LEBITIKOS 3 - Khasi CL Bible (BSI)

Ki jingainguh ïasyllok

¹ Haba uno uno u ai jingkñia ïa uwei na ki masi jong u kum ka jingainguh ïasyllok, ka dei ban long da u shynrang ne ka kynthei ki bym don kano kano ka jingduna.

² Uta u briew un buh ïa la ka kti ha ka khlieh jong uta u mrad bad un pynïap ïa u ha ka jingkhang jong ka Ïingjaiñ ka Jingdon Ryngkat U Trai.

³ Ki lyngdoh na ka ïing u Aaron kin synreit ïa ka snam sawdong ka duwan, bad kin ai ïa kine ki dkhot met jong uta u mrad kum ka jingainguh bam sha U Trai:

⁴ baroh ka khleiñ kaba sop ïa ki snier, ki khyllai bad ka khleiñ kaba sop ïa ki, bad ka bynta kaba bha tam jong u dohnud.

⁵ Ki lyngdoh kin thang ïa kine baroh ha ka duwan ryngkat bad ka jingainguh thang. Ka jingiw jong kane ka jingainguh bam ka long kaba pynsngewbha ïa U Trai.

⁶ Lada u wallam ïa u langbrot ne u 'langsohmoh kum ka jingainguh ïasyllok, u lah ban long da u shynrang ne ka kynthei kiba khlem kano kano ka jingduna.

⁷ Lada u briew u ainguh da u langbrot, un buh ïa la ka kti ha ka khlieh jong u bad pynïap ïa u ha khmat ka Ïingjaiñ.

⁸ Ki lyngdoh kin synreit ïa ka snam jong u sawdong ka duwan, bad un ai ïa kine ki dkhot met jong u kum ka jingainguh bam sha U Trai:

⁹ ka khleiñ, ka dongnai baroh ba la ot najan u budlum, ka khleiñ baroh kaba sop ïa ki snier,

¹⁰ ki khyllai bad ka khleiñ kaba sop ïa ki, bad ïa ka bynta kaba bha tam jong u dohnud.

¹¹ U lyngdoh uba ïarap un thang ïa kine baroh halor ka duwan kum ka jingainguh bam sha U Trai.

¹² Lada u briew u wan ainguh da u 'langsohmoh,

¹³ un buh ïa la ka kti ha ka khlieh jong u, bad pynïap ïa u ha khmat ka Ïingjaiñ. Ki lyngdoh kin synreit ïa ka snam jong u sawdong ka duwan,

¹⁴ bad ai ïa kine ki dkhot met jong u kum ka jingainguh bam sha U Trai: ka khleiñ baroh kaba sop ïa ki snier,

¹⁵ ki khyllai bad ka khleiñ kaba sop ïa ki, bad ka bynta kaba bha tam jong u dohnud.

¹⁶ U lyngdoh un thang ïa kine baroh halor ka duwan kum ka jingainguh bam kaba pynsngewbha ïa U Trai. Ka khleiñ baroh ka dei ka jong U Trai.

¹⁷ Ki Israel kim bit ban bam ïa ka khleiñ ne ïa ka snam; kane ka dei ka aiñ ba baroh ki Israel kin bat shi junom kat shaba ki shong ki sah.