LEBITIKOS 21 - Khasi CL Bible (BSI)

Ka jinglongkhuid jong ki Lyngdoh

¹ U Trai u hukum ïa u Moses ban kren ha ki lyngdoh, ki khun u Aaron, bad ong ha ki ba uno uno na ki um dei ban pyntngit ïa lade ha ka por ba lehniam haba don uba ïap napdeng ki briew jong u,

² lait noh kiba ïadei jan eh, kum ka kmie, u kpa, u khun, ka khun, u hynmen u para,

³ lane ka hynmen ka para ka bym pat shongkurim kaba shong basah ha ka ïing jong u.

⁴ Um dei ban pyntngit ïa lade ha ka jingïap jong kito kiba ïalong ba-ha-ïing bad u na ka jingshongkurim.

⁵ “U lyngdoh um dei ban khi ïa la u 'ñiuhkhlieh, lane khap ïa la u 'ñiuhtmoh, lane pynmong ïa la ka met.

⁶ U dei ban long uba khuid bad um dei ban pynkheiñ burom ïa ka kyrteng jong nga; u kñia ïa ki jingainguh bam sha nga, bad kumta u dei ban long uba khuid.

⁷ U lyngdoh namar ba u long uba khuid, um bit ban shongkurim ïa ka briew kaba la ïaid nuti, lane ka bym dei ka theisotti, lane kaba la ïapyllait tnga.

⁸ U paidbah u dei ban ñiew ba u lyngdoh u long uba khuid, namar u wallam ïa ki jingainguh bam sha nga. Nga long U Trai; nga long uba khuid, bad nga pynkyntang khuid ïa ki briew jong nga.

⁹ Lada ka khun jong u lyngdoh ka ïaid nuti, ka pynkheiñ burom ïa la u kpa; yn thang ïa ka haduh ba kan da ïap.

¹⁰ “U Rangbah lyngdoh ha uba ïa ka umphniang pynsleh la theh ha ka khlieh jong u, bad ïa uba la pynkyntang ban phong ïa ki jaiñkup lyngdoh, um dei ban ieh ra-ngiep ïa la u shñiuh lane kad ïa la ki jaiñkup.

¹¹ Um dei ban pyntngit ïa lade da kaba leit sha jan ka metïap, wat la ka dei ka jong u kpa ne ka kmie jong u.

¹² Um dei ruh ban pyntngit ïa ka jaka kyntang da kaba mih shabar jong ka; naba la pynkyntang ïa u sha nga da kaba pynsleh umphniang. Nga long U Trai.

¹³ Un shongkurim ïa ka theisotti,

¹⁴ ym ïa ka riewkynthei, lane kaba la ïapyllait tnga, lane kaba la ïaid nuti. Un shongkurim tang bad ka theisotti kaba na ka jait jong u,

¹⁵ ïoh u pyntngit ïa la ki khun hapdeng ki briew jong u. Nga long U Trai, uba pynkyntang ïa u.”

¹⁶ U Trai u la ong ha u Moses,

¹⁷ “Ong ha u Aaron, ym bit ïa uno uno na ki khun ki ksiew jong me pateng la pateng uba don jingduna ha ka met ban kñia ïa ka jingainguh bam sha nga.

¹⁸ Ym bit ïa uno uno u briew uba don jingduna ha ka met ban ai ïa kata ka jingkñia: kum uba matlah, uba dkoh, uba la sniew ka durkhmat, lane uba la thawsha ka met;

¹⁹ uba la duh bor ha ka kti lane ka kjat;

²⁰ uba kdor ka ingdong lane u khyndai khup; uba pang khmat, uba ïoh 'ñiangdait, uba don prum, lane u ïunukh.

²¹ Ym bit ïa uno uno u briew uba hiarpateng na u Aaron, u lyngdoh, uba don jingduna ha ka met ban kñia ïa ka jingainguh bam sha nga.

²² U lah ban bam ïa ka jingbam kaba la kñia ainguh ha nga, ïa ka jingkñia ainguh bam kaba kyntang, bad kaba kyntang eh;

²³ hynrei namar ba u don ka jingduna ha ka met, um bit ban wan hajan ka jingkah pyrda kaba kyntang ne ban leit sha jan ka duwan. Um dei ban pynbit tngit ïa kine ki jaka kyntang jong nga; namar nga long U Trai bad nga pynkyntang ïa ki.”

²⁴ Kane keiñ ka long kata kaba u Moses u la ong ha u Aaron, ha ki khun shynrang u Aaron, bad ha ki Israel baroh.