LEBITIKOS 17 - Khasi CL Bible (BSI)

Ka jingkyntang ka snam

¹ U Trai u hukum ïa u Moses

² ban ai ha u Aaron bad ki khun shynrang jong u, bad ha baroh ki paid Israel ïa kine harum ki jingbuhbeit ryntih.

^3-4 Lada uno uno u Israel u pynïap ïa u masi lane u langbrot lane 'langsohmoh kum ka jingainguh ïa U Trai hangno hangno lait noh ha khmat ka jingkhang jong ka Ïingjaiñ ka Jingdon Ryngkat U Trai u la pynkheiñ ïa ka hukum. U la pynmih snam bad yn ym ñiew shuh ïa u kum uwei na ki briew ki jong U Blei.

⁵ Ka jingmut jong kane ka hukum ka long ba naduh mynta ki Israel ki dei ban wallam sha U Trai ïa ki mrad ba ki ju pynïap ha lum ha wah. Mynta ki dei ban wallam ïa ki ha u lyngdoh ha ka jingkhang ka Ïingjaiñ bad pynïap ïa ki kum ki jingainguh ïasyllok.

⁶ Uta u lyngdoh un synreit ïa ka snam ha baroh sawdong ka duwan ha ka jingkhang jong ka Ïingjaiñ bad un thang ïa ka khleiñ ban pynmih ïa ka jingiwbih kaba pynsngewbha ïa U Trai.

⁷ Ki Israel kim dei shuh ban lyndet ïa U Trai da kaba pynïap ïa ki mrad jong ki ha lum ha wah la kum ba kñia ainguh ïa ki sha ki ksuid. Ki paid Israel ki dei ban sumar ïa kane ka aiñ pateng la pateng.

^8-9 Uno uno u Israel lane uno uno u nongwei uba wan shong ryngkat hapdeng jong ki, uba kñia ïa ka jingainguh thang lane ïa kano kano ka jingkñia kum ka jingainguh sha U Trai hangno hangno lait tang ha ka jingkhang jong ka Ïingjaiñ, yn ym ñiew shuh ïa u kum uwei na ki briew jong U Blei.

¹⁰ Lada uno uno u Israel, lane uno uno u nongwei uba wan shong hapdeng jong ki, u bam ïa ka doh kaba dang don snam ha ka, U Trai un phai pyrshah ïa u bad yn ym ñiew shuh ïa u kum uwei na ki briew jong U Blei.

¹¹ Ka jingim ki kynja ba-im baroh ka don ha ka snam, bad dei namar kata ba U Trai u la hukum ba dei ban theh ïa baroh ka snam ha ka duwan ban weng noh ïa ki pop ki briew. Ka snam, kaba long ka jingim, ka weng noh ïa ki pop.

¹² Dei namar kata ba U Trai u la ong ha ki paid Israel ba kam bit ïa uno uno na ki, lane ïa uno uno u nongwei uba wan shong hapdeng jong ki, ban bam ïa kano kano ka doh kaba dang don snam ha ka.

¹³ Lada uno uno u Israel, lane uno uno u nongwei uba wan shong hapdeng jong ki, u ïoh pynïap ïa u mradkhlaw lane ïa ka sim kaba khuid kat kum ka jinglehniam, u dei ban da pjiar ïa ka snam bad tap ïa ka da ka khyndew.

¹⁴ Ka jingim jong uwei pa uwei u jingthaw uba im ka don ha ka snam, bad dei namar kata ba U Trai u la ong ha ki paid Israel ba kim dei ban bam ïa kano kano ka doh kaba dang don snam ha ka, bad ba ïa uno uno uba leh kumta yn ym ñiew shuh ïa u kum uwei na ki briew jong U Blei.

¹⁵ Uno uno u briew, la u dei u Israel ne u nongwei, uba bam ïa ka doh jong uno uno u mrad uba shu ïap hi, ne uba shah pynïap ha ki mradkhlaw, u dei ban sait ïa la ki jaiñkup, bad un sum, bad ap haduh janmiet shuwa ba yn ñiew ïa u ba u long uba khuid.

¹⁶ Lada um leh kumta, un kit hi ïa la ka jingpynshitom.