LEBITIKOS 25 - Khasi CL Bible (BSI)

Ka snem kaba hynñiew

¹ U Trai u ong ha u Moses ha u Lum Sinai bad u hukum ïa u, ban ai ïa kine harum ki jingbuhbeit ryntih ha u paid Israel.

² Ynda phi rung ha kata ka ri kaba U Trai u ai ha phi, phin burom ïa U Trai da kaba phin ym rep ïa ka khyndew ha man la ka snem kaba hynñiew.

³ Phin bet ha la ki lyngkha, phin khyllad ïa ki bri sohwaiñ jong phi, bad phin lum ïa ki soh jong ki hynriew snem.

⁴ Hynrei ha ka snem kaba hynñiew dei ban shu ieh ïa ka khyndew khlem rep, namar ka long ka snem ba la pynkyntang sha U Trai; wat bet ha ki lyngkha jong phi ne khyllad ïa ki bri sohwaiñ jong phi.

⁵ Wat ot ruh ïa u kew uba shu mih hi, bad wat kheit soh na ki dieng sohwaiñ kiba phim shym la khyllad; ka dei ka snem ban iehnoh shrah ïa ka khyndew.

⁶ Wat la ka khyndew ha kata ka snem ka sah shrah, kan pynmih jingbam hi ïa phi, ïa ki mraw jong phi, ïa ki nongbylla jong phi, ïa ki nongwei kiba shong bad phi,

⁷ ïa ki jingri jong phi, bad ïa ki mradkhlaw ha ki lyngkha jong phi. Kat kaba mih nangta lah ban bam.

Ka snem ka jingpynphai pat

⁸ Kheiñ hynñiew sien ki hynñiew snem, kata baroh kan long sawphew khyndai snem.

⁹ Nangta, ha ka sngi kaba shiphew jong u bnai uba hynñiew, kaba dei ka Sngi ka Jingpynïasuk, phah ïa u briew ban pynsawa ïa ka turoi ha ka ri baroh kawei.

¹⁰ Bad to pynkyntang khuid ïa ka snem kaba sanphew bad pynbna ïa ka jinglaitluid ha ki traishnong baroh jong kata ka ri. Ha kane ka snem, ïa ki jingdon jingem baroh ba la dep die dei ban pynphai pat sha u trai jong ka, lane sha ki khun ki ksiew jong u, bad uno uno u briew uba la shah die mraw un leit phai pat sha la ïing.

¹¹ Phim dei ban bet ha ki lyngkha jong phi lane ot ïa u kew uba shu mih hi lane kheit ïa ki soh na ki brisoh jong phi kiba phim shym la khyllad.

¹² Kata ka snem baroh kawei ka long kaba kyntang ïa phi; phin bam tang ïa kita kiba mih hi ha ki lyngkha jong phi.

¹³ Ha kane ka snem, ïa ka jingdon jingem baroh ba la dep die dei ban pynphai pat sha u trai jong ka.

¹⁴ Kumta, haba phi ïadie ïathied khyndew para Israel, wat ïashukor paralok hi.

¹⁵ Ïa ka khyndew dei ban buh dor kat kum ka jingdon jong ki snem ha kiba kata ka khyndew ka lah ban pynmih soh shuwa ban poi ka Snem ka Jingpynphai pat.

¹⁶ Katba nang bun snem, ka dor kan kham heh; bad katba nang khyndiat ki snem, ka dor kan kham rit, namar la pynshongdor ïa ka khyndew ha ka jinglah ban pynmih bun ki soh.

¹⁷ Wat shukor ïa la u para Israel, hynrei kohnguh ïa U Trai uba U Blei jong phi.

Ka jingeh jong ka snem kaba hynñiew

¹⁸ Kohnguh ïa baroh ki aiñ bad ki hukum U Trai, khnang ba phin ïoh shongshngain ha kata ka ri.

¹⁹ Ka ri kan seisoh bha, bad phin ïoh ban bam kat ïa kaba phi kwah, bad phin ïoh shongshngain hangta.

