LEBITIKOS 23 - Khasi CL Bible (BSI)

Ki Jingkhawai Niam

¹ U Trai u la ai ha u Moses

² ïa kine ki jingbuhbeit ryntih na ka bynta ki Jingkhawai Niam, haba ki paid Israel ki ïalumlang ban mane Blei.

³ Phi ïoh hynriew sngi ban trei ïa la ka kam, hynrei kynmaw ba ka sngi kaba hynñiew, ka Sabbaton, ka dei ka sngi shongthait. Ha kata ka sngi, wat trei ei ei. Ka Sabbaton ka long ka jong U Trai, ha ki ïing jong phi baroh.

⁴ Pynbna paidbah ïa kine ki Jingkhawai Niam ha ki por ba la buh ban pynlong ïa ki.

Ka Niam Ka Jinglait bad Ka Niam U Kpu Bakhlem Thiat

⁵ “Ka Niam Ka Jinglait, ïa kaba ju rakhe ban pyndonburom ïa U Trai, ka sdang ha ka por sep sngi ha ka sngi kaba khatsaw jong u bnai uba nyngkong.

⁶ Ha ka sngi kaba khatsan uta u bnai, ka Jingkhawai Niam U Kpu Bakhlem Thiat ka sdang; hynñiew sngi lynter phim dei ban bam ïa u kpu ba la khleh thiat.

⁷ Ha ka sngi nyngkong na kita ki sngi, phin ïalumlang ban mane Blei, phim dei ban leh ïa kano kano ka kam kaba phi ju trei man la ka sngi.

⁸ Kñia ïa ki jingainguh bam jong phi sha U Trai baroh hynñiew sngi. Ha ka sngi kaba hynñiew phin ïalumlang biang ban mane Blei, bad phim dei ban leh ïa kano kano ka kam kaba phi ju trei man la ka sngi.”

⁹ U Trai u ong ha u Moses,

¹⁰ Ong ha ki Israel, “Ynda phi poi ha kata ka ri ba nga ai ha phi, bad haba phi ot ïa u kew, leit rah ïa ka song kaba nyngkong sha u lyngdoh.

¹¹ Uta un kaweh ïa kata ka song kum ka jingainguh kaba kyrpang sha U Trai, khnang ba yn pdiang ïa phi. Uta u lyngdoh un ai ïa ka ha ka sngi kaba bud ïa ka Sabbaton.

¹² Ha kata ka sngi ba phi ai ïa kata ka song kew, kñia ruh kum ka jingainguh thang uwei u khunlangbrot u bym don kano kano ka jingduna.

¹³ Ryngkat bad uta, phin ai ruh ar kilo u 'purew ba la khleh bad ka umphniang Olib kum ka jingainguh bam. Ka jingiwbih jong kane ka jingkñia ka long kaba pynsngewbha ïa U Trai. Phin ai lang ruh bad kata ka jingkñia shi litar ka waiñ kum ka jingainguh dih.

¹⁴ Wat bam na uta u kew thymmai, la uba dang im, ne uba la sdieh pyrthiew, ne uba la pynlong kpu, tad haduh ba phi la wallam ïa kane ka jingkñia ainguh sha U Blei. Kane ka long ka hukum kaba ki khun ki ksiew jong phi ki dei ban leh pateng la pateng.

Ka Jingkhawai Niam ka Jingot

¹⁵ “Kheiñ hynñiew taïew naduh kata ka sngi kaba bud ïa ka Sabbaton ha kaba phi wallam ïa ka song kew ban ainguh sha U Trai.

¹⁶ Ha ka sngi kaba sanphew, ka sngi kaba bud ïa ka Sabbaton kaba hynñiew, wan ai shuh ïa ka jingainguh bam sha U Trai da u kew thymmai.

¹⁷ Kawei pa kawei ka longïing ka dei ban wallam ar tylli ki kpu ban pynlong ka jingainguh kaba kyrpang sha U Trai. Kita ki kpu ki dei ban long kiba ar kilo uwei uwei, kiba la pynkhreh na u 'purew, bad kiba la shet bad u thiat, bad yn ai ïa ki kum ki soh nyngkong sha U Trai.

¹⁸ Ryngkat bad kita ki kpu, baroh phin ïa-ai hynñiew tylli ki khunlangbrot kiba shisnem, uwei u masi lyngraw, bad ar tylli ki 'langsohmoh ki bym don kano kano ka jingduna. Yn ai ïa ki kum ka jingainguh thang sha U Trai ryngkat bad ka jingainguh bam bad ka jingainguh dih. Ka jingiwbih jong kane ka jingkñia ka long kaba pynsngewbha ïa U Trai.

¹⁹ Kñia ruh uwei u 'langsohmoh kum ka jingainguh namar ka pop, bad ar tylli ki khunlangbrot shynrang kiba shisnem kum ka jingainguh pynïasuk.

²⁰ U lyngdoh un ai ïa uta u kpu bad ïa kita ki khunlangbrot ar tylli kum ki jingainguh kiba kyrpang sha U Trai na ka bynta ki lyngdoh. Kine ki jingainguh ki long kiba kyrpang.

