LEBITIKOS 26 - Khasi CL Bible (BSI)

Ki jingkyrkhu namar ka jingkohnguh

¹ U Trai u ong, “Wat thaw ki bleithaw lane pynïeng durblei, ki païa maw, lane ohdur ha ki maw ban mane ïa ki. Nga long U Trai U Blei jong phi.

² Rakhe ïa ki Jingkhawai Niam bad burom ïa ka jaka ha kaba ïa nga la mane. Nga long U Trai.

³ “Lada phi im kat kum ki aiñ jong nga, bad kohnguh ïa ki hukum jong nga,

⁴ ngan phah ha phi ïa u slap ha ka aïom kaba biang, khnang ba ka khyndew kan pynmih kyrhai ki jingthung jingtep bad ki dieng kin seisoh.

⁵ Ki jingmih kin long kiba bun katta katta ba phin dang ot hi ïa u kew wat haba ka la dei ka por kheit sohwaiñ, bad phin dang kheit hi ïa kita ki soh wat haba ka la dei ka por bet kew. Phin ïoh bam kat kaba phi kwah, bad phin ïoh im suk im saiñ ha la ka ri.

⁶ “Ngan ai ïa ka jingsuk ha ka ri jong phi, bad phin thiah phin dem khlem tieng ïano ïano. Ngan ym shah ban don ki mradkhlaw kiba runar ha kata ka ri, bad ka thma kan ym don shuh hangta.

⁷ Phin long ki nongjop pyrshah ïa ki nongshun jong phi;

⁸ san ngut na phi phin jop ïa ki shispah ngut, bad shispah ngut na phi phin jop ïa ki shiphew hajar ngut.

⁹ Ngan kyrkhu ïa phi bad ngan ai ha phi shibun ki khun; ngan pynskhem ïa ka bynta ka jutang jong nga kaba nga la pynlong bad phi.

¹⁰ Ki jingmih ba phi lum kin long kiba bun, bad kin biang na ka bynta shisnem; wat la katta ruh, phin hap bret noh ïa kaba dang sah na ka jinglum kaba rim ban pyllait jaka ïa ka jinglum kaba thymmai.

¹¹ Ngan shong hapdeng jong phi ha ka ïingjaiñ bakyntang jong nga, bad ngan ym phai noh na phi da lei lei.

¹² Ngan long ryngkat bad phi; ngan long U Blei jong phi, bad phin long ki briew jong nga.

¹³ Nga, U Trai U Blei jong phi, uba wallam ïa phi na ka ri Ijipt khnang ba phin ym long shuh ki mraw. Nga la pynkheiñ ïa ka bor kaba pynpoh ïa phi, bad nga la pynlah ïa phi ban ïaid ha ka burom.”

Ka jingpynshitom namar ka jingbymkohnguh

¹⁴ U Trai u ong, “Lada phim kohnguh ïa ki hukum jong nga, phin shah pynshitom.

¹⁵ Lada phi kyntait ïa ki aiñ bad ki hukum jong nga, bad phi pynkheiñ ïa ka jutang ba nga la pynlong bad phi, ngan pynshitom ïa phi.

¹⁶ Ngan pynngat ha phi ïa ka jingjynjar — ki jingpang bym lah pynkhiah, bad ki jingpang shit ki ban pynmatlah ïa phi bad ban pynlong ïa ka jingim jong phi ban sep-ei. Phin bet ïa u symbai, hynrei um myntoi ïa phi, naba ki nongshun jong phi kin jop ïa phi bad kin bam ïa kaba phi la thung.

¹⁷ Ngan phai pyrshah ïa phi, te phin shahjop ha ki nongshun jong phi, bad kito kiba phi isih kin synshar halor jong phi; phin sngewsheptieng haduh katta katta ba phin phet ïap haba ym don ba beh ïa phi.

¹⁸ “Lada wat hadien kat kane phim treh satia ban shahshkor ïa nga, ngan pynshitom jur ïa phi sa hynñiew shah.

¹⁹ Ngan pynkheiñ ïa ka jingsngewmeng jong phi; yn ym don slap, bad ka khyndew jong phi kan tyrkhong bad eh kum u nar.

²⁰ Baroh ka jingtrei shitom jong phi kan long lehnoh-ei, namar ka khyndew jong phi kan ym pynmih jingthung jingtep bad ki dieng kin ym seisoh.

²¹ “Lada phi dang ïaleh pyrshah ïa nga bad phim treh ban kohnguh ïa nga, ngan pynshitom shuh shuh ïa phi sa hynñiew shah.

²² Ngan phah ïa ki mradkhlaw kiba shyrkhei ba kin leh donbor halor jong phi; kine kin pynïap ïa ki khun ki kti jong phi, kin pynjot ïa ki jingri jingdup jong phi, bad kin sah sa tang khyndiat eh na phi, ba kumta ki lynti bah jong phi kin kynjah.

²³ “Lada wat hadien kat kane ka jingpynshitom phim pat shahshkor ïa nga, hynrei phi ïai pyrshah ïa nga,

²⁴ te nga ruh ngan phai pyrshah ïa phi bad ngan pynshitom ïa phi kham jur sa hynñiew shah.

