LEBITIKOS 18 - Khasi CL Bible (BSI)

Kaba adong ïa ki rukom ïathiah shongkha

¹ U Trai u ïathuh ha u Moses, ban ong ha ki paid Israel,

² “Nga long U Trai U Blei jong phi.

³ Wat bud ïa ki rukom im ki briew ha ri Ijipt, ha kaba phi ruh shisien phi la shong, ne ïa ki jong ki briew ha ri Kanaan, sha kaba ngan ïalam ïa phi.

⁴ Bud ïa ki aiñ jong nga, bad leh kat ïa kaba nga hukum. Nga long U Trai U Blei jong phi.

⁵ Bud ïa ki rukom leh bad ki hukum kiba nga ai ha phi; da kaba leh kumta, phin ïoh im. Nga long U Trai.”

⁶ U Trai u la ai ïa kine harum ki jingbuhbeit ryntih. Wat ïathiah shongkha bad kano kano kaba ïadei kur dei jait bad me.

⁷ Wat pynjahburom ïa la u kpa da kaba ïathiah shongkha bad la ka kmie, namar mem dei ban pynjahburom ïa la ka jong ka kmie.

⁸ Wat pynjahburom ïa la u kpa da kaba ïathiah shongkha bad kano kano na ki tnga jong u.

⁹ Wat ïathiah shongkha bad la ka hynmen ne ka para, ne ka para kaba na ujuh u kpa, kam pher la ka heh ka san ryngkat bad me ha kajuh ka ïing ne shawei pat.

¹⁰ Wat ïathiah shongkha bad la ka ksiew; kata kan long ka jingjahburom ïa me.

¹¹ Wat ïathiah shongkha bad ka khun ka tnga u kpa jong me, naba ka ruh ka dei ka para jong me.

^12-13 Wat ïathiah shongkha bad la ka ñiakha; ka dei ka kur kaba ïajan eh bad u kpa jong me. Wat ïathiah shongkha bad la ka kmienah kmiesan; ka dei ka kur kaba jan eh bad ka kmie jong me.

¹⁴ Wat ïathiah shongkha bad ka tnga u para u kpa jong me, naba ka dei hi ka kmienah jong me.

¹⁵ Wat ïathiah shongkha bad la ka pyrsa kurim

¹⁶ lane bad la ka hynmen kynsi ne ka para kynsi.

¹⁷ Wat ïathiah shongkha bad ka khun ne ka ksiew jong kano kano ka briew kaba me la ïathiah shongkha; ki long kiba dang ïadei jan bad me, bad kata ka long kaba shong sang.

¹⁸ Wat shim ïa la ka para ne hynmen kynsi kum kawei na ki tnga jong me katba ka tnga jong me, ka dang im.

¹⁹ Wat ïathiah shongkha bad ka briew haba ka dang poi bnai, namar ka long ka bymkhuid.

²⁰ Wat ïathiah shongkha bad ka tnga jong uwei pat u briew; naba kata kan pynlong ïa me u bymkhuid.

²¹ Wat ai noh ïano ïano na ki khun jong me ba yn pyndonkam ha ka jingmane ïa u blei Molekh, naba kata kan pynjahburom ïa ka kyrteng U Blei, U Trai.

²² Ym bit ïa uno uno u briew ban ïathiah shongkha para shynrang. U Blei u isih eh ïa kata.

²³ Ym bit ïa uno uno u briew ne ka briew ban ïathiah shongkha bad ki mrad; kum kata ka kam khyllah ka pynlong ïa me u bymkhuid.

²⁴ Wat pynbyrsieh ïa lade da kano kano na kine ki kam, namar dei da kine ba ki briew ki bymngeit Blei ki la pyntngit ïa lade, kito ki jaitbynriew kiba im ha kata ka ri ha shuwa jong phi bad ïa kiba ngan beh noh, ba phin ïoh leit rung hangta.

²⁵ Ki kam jong ki, ki la pyntngit ïa kata ka ri, bad kumta U Trai un pynshitom ïa ka ri bad un pynlong ruh ïa ka, ban kyntait noh ïa ki briew kiba shong hangta.

^26-27 Ki la leh ïa kita ki kam kiba ijli bad pyntngit ïa ka ri, hynrei phi phim dei ban leh ïa ki. Baroh na phi, la ki Israel ne ki nongwei kiba wan shong hapdeng jong phi, phi dei ban sumar ïa ki aiñ bad ki hukum U Trai,

²⁸ te kata ka ri kan ym kyntait ïa phi, kumba ka la leh ïa kita ki briew ki bymngeit Blei kiba im hangta ha shuwa jong phi.

²⁹ Phi tip ba jar uba leh ïa kano kano na kine ki kam kiba ijli yn ym ñiew shuh ïa u kum uwei na ki briew jong U Blei.

³⁰ Bad U Trai u la ong, “Kohnguh ïa ki hukum kiba nga ai bad wat bud ïa ki rukom im jong kito ki briew kiba shong ha kata ka ri ha shuwa jong phi, bad wat pynbyrsieh ruh ïa lade da kaba leh ïa kano kano na kine ki kam. Nga long U Trai U Blei jong phi.”