LEBITIKOS 22 - Khasi CL Bible (BSI)

Ka jingkyntang ki jingainguh

¹ U Trai u la ong ha u Moses,

² “Ong ha u Aaron bad ha ki khun shynrang jong u, ñiewburom ïa ki jingkñia kiba kyntang ba ki Israel ki la pynkyntang sha nga, ba kumta phin ym pynkheiñ burom ïa ka kyrteng kaba khuid jong nga. Nga long U Trai.

³ Lada uno uno na ki khun ki ksiew jong phi, katba u dang long u bymkhuid, u wan hajan ki jingainguh kiba kyntang ïa kiba ki Israel ki la pynkyntang sha nga, un ym lah shuh lano lano ruh ban shakri ha kata ka duwan. Kane kan ïailong kumta pateng la pateng. Nga long U Trai.

⁴ “Ym bit ïa uno uno na ki khun ki ksiew jong u Aaron, uba ngat ïa ka jingpang 'ñiangthohlieh lane ka jingpang mih jor, ban bam ïa ki jingkñia ainguh kiba kyntang tad haduh ba un da long uba khuid. Lada uta u ktah ïa kaei kaei ka bymkhuid da kaba pyndei bad ka metïap, lane lada u ïoh ka jingpang mih jor,

⁵ lane lada u la ktah ïa u mrad ne ïa u briew u bymkhuid, u kylla long u bymkhuid.

⁶ Uta u briew uba kylla long u bymkhuid un ïaisah u bymkhuid haduh janmiet, hynrei la katta ruh um lah ban bam ïa ki jingkñia ainguh kiba kyntang tad haduh ba u la dep sum.

⁷ Un sa long uba khuid hadien ba ka sngi ka la sep, bad nangta u lah ban bam ïa kita ki jingkñia ainguh kiba kyntang, kiba dei ka jingbam jong u.

⁸ Um bit ban bam ïa ka doh jong uno uno u mrad uba shu ïap hi, lane uba la shah pynïap ha ki mradkhlaw; kata kan pynlong ïa u, u bymkhuid. Nga long U Trai.

⁹ “Ki lyngdoh baroh, namar kata, ki dei ban sumar ïa ki jingbuhbeit ryntih kiba nga la ai. Lym kumta kin kit hi ïa la ka pop bad kin ïap, namar ba ki la pynkheiñ ïa ki jingbuhbeit ryntih kiba kyntang. Nga long U Trai uba pynkyntang ïa ki.

¹⁰ “Dei tang uta uba na ka longïing lyngdoh uba lah ban bam ïa ki jingkñia ainguh kiba kyntang; uwei pat um lah ban bam ïa ki, la u long u nongwei uba shong basah bad u lyngdoh lane u nongtrei jong u.

¹¹ Hynrei ki mraw jong u lyngdoh, ïa kiba u la thied ne ïa kiba la kha ha ïing jong u, ki lah ban bam ïa kata ka jingbam.

¹² Ka khun u lyngdoh kaba shongkurim bad u bym dei na ka longïing lyngdoh kam lah ban bam ïa kita ki jingkñia ainguh kiba kyntang.

¹³ Hynrei ka khun u lyngdoh kaba la long riewkynthei lane kaba la ïapyllait tnga, ka bym don khun, bad kaba la wan phai ban shong ban sah bad la u kpa kumba ka la leh mynba ka dang samla, ka lah ban bam ïa kata ka jingbam ba u kpa jong ka u ïohpdiang kum u lyngdoh. Dei tang uta uba na ka longïing lyngdoh uba lah ban bam ïa ka.

¹⁴ “Lada uno uno u briew u bym dei na ka longïing lyngdoh khlem da poi pyrkhat u bam ïa kano kano ka jingkñia ainguh, u dei ban pynphai sha uta u lyngdoh ïa ka dor jong ka bad un ai ruh nalor kata sa shi bynta na ka san bynta jong ka dor jong ka.

¹⁵ Ki lyngdoh kim dei ban pyntngit ïa kita ki jingkñia ainguh

¹⁶ da kaba shah ïa uno uno u briew u bym dei hok ban bam ïa ki; kata kan pynhap ïa uta u briew ha ka pop, bad un shah pynshitom. Nga long U Trai uba pynkyntang ïa ki jingainguh.”

¹⁷ U Trai u la ong ha u Moses,

¹⁸ ban ong ha u Aaron, ha ki khun shynrang jong u, bad ha ki Israel baroh, “Haba uno uno u Israel lane u nongwei uba ha Israel u ai ïa ka jingainguh thang, la ka long ka jingpyndep ïa kano kano ka jingkular lane kum ka jingainguh mon sngewbha, kata ka jingainguh,

¹⁹ khnang ba yn pdiang hun ïa ka, ka dei ban long da u masi, ne da u langbrot, ne da u 'langsohmoh u bym don kano kano ka jingduna.

²⁰ Lada phi ainguh da u jingri uba don kano kano ka jingduna, U Trai un ym pdiang.

²¹ Haba uno uno u kñia ïa ka jingainguh pynïasuk sha U Trai, la ka long ka jingpyndep ïa kano kano ka jingkular lane kum ka jingainguh mon sngewbha, kata ka jingainguh kam dei ban don kano kano ka jingduna khnang ba yn pdiang hun ïa ka.

²² Wat kñia sha U Trai da uno uno u jingri uba matlah, uba dkoh, uba la mong ka met, uba don prum, uba don 'ñiangdait, lane uba sarew prum. Wat kñia kum ïa uta u jingri ha ka duwan kum ka jingainguh bam.

²³ Phi lah ban kñia ainguh ïa u jingri uba raid lane u bym shong beit ka met ka phad kum ka jingainguh sngewbha, hynrei yn ym pdiang ïa u haba pyndep ïa kano kano ka jingkular.

²⁴ Wat kñia sha U Trai ïa uno uno u jingri uba la shah shohdab ne shah puid. Ym dei ban leh ïa kane ha ka ri jong phi.

²⁵ “Wat ju kñia ïa uba kum uta u jingri ba phi ïoh na ki nongwei na ka bynta ka jingainguh bam. Kum ïa kita ki jingri la ñiew ba ki long kiba don ka jingduna, bad ym lah ban pdiang ïa ki.”

²⁶ U Trai u ong ha u Moses,

²⁷ “Haba kha ïa uno uno u khun masi, lane ïa u khunlangbrot, lane ïa u khunblang, ieh ïa u bad la ka kmie haduh hynñiew sngi, hynrei hadien kata lah ban pdiang ïa u kum ka jingainguh bam.

²⁸ Wat kñia ha kajuh ka sngi ïa ka masi bad u khun jong ka, ïa ka langbrot bad u khun jong ka, lane ïa ka blang bad u khun jong ka.

²⁹ Haba phi pynlong ïa ka jingkñia ainguh sngewbha sha U Trai, bud beit ïa ki rukom lehniam khnang ba yn pdiang hun ïa phi.

³⁰ Bam ïa ka ha kajuh ka sngi bad wat pynsah ei ei haduh ka step kaba bud.

³¹ “Kumta phin sumar bad leh ïa ki hukum jong nga: nga long U Trai.

³² Wat shim thala ïa ka kyrteng bakhuid jong nga, hynrei to ai ban pynkyntang khuid ïa nga hapdeng ki Israel; Nga long U Trai uba pynkyntang ïa phi,

³³ uba la ïalam ïa phi na ka ri Ijipt ba ngan ïoh long U Blei jong phi. Nga long U Trai.”