²⁵ Ngan pynkhie da ka thma ban pynshitom ïa phi namar ka jingpynkheiñ jutang jong phi, bad lada phi wad jingïada da kaba ïalumlang ha la ki shnong, ngan phah ïa ki jingpang bym lah pynkhiah hapdeng jong phi bad phin hap pyndem ha ki nongshun jong phi.

²⁶ Ngan ot noh ïa ka jingpynpoi jingbam jong phi, ba kumta shiphew ngut ki kynthei kin donkam tang kawei ka dpei ban shet ïa u kpu baroh uba ki don. Kin ïasam ïa uta u kpu da kaba shu thew, bad wat haba phi la bam lut ïa u ruh, phin dang thngan.

²⁷ “Lada hadien kat kane phim treh ban shahshkor ïa nga bad phi dang ïai pyrshah hi ïa nga,

²⁸ te ha ka jingbitar ngan phai pyrshah ïa phi, bad sa shisien ngan pynshitom jur shuh shuh ïa phi sa hynñiew shah ban ïa kaba la long mynshuwa.

²⁹ Namar ba la palat ka jingthngan, phin hap bam sa ïa la ki jong ki khun.

³⁰ Ngan pynjot ïa ki jaka mane blei jong phi kiba ha ki lum, ngan pynpra ïa ki duwan thang jingiwbih jong phi, bad ngan bret ïa ki metïap jong phi halor ki bleithaw jong phi kiba la kyllon.

³¹ Ha ka jingijli bakhraw, ngan pynjot thiaw ïa ki shnong jong phi, ngan pynpra ïa ki jaka mane blei jong phi, bad ngan kyntait ïa ki jingkñia ainguh jong phi.

³² Ngan pynjot thiaw ïa ka ri jong phi haduh ba ki nongshun jong phi kiba ïohknieh ïa ka kin da lyngngoh ngaiñ ïa ka jingpynjot.

³³ Ngan pynkhie da ka thma ban pynsakma ïa phi kylleng kylleng ki ri nongwei. Ka ri jong phi kan sah kynjah, bad ki shnong jong phi kin sah ha ka jingjot.

^34-35 Te ka ri kan ïoh lehkmen ha ki snem ka jingshongthait kaba pura ha kaba phin ym ai ei ei ïa ka; kan long kaba la iehnoh bad kan ïoh shongthait, katba phi dang don ha ka jinglongmraw ha ka ri ki nongshun jong phi.

³⁶ “Ngan pynlong ha kito na phi kiba dang sah ha ka jinglongmraw ka jingsheptieng kaba khraw kat haduh ba ka jingriew ka sla dieng ha ka jingbeh ka lyer kan pynher krad ïa phi. Phin her ïap la kumba shah beh ha madan thma, bad phin kyllon haba u nongshun um pat don hajan.

³⁷ Phin ïatyngkhuh para ma phi, wat la ym don uba beh ïa phi, bad phin ym lah ban ïaleh pyrshah ïa uno uno u nongshun.

³⁸ Phin ïap ha ka jinglongmraw, phin shah nguid ha ka khyndew ki nongshun jong phi.

³⁹ Katto katne na phi kiba dang lait im ha ka ri ki nongshun jong phi kin nang ringswai namar ka pop jong phi bad ka jong ki kpa tymmen jong phi.

⁴⁰ “Hynrei ki khun ki ksiew jong phi kin phla ïa la ki pop jong ki bad ki pop jong ki kpa tymmen jong ki, kiba pyneh ïa nga bad ïaleh pyrshah ïa nga,

⁴¹ bad kiba la pynlong ruh ïa nga ban phai pyrshah ïa ki bad pynsakma ïa ki sha ka jinglongmraw ha ka ri ki nongshun jong ki. Khatduh, ynda ki khun ki ksiew jong phi ki la pyndem rit ïa lade bad ki la shah pynshitom namar ka pop bad ka jingïaleh pyrshah jong ki,

⁴² ngan sa kynmaw ïa la ka jutang ba nga la pynlong bad u Jakob bad u Isaak bad u Abraham, bad ngan sa pynthymmai ïa la ka kular ban ai ïa kata ka ri ha ki briew jong nga.

⁴³ Nyngkong, la kumno kumno, ka ri ka dei ban lait na ki briew jong ka, ba kumta kan ïoh lehkmen ha ka jingshongthait kaba pura, bad ki dei ban shah pynshitom ha ban da biang namar ba ki la kyntait ïa ki aiñ bad ki hukum jong nga.

⁴⁴ Hynrei la katta ruh, katba ki dang don ha ka ri ki nongshun jong ki, ngan ym iehnoh syndon lane pynjot ïa ki. Da kumta ngan ym pyndkut noh ïa ka jutang jong nga bad ki, naba nga long U Trai U Blei jong ki.

⁴⁵ Ngan pynthymmai ïa ka jutang ba nga la pynlong bad ki kpa tymmen jong ki mynba nga la pynpaw ïa la ka bor ha ki jaitbynriew baroh da kaba ïalam noh ïa la ki briew na ka ri Ijipt, khnang ba ma nga, U Trai, nga lah ban long U Blei jong ki. Nga long U Trai.”

⁴⁶ Kine baroh ki long ki aiñ bad ki hukum ba U Trai u la ai ha u Moses, ha u Lum Sinai na ka bynta ki paid Israel.