LEBITIKOS 24 - Khasi CL Bible (BSI)

Kaba sumar ïa ki sharak

¹ U Trai u ong ïa u Moses,

² “Hukum ïa ki Israel ban wanrah ïa ka umphniang Olib kaba khuid bha na ka bynta kita ki sharak, ba kin ai jingshai man la ka por.

³ Man la ka janmiet, u Aaron un thang ïa ki bad un ieh ba kin meh haduh mynstep ha khmat U Trai shabar ka jingkah kaba ha khmat ka Synduk ka Jutang. Ïa kane ka hukum dei ban leh pateng la pateng.

⁴ U Aaron un sumar bad buh ryntih ïa kita ki sharak ha u diengpynïeng sharak ksiar, bad un khmih ba kin meh man ka por ha khmat U Trai.

U kpu ba la ainguh ha U Blei

⁵ “Shim khat-ar kilo u 'purew bad shet khat-ar tylli ki kpu.

⁶ Buh ïa ki kpu ha ki ar laiñ, hynriew tylli ha kawei kawei ka laiñ, halor ka miej ba la suit ksiar kaba don ha khmat U Trai.

⁷ Buh khyndiat ka jingiwbih kaba khuid halor kawei kawei ka laiñ, kum ka dak ka jingainguh bam ha U Trai.

⁸ Man ka Sabbaton, u Aaron u dei ban buh ïa une u kpu ha khmat U Trai na ka bynta ki Israel kum ka jutang kaba neh junom.

⁹ Uta u kpu u dei na ka bynta u Aaron bad ki khun shynrang jong u. Ki dei ban bam ïa u ha ka jaka kaba kyntang, naba uta u long ka bynta kaba kyntang eh na ki jingainguh bam ba la kñia sha U Trai na ka bynta jong ki.”

Ka nuksa jong ka jingpynshitom kaba hok bad kaba dei

^10-11 Don uwei u briew uba u kpa jong u, u dei u nong Ijipt bad ka kmie jong u pat ka dei ka Israel kaba kyrteng ka Shelomith, ka khun u Dibri uba na ka jait Dan. Une u briew u ïakajia bad uwei u Israel hapoh ka jaka shong dara. Katba ki dang ïakajia kumta, une u briew u krenbeiñ ïa ka kyrteng U Trai: kumta ki wan ïalam ïa u ha u Moses.

¹² Ki set ïa u, bad ki ap haduh ba U Trai un ïathuh ïa ki kumno yn leh ïa u.

¹³ U Trai u ong ha u Moses,

¹⁴ “Pynmih ïa uto u briew shabar ka jaka shong dara. Uno uno u briew uba la ïohsngew ïa u ba u tim u tla un sakhi ïa kata da kaba u buh ïa la ki kti ha ka khlieh jong u, bad nangta u paidbah baroh un lynthem maw ïa u haduh ba un da ïap.

¹⁵ Ïathuh ruh ha ki Israel ba uno uno uba tim ïa U Blei un kit hi ïa la ka pop, bad un shah pynïap.

¹⁶ Uno uno u Israel lane u nongwei uba shong ha Israel uba krenbeiñ ïa U Trai un shah lynthem maw ha u paidbah haduh ba un da ïap.

¹⁷ “Uno uno uba pynïap briew un shah pynïap,

¹⁸ bad uno uno uba pynïap ïa u jingri jong uwei pat u briew, un buria ïa u, ka jingim namar ka jingim.

¹⁹ “Lada uno uno u pynmynsaw ïa uwei pat u briew, kumba u la leh ïa uta, kumta ruh yn leh kylliang ïa u.

²⁰ Lada u pynkheiñ ïa ka shyieng, yn pynkheiñ kylliang ïa kawei na ki shyieng jong u; lada u pynmatlah ïa u na kawei ka khmat, yn pynmatlah kylliang ïa kawei na ki khmat jong u; lada u lop ïa kawei ka bniat, yn lop kylliang ïa kawei na ki bniat jong u. Kumba u la pynmynsaw ïa uno uno u briew, kumta ruh yn pynmynsaw kylliang ïa u.

²¹ Uta uba pynïap ïa uno uno u jingri u dei ban buria ïa u, hynrei uta uba pynïap ïa la u parabriew u dei ban shah pynïap.

²² Kane ka hukum ka teh ïa phi baroh, ïa ki Israel bad ïa ki nongwei kiba shong hapdeng jong phi, naba nga long U Trai U Blei jong phi.”

²³ Ynda u Moses u la dep kren ïa kane ha ki Israel, ki sei ïa uta u briew shabar ka jaka shong dara bad ki lynthem maw ïa u haduh ba un da ïap. Da kumta ki Israel ki leh kumba U Trai u la hukum ïa u Moses.