LEBITIKOS 20 - Khasi CL Bible (BSI)

Ki jingpynshitom namar ka jingbymkohnguh

¹ U Trai u ong ha u Moses,

² “Ong ha ki Israel, uno uno na phi lane u nongwei uba wan shong hapdeng jong phi, uba ai ïa uwei na ki khun jong u ha u blei Molekh, u dei ban shah lynthem maw ha u paidbah haduh ba un da ïap.

³ Nga hi ngan phai pyrshah ïa uta u briew bad ngan ym ñiew shuh ïa u kum uwei na ki briew jong nga, namar u la ai ïa uwei na ki khun jong u ha u Molekh, bad kumta u pynbyrsieh ïa ka jaka kyntang jong nga bad u pynjahburom ïa ka kyrteng kaba khuid jong nga.

⁴ Hynrei lada u paidbah u leh bymsuidñiew ïa kata kaba u la leh bad kim pynïap ïa u,

⁵ nga hi ngan phai pyrshah ïa uta u briew bad ïa ka ïing jong u baroh bad ïa kito baroh kiba ïadon kti bad u ha kaba leh lyndet ïa nga bad ha kaba mane ïa u Molekh. Ngan ym ñiew shuh ïa ki ba ki dei ki briew jong nga.

⁶ “Lada uno uno u leit pan jingmut na ki briew kiba wad jingtip na ki mynsiem jong ki briew kiba la ïap, ngan phai pyrshah ïa u bad ngan ym ñiew shuh ïa u kum uwei na ki briew jong nga.

⁷ Pynkyntang khuid ïa lade, naba nga long U Trai U Blei jong phi.

⁸ Sumar ïa ki hukum jong nga, namar nga long U Trai uba pynkyntang khuid ïa phi.”

⁹ U Trai u la ai ïa kine harum ki jingbuhbeit ryntih. “Uno uno uba tim ïa la u kpa ne ïa la ka kmie un shah pynïap; u la kwah hi ïa ka jingïap.

¹⁰ “Lada u briew u klim bad ka tnga jong u para Israel, ma u bad kata ka kynthei kin shah pynïap.

¹¹ U briew uba ïathiah shongkha bad kawei na ki tnga jong u kpa jong u, u pynjahburom ïa la u kpa; ma u bad kata ka kynthei kin shah pynïap baroh ar ngut.

¹² Lada u briew u ïathiah shongkha bad la ka pyrsa kurim, baroh ar ngut kin shah pynïap. Ki la leh ïa ka kam kaba sang, bad ki la pan kwah hi ïa ka jingïap.

¹³ Lada u briew u ïathiah shongkha para shynrang, ki la leh ïa ka kam kaba sang; dei ban pynïap ïa ki baroh ar ngut.

¹⁴ Lada u briew u shongkurim ïa ka briew bad sa ïa ka kmie jong ka, dei ban thang im ïa ki baroh lai ngut, ba kan duh kan dam ka kam sniew hapdeng jong phi.

¹⁵ Lada u briew u ïathiah shongkha bad kano kano ka mrad, ma u bad kata ka mrad ki dei ban shah pynïap.

¹⁶ Lada ka briew ka ïathiah shongkha bad uno uno u mrad, ma ka bad uta u mrad ki dei ban shah pynïap. Ki pan kwah hi.

¹⁷ “Lada uno uno u ïathiah shongkha bad la ka hynmen ne ka para, kaba na ujuh ne na kajuh ka kmie, yn pynkheiñ burom ïa ki ha khmat u paidbah bad yn tait noh ïa ki na la ki jong ki briew. U la ïathiah shongkha bad la ka para bad u dei ban kit hi ïa la ka pop.

¹⁸ Lada u briew u ïathiah shongkha bad ka briew haba ka dang poi bnai, dei ban tait noh ïa ki baroh ar ngut na la ki parabriew, namar ki la pynkheiñ ïa ki jingbuhbeit ryntih kiba ïadei bad ka jingbymkhuid.

¹⁹ “Lada u briew u ïathiah shongkha bad la ka kmienah kmiesan, ne bad la ka ñiakha, baroh ar ngut ki dei ban shahshitom namar kata ka kam sang.

²⁰ Lada u briew u ïathiah shongkha bad ka tnga jong u kñi jong u, u pynkheiñ burom ïa la u kñi, kumta ma u bad kata ka briew kin kit hi ïa la ka pop; baroh ar ngut kin ïap khlem khun.

²¹ Lada u briew u ïoh ïa ka tnga u hynmen jong u, baroh ar ngut kin ïap khlem khun. U la leh ïa kaei kaei ka bymkhuid bad u la pynkheiñ burom ïa la u hynmen.

²² “Sumar ïa ki aiñ bad ki hukum jong nga baroh, ba kumta phin ym shah kyntait ha ka ri Kanaan sha kaba ngan ïalam ïa phi.

²³ Wat bud ïa ki rukom im jong ki briew kiba shong hangta; ngan beh noh ïa kita ki jaitbynriew ki bymngeit Blei ba phin ïohrung ha kata ka ri. Nga isih eh ïa ki namar ki kam bymman jong ki baroh.

²⁴ Hynrei nga la kular ha phi ïa kata ka ri kaba tuid da ka dud bad ka ngap kum ka jingïohkynti jong phi, bad ngan ai ïa ka ha phi. Nga long U Trai U Blei jong phi, bad nga la pynkyrpang ïa phi na kiwei pat ki jaitbynriew.

²⁵ Namar kata, phi dei ban pynïapher ïa ki mrad bad ki sim ki bakhuid na kito ki bymkhuid. Wat bam ïa ki mrad bad ki sim ki bymkhuid. Nga la ñiew ïa ki, ki bymkhuid, bad kaba bam ïa ki ka pynlong ïa phi ki bymkhuid.

²⁶ Phi dei ban long kiba khuid ïa nga, namar nga long U Trai bad nga long uba khuid. Nga la pynkyrpang ïa phi na kiwei pat ki jaitbynriew ba phin long ki jong nga.

²⁷ “Uno uno u briew lane ka briew kiba leh byrtong kin shah lynthem maw haduh ba kin da ïap; uno uno u briew uba leh ïa kane u pan kwah hi ïa ka jingïap.”