²⁰ Hynrei lah ban don uba kylli hato yn ïoh bam da-ei ha kata ka snem kaba hynñiew, lada ym lah ban bet ban thung lane ban ot ban lum ïa ki soh.

²¹ U Trai un kyrkhu ïa ka khyndew ha ka snem kaba hynriew khnang ba kan pynmih bam kyrhai na ka bynta ar snem.

²² Haba phi bet ha ki lyngkha ha ka snem kaba phra, phin nang bam ïa kaei kaba la ot ha ka snem kaba hynriew, bad phin dang don kyrhai ban bam haduh ba phin da ot ïa u jingthung ha kata ka snem.

Ka jingpynphai pat ïa ka jingdon jingem

²³ Phim dei ban die duh ïa ka khyndew, namar phim long trai ïa ka; ka long ka jong U Blei, bad phi long kum ki nongwei ïa kiba la shah ban pyndonkam ïa ka.

²⁴ Haba la die ïa kano kano ka khyndew, ïa ka hok jong u trai khyndew ban thied pat ïa ka dei ban ithuh.

²⁵ Lada uno uno u Israel u kylla duk bad u hap ban die ïa la ka khyndew, u ba-ha-ïing bajan eh jong u, un thied pat ïa ka.

²⁶ U briew u bym don ba-ha-ïing ban thied pat ïa ka, hadien habud haba u la manbha bad dap biang u lah ban thied pat ïa ka da lade.

²⁷ Lada kumta, u dei ban siew sha uta u briew uba la thied ïa ka ha ka dor ka ban ïahap bad ki snem kiba dang sah haduh ka Snem ka Jingpynphai pat kaba bud, hadien kata un ïoh pat ïa la ka khyndew.

²⁸ Hynrei lada um kotbor ban thied pat ïa ka, kan ïaisah hi ha ka kti uta u nongthied haduh ka Snem ka Jingpynphai pat. Ha kata ka snem yn sa pynphai pat ïa ka sha u trai uba nyngkong.

²⁹ Lada u briew u die ïa ka ïing ha ka shnong ba la ker kynroh, u don hok ban thied pat ïa ka hapoh shisnem naduh ka sngi ba u la die ïa ka.

³⁰ Hynrei lada um thied pat ïa ka hapoh kata ka snem, u duh noh ïa kata ka hok ban thied biang, bad kata ka ïing ka sah duh ha uta u nongthied bad ki khun ki ksiew jong u pateng la pateng; yn ym pyllait ïa ka ha ka Snem ka Jingpynphai pat.

³¹ Hynrei ïa ki ïing ha ki nongrit ki bym shym la ker kynroh yn leh kumba leh ïa ki lyngkha; u trai uba nyngkong u don ka hok ban thied pat ïa ki, bad yn pynphai pat ïa ki ha ka Snem ka Jingpynphai pat.

³² La katta ruh, kiba na ka jait Lebi ki don ka hok ban thied pat ha kano kano ka por ïa ki jingdon jingem jong ki, kiba don ha ki shnong ba la ai ha ki.

³³ Lada ïa ka ïing ha kawei na kine ki shnong la die da kiba na ka jait Lebi bad ym shym thied pat ïa ka, dei ban pynphai pat ïa ka ha ka Snem ka Jingpynphai pat, namar ki ïing jong kito kiba na ka jait Lebi kiba don ha kita ki shnong jong ki, ki dei ki jingïohkynti jong ki hapdeng ki paid Israel.

³⁴ Hynrei ïa ki jaka phlang kiba don sawdong ki shnong jong kito kiba na ka jait Lebi, ym dei ban die ïa ki, namar ki long ka hok kynti jong ki shi junom.

Ki ram ïa kiba duk

³⁵ Lada uno uno u para Israel uba shong marjan bad phi u kylla duk bad um lah shuh ban kyrshan hi ïa lade, phi dei ban ïarap ïa u kumba phi leh ïa u nongtrei, khnang ba u lah ban ïailong u paramarjan jong phi.