²¹ Ha kata ka sngi, wat trei ei ei kumba phi ju trei man la ka sngi, hynrei ïalumlang ban mane Blei. Ki khun ki ksiew jong phi ki dei ban leh ïa kane ka hukum pateng la pateng shano shano ba ki don.

²² “Haba phi lum ïa ki jingmih na ki lyngkha jong phi, wat ot ïa u kew uba ha tduh jong ki lyngkha, bad wat leit kylla dien ban khar ïa ki sohkew kiba sah; ieh ïa ki na ka bynta kiba duk bad ki nongwei; Nga long U Trai U Blei jong phi.”

Ka Jingkhawai Niam Snem Thymmai

²³ U Trai u ong ha u Moses,

²⁴ Ong ha ki Israel, “Ha ka sngi kaba nyngkong jong u bnai uba hynñiew, rakhe ïa ka kum ka sngi shongthait kaba kyrpang, bad haba ka turoi ka sawa, wan ïalumlang ban mane Blei.

²⁵ Kñia ïa ka jingainguh bam ha U Trai, bad wat trei ei ei kumba phi ju trei man la ka sngi.”

Ka Sngi ka Jingpynïasuk

²⁶ U Trai u ong ha u Moses,

²⁷ “Ka sngi kaba shiphew jong u bnai uba hynñiew ka long ka sngi ka jingpyndep ïa ka jinglehniam kaba man ka snem ban weng noh ïa ki pop ki briew. Wat bam ei ei ruh em ha kata ka sngi; ïalumlang ban mane Blei, bad kñia ïa ka jingainguh bam ha U Trai.

²⁸ Wat trei ïa kano kano ka kam ha kata ka sngi, naba kata ka long ka sngi ha kaba yn pyndep ïa ka jinglehniam ban weng noh ïa ka pop.

²⁹ Uno uno uba bam ei ei ha kata ka sngi yn ñiew uba la shah tait na ki briew U Blei.

³⁰ Bad lada uno uno u trei ïa kano kano ka kam ha kata ka sngi, nga hi ngan pynjot ïa u.

³¹ Kane ka hukum ka teh ïa ki khun ki ksiew jong phi baroh kat haba ki don.

³² Naduh ka por sep sngi ha ka sngi kaba khyndai haduh ka por sep sngi ha ka sngi kaba shiphew, rakhe ïa ka kum ka sngi shongthait kaba kyrpang. Hapoh kata ka por, phim bit ban bam ei ei ruh em.”

Ka Jingkhawai Niam Ki Ïingtrep

³³ U Trai u hukum ïa u Moses

³⁴ ban ong ha ki Israel, “Ka Jingkhawai Niam ki Ïingtrep ka sdang na ka sngi kaba khatsan jong u bnai uba hynñiew, bad ka neh hynñiew sngi.

³⁵ Ha ka sngi nyngkong na kita ki sngi, ïalumlang ban mane Blei, bad wat trei ei ei kumba phi ju trei man la ka sngi.

³⁶ Man la ka sngi ha kita ki hynñiew sngi, phin kñia ïa ka jingainguh bam. Ha ka sngi kaba phra, ïalumlang biang ban mane Blei, bad kñia ïa ka jingainguh bam. Kata ka long ka sngi mane Blei; phim dei ban trei ei ei.

³⁷ “Kine ki long kita ki Jingkhawai Niam ha kiba phi ai burom ïa U Trai da kaba ïalumlang ban mane Blei bad kñia ïa ki jingainguh thang, ïa ki jingainguh bam, ïa ki jingkñia, bad ïa ki jingainguh dih, man la ka sngi kumba la buh.

³⁸ Kine ki Jingkhawai Niam ki long nalor ki Sabbaton ba ju rakhe, bad kine ki jingainguh ki long nalor ki jingai kiba phi ju ai, ki jingainguh ban pyndep ïa ka kular, bad ki jingainguh mon sngewbha jong phi sha U Trai.

³⁹ “Ynda phi la dep lum ïa ki jingmih na ki lyngkha jong phi, rakhe ïa kane ka Jingkhawai Niam hynñiew sngi naduh ka sngi kaba khatsan jong u bnai uba hynñiew. Ka sngi nyngkong ka dei ka sngi shongthait, bad kumjuh ruh ka sngi kaba phra.

⁴⁰ Ha kata ka sngi kaba nyngkong, phin shim ïa ki soh kiba kynsai, ïa ki tnat dieng Tlai, bad ïa ki tnat dieng kiba bun sla, bad sdang ïa kane ka Jingkhawai Niam ban ai burom ïa U Trai U Blei jong phi.

⁴¹ Rakhe ïa ka hynñiew sngi. Ki khun ki ksiew jong phi ki dei ban bud ïa kane ka hukum pateng la pateng.

⁴² Ki Israel baroh ki dei ban shong hynñiew sngi ha ki ïingtrep,

⁴³ khnang ba ki khun ki ksiew jong phi kin ïoh tip ba U Trai u la pynshong ïa ki Israel ha ki ïingtrep mynba u la ïalam noh ïa ki na ka ri Ijipt. Nga long U Trai U Blei jong phi.”

⁴⁴ Da kumta u Moses u ai ha ki Israel ïa ki jingbuhbeit ryntih kiba ïadei bad ka jingrakhe ïa ka jinglehniam ban pyndonburom ïa U Trai.