu tip ba u la leh pop kumta, un wallam kum ka jingainguh jong u ïa ka blang kynthei ka bym don kano kano ka jingduna.

²⁹ Un buh ïa la ka kti ha ka khlieh jong ka bad un pynïap ïa ka ha ka phang kaba shatei jong ka duwan, ha ka jaka ba ju pynïap ïa ki mrad na ka bynta ki jingkñia ainguh thang.

³⁰ U lyngdoh un wieh ïa la ka shynriah'ti ha ka snam jong kata ka mrad, un tah ïa ka ha ki reng kiba don ha ki dong jong ka duwan, bad un theh ïa kaba sah, ha trai ka duwan.

³¹ Nangta un weng ïa ka khleiñ jong ka baroh, kumba ju weng ïa ka khleiñ na ki mrad ba la pynïap na ka bynta ki jingainguh ïasyllok, bad un thang ïa ka ha ka duwan, khnang ba ka jingiw na ka kan pynsngewbha ïa U Trai. Ha kane ka rukom u lyngdoh un ai ïa ka jingkñia namar ka pop jong uta u briew, bad yn map ïa u.

³² Lada u briew u wallam ïa ka langbrot kum ka jingainguh namar ka pop, ka dei ban long ka langbrot ka bym don kano kano ka jingduna.

³³ Un buh ïa la ka kti ha ka khlieh jong ka bad un pynïap ïa ka ha ka phang kaba shatei jong ka duwan, ha ka jaka ba ki ju pynïap ïa ki mrad na ka bynta ki jingkñia ainguh thang.

³⁴ U lyngdoh un wieh ïa la ka shynriah'ti ha ka snam jong kata ka mrad, un tah ïa ka ha ki reng kiba don ha ki dong jong ka duwan, bad un theh ïa kaba sah, ha trai ka duwan.

³⁵ Nangta un weng ïa ka khleiñ jong ka baroh, kumba ju weng ïa ka khleiñ na ki langbrot ba la pynïap na ka bynta ki jingainguh ïasyllok, bad un thang ïa ka ha ka duwan lem bad ki jingainguh bam ba ai sha U Trai. Ha kane ka rukom u lyngdoh un ai ïa ka jingkñia namar ka pop jong uta u briew bad yn map ïa u.