LEBITIKOS 2 - Khasi CL Bible (BSI)

Ka jingainguh bam

¹ Haba uno uno u wallam ïa ka jingainguh da u kew sha U Trai, u dei ban da tylliat shuwa ïa u haduh ba un da ni. U dei ban theh ïa ka umphniang Olib bad ka jingiwbih halor jong u, bad un wanrah ïa u sha ki lyngdoh na ka ïing u Aaron.

² U lyngdoh uba ïarap un shim shi kham uta u 'purew bani ryngkat bad ka umphniang bad ka jingiwbih baroh bad un thang ïa ka halor ka duwan kum ka dak ba la ainguh ïa ka sha U Trai. Ka jingiw jong kane ka jingainguh bam ka long kaba pynsngewbha ïa U Trai.

³ Kaba sah na kata ka jingainguh bam ka long ka jong ki lyngdoh; ka long kaba khuid bha, namar la shim ïa ka na ka jingbam ba la ainguh sha U Trai.

⁴ Lada ka jingainguh ka long da ka jingbam ba la shet ha dpei, ka dei ban long kaba khlem thiat. Ka lah ban long da ki kpu kiba rben ba la shet da u purew ba la khleh bad ka umphniang Olib, ne da kiba stang ba la kyllan da ka umphniang Olib.

⁵ Lada ka jingainguh ka long da u kpu ba la shet ha u khiew ba la tap, u dei ban long uba la khleh bad ka umphniang Olib, hynrei uba khlem thiat.

⁶ Pynlwet ïa u bad theh umphniang halor jong u haba phi wanrah ïa u kum ka jingainguh.

⁷ Lada ka jingainguh ka long ka jingbam ba la shet ha ka karai, ka dei ban long da u purew bad ka umphniang Olib.

⁸ Wallam ïa ka kum ka jingainguh sha U Trai bad ai ïa ka ha u lyngdoh u ban rah ïa ka sha ka duwan.

⁹ Uta u lyngdoh un shim khyndiat na ka kum ka dak ba la ainguh ïa ka sha U Trai, bad un thang ïa ka halor ka duwan. Ka jingiw jong kane ka jingainguh bam ka long kaba pynsngewbha ïa U Trai.

¹⁰ Kaba sah na kata ka jingainguh ka long ka jong ki lyngdoh; ka long kaba khuid bha, namar la shim ïa ka na ka jingbam ba la ainguh sha U Trai.

¹¹ Ym dei ban khleh thiat ha ki jingainguh bam baroh kiba phi ai sha U Trai. Lano lano phim dei ban pyndonkam ïa u thiat ne ïa ka ngap ha ka jingbam kaba phi ainguh sha U Trai.

¹² Phin wallam kum ka jingainguh sha U Trai ïa ki soh nyngkong na ki jait kew man la ka snem, hynrei ym dei ban thang ïa ki halor ka duwan.

¹³ Ber mluh ha man la ka jingainguh bam, namar ka mluh ka ïeng kum ka jutang hapdeng jong phi bad U Blei. (Phi dei ban ber mluh ha ki jingainguh jong phi baroh.)

¹⁴ Haba phi wallam ïa ka jingainguh da ki soh nyngkong na ki jait kew, wan ai da ki sohkew ba la sdieh pyrthiew ne da u jait kew ba la tylliat ni bha.

¹⁵ Theh ïa ka umphniang Olib bad buh ïa ka jingiwbih halor jong u.

¹⁶ U lyngdoh un thang khyndiat na kata ka jingbam ryngkat bad ka umphniang bad ka jingiwbih baroh kum ka dak jong ka jingainguh bam sha U Trai.