LEBITIKOS 27 - Khasi CL Bible (BSI)

Ki Aiñ kiba ïadei bad ki jingai sha U Trai

¹ U Trai u ai ha u Moses ïa ki jingbuhbeit ryntih ha ki paid Israel kumne harum.

² Haba la ai ïa uno uno u briew sha U Trai kum ka jingpyndep ïa ka kular kaba kyrpang, ïa uta u briew lah ban pyllait pat ïa u da ka jingsiew kat kum ka dor ka pisa kumne harum,

^3-7 kumba la pynshong ïa ka: — ïa u shynrang uba la rangbah, arphew snem haduh hynriewphew snem ka rta: 50 lyngkhot ka rupa — ïa ka kynthei kaba la ïaw: 30 lyngkhot ka rupa — ïa u shynrang uba kham khynnah, san snem haduh arphew snem ka rta: 20 lyngkhot ka rupa — ïa ka kynthei pat: 10 lyngkhot ka rupa — ïa u shynrang uba hapoh kaba san snem ka rta: 5 lyngkhot ka rupa — ïa ka kynthei kaba kham khynnah: 3 lyngkhot ka rupa — ïa u shynrang uba la palat hynriewphew snem: 15 lyngkhot ka rupa — ïa ka kynthei kaba la palat hynriewphew snem: 10 lyngkhot ka rupa.

⁸ Lada uta u briew uba ai ïa ka kular um kotbor ban siew ïa kata ka dor kumba la pynshong, yn wan ïalam ïa uta u briew sha u lyngdoh, bad u lyngdoh un pynduna ïa ka dor kat kum ka bor ba u briew u lah ban siew.

⁹ Lada ka jingkular shaphang u mrad ka long kaba lah ban pdiang kum ka jingainguh sha U Trai, te kum kata ka jingai sha U Trai ka long kaba kyntang,

¹⁰ bad u briew uba pynlong ka jingkular um dei ban bujli da uwei pat u mrad na ka bynta kata. Lada u leh kumta, kita ki mrad baroh ar ki long ki jong U Trai.

¹¹ Hynrei lada ka jingkular shaphang u mrad uba la ñiew bymkhuid, ïa u bym lah ban pdiang kum ka jingainguh sha U Trai, uta u briew u dei ban wallam ïa uta u mrad sha u lyngdoh.

¹² U lyngdoh un buh dor ïa u, kat kum ka jinglong bha ne jinglong sniew, bad ïa kata ka dor ym lah shuh ban pynkylla.

¹³ Lada uta u briew u kwah ban thied pat ïa u, u dei ban siew ïa ka dor lem bad ka bynta kaba arphew na ka shispah.

¹⁴ Haba uno uno u briew u pynkyntang ïa la ka ïing ha U Trai, u lyngdoh un pynshongdor ïa ka kat kum ka jingbha ne ka jingsniew jong ka, bad ïa kata ka dor ym lah shuh ban pynkylla.

¹⁵ Lada uta u briew uba pynkyntang ïa la ka ïing u kwah ban thied pat ïa ka, u dei ban siew ïa ka dor lem bad ka bynta kaba arphew na ka shispah.

¹⁶ Lada u briew u pynkyntang sha U Trai shi lyngkhot na ka lyngkha jong u, ïa ka dor dei ban pynshong kat kum ka jingbun u symbai u ban bet ha ka, ha ka dor shiphew lyngkhot ka rupa na ka bynta man la ka arphew kilo u barli.

¹⁷ Lada u la pynkyntang ïa kata ka khyndew khyndiat por hadien ka Snem ka Jingpynphai pat, dei ban pynshongdor pura ïa ka.

¹⁸ Lada pynkyntang ïa ka hadien kata ka snem, u lyngdoh un kheiñ dor ïa ka kat kum ka jingdon ki snem kiba dang sah haduh kawei pat ka Snem ka Jingpynphai pat, bad un kham pynduna ïa ka dor jong ka.

¹⁹ Lada u briew uba pynkyntang ïa ka lyngkha u kwah ban thied pat ïa ka, u dei ban siew ïa ka dor lem bad ka bynta kaba arphew na ka shispah.

²⁰ Lada u die ïa kata ka lyngkha ha uwei pat u briew khlem da thied biang ïa ka na U Trai, u duh noh ïa ka hok ban thied pat ïa ka.

²¹ Ha kawei pat ka Snem ka Jingpynphai pat, kata ka lyngkha kan long ka jaka jong U Trai junom; kan long noh ka jong ki lyngdoh.

²² Lada u briew u pynkyntang sha U Trai ïa ka lyngkha kaba u la thied,

²³ u lyngdoh un pynshongdor ïa ka kat kum ka jingdon ki snem kiba dang sah haduh kawei pat ka Snem ka Jingpynphai pat, bad uta u briew u dei ban siew ïa kata ka dor ha kata hi ka sngi; kata ka pisa ka dei ka jong U Trai.

²⁴ Ha ka Snem ka Jingpynphai pat, yn pynphai noh pat ïa kata ka lyngkha sha uta u briew na uba la thied nyngkong ïa ka, ne sha ki khun ki ksiew jong u.

²⁵ Ïa ka dor baroh yn kheiñ kat kum ka dor ba la pynshong.

²⁶ Uba la kha nyngkong na u jingri, u la long lypa u jong U Trai, kumta uno uno um lah ban pynkyntang ïa u sha U Trai kum ka jingainguh mon sngewbha. U khun masi, u khunlangbrot ne u khunblang u long u jong U Trai,

²⁷ hynrei ïa uba la kha nyngkong na u jingri u bymkhuid, dei ban thied pat ha ka dor ba la pynshong, lem bad ka bynta kaba arphew na ka shispah. Lada ym don ba thied pat ïa u, dei ban die ïa u ha uno uno u briew ha ka dor ba la pynshong.

²⁸ Uno uno um lah ban die lane thied pat ïa kata kaba u la pynkyntang khlem buh kyndon sha U Trai, la ka dei ïa u briew lane ïa u mrad, lane ïa ka lyngkha. Kata ka long ka jong U Trai junom.

²⁹ Wat ïa u briew hi, ïa uba la pynkyntang khlem buh kyndon, ym lah shuh ban thied pat; u dei ban shah pynïap.

³⁰ Kawei na ka shiphew na ka jingmih baroh na ka khyndew, la ka dei u kew ne u soh, ka long ka jong U Trai.

³¹ Lada u briew u kwah ban thied pat ïa ka, u dei ban siew ïa ka dor ba la pynshong lem bad ka bynta kaba arphew na ka shispah.

³² Uwei na man la ki shiphew tylli ki mrad ba ri u long u jong U Trai. Haba la ñiew ïa ki mrad, man la uba shiphew, uwei u long u jong U Trai.

³³ Uta u trai jingri um dei ban pynbeit ïa ki mrad ha kata ka rukom ba ki mrad kiba sniew ki shah jied, bad um lah ruh ban bujli ïa ki. Lada u bujli ïa u mrad na ka bynta uwei pat, te kita baroh ar kin long ki jong U Trai, bad um lah ban thied pat ïa ki.

³⁴ Kine ki long ki hukum ba U Trai u la ai ha u Moses ha u Lum Sinai na ka bynta ki paid Israel.