³⁶ Wat shim sut ei ei na u, hynrei kohnguh ïa U Blei, bad shah ïa uta u para Israel jong phi ban shong marjan bad phi.

³⁷ Wat kheiñ sut ei ei halor ka ram kaba phi ai ïa u, bad wat die ïohnong ha u ïa kano kano ka jingbam.

³⁸ Kane ka long ka hukum jong U Trai U Blei jong phi, uba la ïalam ïa phi na ka ri Ijipt ban ai ha phi ïa ka ri Kanaan bad ban long U Blei jong phi.

Ka jingpyllait ïa ki mraw

³⁹ Lada u para Israel uba shong marjan bad phi u kylla duk kat haduh ba un da die mraw ïa lade ha phi, phim dei ban pyntrei ïa u kum ïa u mraw.

⁴⁰ U dei ban shong bad phi kum u nongtrei bad shakri ïa phi haduh ka Snem ka Jingpynphai pat.

⁴¹ Ynda poi kata ka por, ma u bad ki khun ki kti jong u kin ïamihnoh na phi bad kin leit phai sha la ka jong ka longïing bad sha ka jaka ki kpa tymmen jong u.

⁴² Ki paid Israel ki long ki mraw jong U Trai, bad u wallam ïa ki na ka ri Ijipt; ym dei ban die mraw ïa ki.

⁴³ Wat pynshitom beiñ ïa ki, hynrei kohnguh ïa U Blei jong phi.

⁴⁴ Lada phi donkam ïa ki mraw, phi lah ban thied na ki jaitbynriew kiba don sawdong jong phi.

⁴⁵ Phi lah ruh ban thied ïa ki khun jong ki nongwei kiba shong hapdeng jong phi. Kum kita ïa kiba la kha ha ka ri jong phi ki lah ban long ka jingïohkynti jong phi,

⁴⁶ bad phi lah ban ai pateng ïa ki ha ki khun shynrang jong phi, ïa kiba ki dei ban shakri katba ki dang im. Hynrei phim lah ban lehbeiñ ïa kino kino na ki para Israel jong phi.

⁴⁷ Lada u nongwei uba shong bad phi u kylla riewspah, katba u para Israel u kylla duk bad u die mraw noh ïa lade ha uta u nongwei ne ha u dkhot ka longïing jong u.

⁴⁸ Hadien ba la die ïa u, pynban u dang don hi ka hok ban shah thied biang.

⁴⁹ Uwei na ki hynmen ki para jong u lane u kñi jong u lane u bakha jong u lane uwei na ki kur bajan jong u, u lah ban thied biang ïa u; lane lada u la ïoh kynshew haduh ban da biang, u hi u lah ban thied biang ïa la ka jinglaitluid.

⁵⁰ U dei ban da ïapynbeit bad uta uba thied ïa u, bad ïakheiñ ïa ki snem naduh ka por ba u la die ïa lade haduh ka Snem ka Jingpynphai pat ka ban wan bad ïa ka bai pyllait kin buh dor kat kum ka jingdon jong kita ki snem, ha ka nongrim jong ka bainong u nongbylla.

^51-52 U dei ban pynphai shi bynta na ka dor ha kaba la thied ïa u kat kum ka jingdon jong ki snem kiba dang sah,

⁵³ la kum ba leh ïa u nongbylla uba trei snem. U kynrad jong u, um dei ban pynshitom beiñ ïa u.

⁵⁴ Lada ym lah ban pyllait ïa u da kano kano na kine ki lad, ïa u bad ki khun jong u dei ban pyllait pat ha ka Snem ka Jingpynphai pat ka ban wan.

⁵⁵ U Israel um lah ban long u mraw baroh shi rta, namar ki Israel ki long ki mraw jong U Trai. U wallam ïa ki na ka ri Ijipt; u long U Trai U Blei jong ki.