LEBITIKOS 19 - Khasi CL Bible (BSI)

Ki Aiñ shaphang ka jinglongkhuid bad ka jinglehhok

¹ U Trai u ïathuh ha u Moses, ban ong ha ki kynhun Israel,

² “Long kiba khuid, namar nga, U Trai U Blei jong phi, nga long uba khuid.

³ Uwei pa uwei na phi u dei ban burom ïa la ka kmie bad ïa la u kpa, bad u dei ban rakhe ïa ka Sabbaton, kumba nga la hukum. Nga long U Trai U Blei jong phi.

⁴ “Wat lyndet ïa nga bad mane ïa ki bleithaw; wat thaw ïa ki blei ba shu saiñ na ka sisa bad ban mane ïa ki. Nga long U Trai U Blei jong phi.

⁵ “Haba phi pynïap ïa u mrad ban pynlong ka jingainguh ïasyllok, bud beit ïa ki jingbuhbeit ryntih kiba nga la ai ha phi, bad ngan pdiang ïa kata ka jingainguh.

⁶ Ïa ka doh kñia dei ban bam ha kajuh ka sngi ba la pynïap ïa uta u mrad lane ha ka sngi kaba bud. Ïa kano kano ka doh kaba dang sah haduh ka sngi kaba lai dei ban thang noh,

⁷ namar ka long ka bymkhuid kat kum ka jinglehniam, bad lada uno uno u bam ïa ka, ngan ym pdiang ïa kata ka jingainguh.

⁸ Uno uno uba bam ïa ka un ngat ha ka jingpynrem ba u kheiñ dew thala ïa kaba la pynkyntang sha nga, bad yn ym ñiew shuh ïa u kum uwei na ki briew jong nga.

⁹ “Haba phi lum ïa ki jingmih na ki lyngkha jong phi, wat ot ïa u kew uba don ha ki tduh jong ki lyngkha, bad wat leit ban ot ruh ïa u sohkew uba sah hadien ba phi la lum.

¹⁰ Wat leit phai shuh sha ka brisoh ban khar ïa ki sohwaiñ ba la iehnoh lane tam ïa kito ki sohwaiñ kiba la hap; ieh ïa ki na ka bynta kiba duk bad ki nongwei. Nga long U Trai U Blei jong phi.

¹¹ “Wat tuh lane shukor lane lamler.

¹² Wat ai ka jingkular ha ka kyrteng jong nga lada phim don jingmut ban bat ïa ka; kata ka wanrah ïa ka jingpynjahburom ïa ka kyrteng jong nga. Nga long U Trai U Blei jong phi.

¹³ “Wat shim kabu ïano ïano lane ban lute ïa u. Wat pynsah ïa ka bainong jong uno uno u briew uba phi la khot bylla, wat tang shi miet ruh.

¹⁴ Wat tim ïa u briew uba kyllut lane wat buh ei ei ha khmat uba matlah ban pynlong ba un jynthut halor uta. Tiengburom ïa nga; nga long U Trai U Blei jong phi.

¹⁵ “Lehhok bad bishar hok haba phi shim rai ha ka mokotduma; wat shah shiliang ïa uba duk lane ban sheptieng ïa uba riewspah.

¹⁶ Wat pynphriang lamler shaphang jongno jongno, bad haba uno uno u dang don ha ka jingbishar namar la ka jingim, kren pynpaw lada ka jingphla jong phi kan long jingïarap ïa u. Nga long U Trai.

¹⁷ “Wat buhnud ïano ïano, hynrei ïapynbeit ïa ka jingïapher jingmut hapdeng jong phi, khnang ba yn ym pynleh pop ïa phi namar jong u.

¹⁸ Wat pynhiarkput ïano ïano lane ban ïai isih ïa u, hynrei ieit ïa la u paramarjan kumba phi ieit ïa lade. Nga long U Trai.

¹⁹ “Kohnguh ïa ki hukum jong nga. Wat shah ba ki jingri jong phi kin ïapoi kha bad ki bym dei na kajuh ka jait. Wat thung ha kajuh ka lyngkha ar jait u symbai. Wat phong ïa ka jaiñ kaba la suh da ki ar jait ki ksai.

²⁰ “Lada kano kano ka mraw ka long ka tnga kliar ba la ithuh jong u briew bad ym pat shym la siew dep ïa ka dor jong ka bad pyllaitluid, te lada uno uno u briew u ïathiah shongkha bad ka, yn pynshitom ïa ki, hynrei ym dei ban pynïap namar ka dei ka mraw.

²¹ Uta u briew un wallam uwei u langbrot ha khmat ka Ïingjaiñ Ka Jingdon Ryngkat jong nga kum ka jingkñia namar ka jingpalat jong u,

²² bad da uta, u lyngdoh un pyndep ïa ka jinglehniam ka jingpynkhuid ban weng noh ïa ka pop jong uta u briew, bad U Blei un map ïa u.

²³ “Ynda phi poi ha ri Kanaan bad thung ïa uno uno u jait diengsoh, ñiew ba u soh jong u, u long u bymkhuid haduh lai snem. Hapoh kane ka por phim dei ban bam ïa u.

²⁴ Ha ka snem kaba saw, ïa u soh baroh dei ban pynkyntang kum ka jingainguh ïaroh ïa nga, U Trai.

²⁵ Hynrei ha ka snem kaba san phi lah ban bam ïa u soh. Lada phi leh ïa kane baroh, ki diengsoh jong phi kin seisoh kham bun. Nga long U Trai U Blei jong phi.

²⁶ “Wat bam ïa kano kano ka doh ba dang don snam ha ka. Wat leh ïa kano kano ka kam byrtong.

²⁷ Wat khap ïa u shñiuh ha ki kynriang ka khlieh jong phi lane khih ïa ki tmain

²⁸ lane pruid dak ha la ka met lane pynmong ïa la ka doh ban ïambriew ïa kiba ïap. Nga long U Trai.

²⁹ “Wat pynjahburom ïa la ki khun kynthei da kaba pynlong nuti ïa ki ha ki jaka mane bleithaw; lada phi leh kumta, phin phai noh sha kiwei ki blei bad ka ri kan jyllei da ka jingjyrsieh.

³⁰ Sumar ïa ka Sabbaton, bad burom ïa ka jaka ha kaba ïa nga la mane. Nga long U Trai.

³¹ “Wat leit ban pan jingmut na ki briew kiba wad jingtip na ki mynsiem jong ki briew kiba la ïap. Lada phi leh kumta, yn ñiew ïa phi ki bymkhuid. Nga long U Trai U Blei jong phi.

³² “Pyni burom ïa ki briew ba la tymmen bad ai burom ïa ki. Da kaba tiengburom kohnguh ïa nga; Nga long U Trai.

³³ “Wat lehbeiñ ïa ki nongwei kiba shong ha ka ri jong phi.

³⁴ Leh ïa ki kumba phi leh ïa la u para Israel, bad ieit ïa ki kumba phi ieit ïa lade. Kynmaw ba phi ruh shisien phi la long ki nongwei ha ri Ijipt. Nga long U Trai U Blei jong phi.

³⁵ “Wat shukor ïano ïano da kaba pyndonkam ïa ki jingthew thok, ha ka pruh, ha u mawthew, ne ha ka jingbun.

³⁶ Pyndonkam ïa ki tarajur kiba biang, ki mawthew kiba biang, bad ïa ki tiar thew kiba biang. Nga long U Trai U Blei jong phi bad nga wallam ïa phi na ka ri Ijipt.

³⁷ Kohnguh ïa ki aiñ bad ki hukum jong nga baroh. Nga long U Trai.”